旺地

跟兄姐晚飯完畢回家，在一條街以外都嗅到有燒焦的味道，心想為何我住的區域越來越壞，老是又爛又臭‧再往家的方向行，消防車四五架的守候在街角，原來又火警了‧

真的，又火警‧大約兩個月前才有一次，我家大廈天台起火，為了救三只貓兒，都攪到超麻煩‧老化社區特別多麻煩事，今次又不知是那橦大廈起火‧跑到街角一看，又是我住的那所大廈，真的這麼的好彩‧又再是天台，聽聞今次還有火舌，但我到步時應該都已熄滅了‧站在路邊的等，一直都只是擔心貓兒們的安危‧幸好，回到家後都發覺他們安好‧

人說火燒旺地，只是兩三個月內，便有兩次了，不知是好是壞‧希望好的是，可以帶旺住在這兒的住客，工作生意興旺，財源廣進‧又或是這大廈早一點給有興趣人士收購，令我可以有錢買一所新的，小一點不重要，我只想要住一所有管理的大廈‧

火燒旺地，祝願如此‧

聚餐

朋友帶了相機來我家聚會，大伙兒一見相機，便嚷樣要扮電影 "渺渺"，在二手唱片店中的唱片架前拍照‧我沒看電影，不知是電影在二手店拍，還是在唱片架前拍照‧各人一個個的擺出不同的形態，希望可以拍得一只好照片‧今天我看過照片，不負眾望，大家的相片都不錯看‧相片真的可以騙人哦‧發覺自己反而正經的拍，反而好一點‧


吃的都是到會，沒有特定遊戲，沒有交換禮物，大家只是來到吃吃喝喝‧由於多了一班新朋友，總要化點時間跟大家介紹介紹‧其實，我都己經忘記在介紹大家的當時，我說過些甚麼話，我還不知是否有全部都介紹了，因為我不太記得起我怎樣介紹每一個人‧實情是，我由下什四時多己經跟到來的朋友在喝了，好彩到最後都沒有嘔吐‧

雖是沒有遊戲，但都要在場人仕，即時抽籤一個人出來，再問對方一個問題‧有沒有人可以提供各組的問者和答者，還有問題和答案，我都不大記得所有配對‧只記得戴生拿手槍指嚇答題人，朋友甲要答...

一如過往，我家的雪櫃留下了一大堆飲料‧

好 MAN

A：你究竟鐘意咩野類形既啫？
B：係囉，講比大家聽下，咁睇吓有無貨比你嘛‧
C：唔... 咪啲大大舊呀，好 MAN 咁既樣，高大威猛咁架囉‧
A：哇，有咁既人，一早比人夾左啦，仲有得係個市度咩‧
B：咦~ 可以介紹呀 MAN 精比佢喎‧
C：MAN 精？
A：係喎，佢夠哂 MAN 呀‧
B：好 MAN 架，又高大，又威猛喎，黑黑實實咁，老遠行緊過嚟都見到呀‧
C：哇~ 咁好？
A：係呀‧
C：咦~ 做咩叫做 MAN 精既？
A：無既，既然好 CAMP 既叫 CAMP 精，咁好 MAN 既咪叫 MAN 精囉‧
C：咁話佢好 MAN 咪得囉，做咩要加個精字啫？
A：咁佢係 MAN 過龍嘛，扮 MAN 到扮到成精咁囉‧
B：咁人地又唔係扮既，人地溫柔之嘛，自然流露架‧我地試次你睇呀吓‧
A：我扮佢... 呀 B 呀，你呢近來有咩野玩呀？
B：無喎，咪又係留係屋企‧
A：耶~ 我唔信~ 你咁靚~ 點會無街去架喎‧
B：係呀，真架‧
A：耶~ 你呃人既~
C：哇吓，咁得意既‧個樣好 MAN，但係咁講野既，真係要識吓喎‧係咪真架‧
A：點知佢喎，我見到佢都係咁架喎，三句唔埋兩句就... "耶~ 你咁靚~" 同埋 "耶~ 你呃人既~" 咁架啦喎‧
C：口頭嬋呀，係咪呀‧
B：不過我又唔多覺喎，佢同我傾偈佢又無咁講既‧
A：好似係見你先至似番個正常人咋喎‧
B：可能佢真係覺得你地靚呢，我呢啲貨色，讚左都嘥氣呀‧
A：哦~~~ 原來係咁‧

窄左

今日去左覆趁睇 X 光片，醫生說一如他所預料‧

醫：窄左啦‧
我：即係咩呀？
醫：呢一度呀，第五同第六節既頸骨呀，比起其他，相隔既空位窄左呀‧
我：係喎，咁即係點呀？
醫：所以咪個頭一向後仰，頸椎呢兩舊骨咪點到，咁咪影响到神經線，而隻手咪扯住囉‧
我：哦‧
醫：呢啲位置老化都係正常既，不過係你呢個年紀就少見啲‧
我：吓？係架？老化？
醫：係呀‧同埋你條脊骨又比較奇，一般人條頸係有個弧度，同埋個背脊都係有個弧度既，即係成 S 形‧但係你條頸又係直既，你既背脊又係直既‧直上直，咁啲力咪去哂個頸椎位囉，咪會快左老化囉‧
我：咁會唔會同我既坐姿有關架？
醫：梗係有啦，你返工坐得衰，咪加重左個位既負荷，咁咪快啲有咁既問題囉‧
我：哦~ 不過我都己經改緊我既坐姿架啦，好似好啲咁‧
醫：咁都好啲‧
我：咁家下可以點呀？
醫：我會同機械幫你拉番開佢，咁之後你做番啲強化既運動，咁就應該無事架啦‧
我：咩強化運動呀？
醫：你做 GYM 架，咪好似做膞頭既蝴蝶機呀，做呢種有幫助呀‧
我：哦~ 咁我仲要睇多幾耐呀？
醫：睇多兩個星期左右啦‧
我：日日嚟呀？
醫：咁唔洗，隔一日或兩日啦‧你出去同姑娘約時間啦‧
我：哦‧(心諗，呢筆錢夠我慳慳地洗兩三個星期啦喎‧頂~~)

請善待老人家，得閒可以損款給我睇醫生‧謝謝！

絕交

我比較後知後覺
第一本看他的書已是 Pluto
一次過追回這一套
停不了
聞說謎底卻是輕描淡寫的
剩下最後五本了
今晚或許可以看完

十筒

個多星期以來，背部都有一條筋由頸抽到手臂，試過熱敷都係無乜用，所以去了看醫師‧

他說我的頸椎移位，鬆過頸骨後，好像好了一些‧

原本他要幫我做針炙的，但由於體內過於火重，要做拔罐‧

現在，我的背多了十個紫紫黑黑的圈圈，醫師說很少見有這樣深色的紫黑‧希望可以早日散去，好醜樣‧

巧經

你都咪話唔驚，星期一收到一間工廠既老闆娘既電郵，講完一句公事之後，其剩既篇幅就講左以下既事情...
還有一件私事，想幫你介紹女朋友！
女孩在台灣，也是美國念書回來的，年紀 30-32，
家世不錯，是我女兒同學的姐姐，父母就生了2個女兒，
小女兒是我女兒的同學，也在 LA ，結婚了‧
可能是老二結了婚，媽媽希望老大也趕快嫁出去！
我把你 MAIL 直接給我女兒咯‧
我女儿是 xxxxx

點呀，晨早流流就整封咁既野我嘆呀，諗左好耐，就回左以下既電郵...
至於介紹女朋友一事, 先謝謝哦~
但自身都沒打算拍拖或結婚,
況且也很喜歡現今的單身生活,
所以, 還是免了, 以免人家誤會囉.
但, 還是謝謝你的好意.

我諗，呢位老闆娘都應該知難而退啦，拒絕得咁清楚‧點知，第二日又叫到佢另一個電郵...
不勉強你， 但是只是普通朋友，多個朋友又何防？？ 對不？

我心諗，真係好想用呀某某咁講話嚟覆佢...
我已經夠多朋友啦，唔洗再多個朋友呀！

不過咁，話哂都係有生意來往，又唔好做到咁絕，所以到最後都係唔再覆囉，免得繼續有得煩‧

世界真細小

明天去看 "卡窿簿落" 演唱會
我要早一點到達會場
因為有人錢包被偷
由於是由我的信用咭訂票
所以要早一步代為領取補票
由於代為補票
發覺世界的確細小

首先我有朋友 X 可以代訂門票
所以我廣問好友們有否人要訂票
其中朋友甲代他的朋友乙丙丁們一共訂了廿多張
而朋友乙又是代朋友 A / B / C 代訂
最後朋友 A 卻最近錢包被偷
票亦不見了
其後朋友 A 找朋友乙找朋友甲再找我看看可以怎樣可以補回票子
打了數個電話，弄好了
所以便要當天早一點去領回補票

問題來了
原來朋友乙有事天不能看演唱會
那朋友甲又不認識朋友 A 的
最後，朋友甲前陣子開了一個 MSN 的 group chat 令我 add 了朋友乙
然後朋友乙便將朋友 A 的 facebook 給了我
當然，我跟朋友 A 最後都 add 了我的 MSN 和 facebook
聯絡上了，還約了當天朋友 A 都會早到一點拿票

後來，我上朋友 A 的 facebook 溜覽一下
發覺他有一個我近來認識不久的朋友 D
我跟著 MSN 朋友 D 是否認識朋友 A 呢
原來，朋友 D 明天便會跟朋友 A 一同看演唱會
我就說，拐了一大個彎，原來都是我代訂的票
而且，訂票的朋友 X 跟朋友 D 雖然不太熟
但都是認識的，還有 MSN 呢
早知又何必拐一大個彎
哈~~~~

請問... 大家明白這個關係圖表否呢？

手寫板

A：我呢~ 今日終於都上左第一堂啦‧
B：上堂？上咩堂呀？
A：我上次咪話讀中醫既，終於都上堂啦‧
B：咁咪好囉，有啲世藝‧
A：唉，不過好驚呀‧全部都係簡體字，都唔識睇‧
B：學吓啦，要識架啦‧
A：啲同學又好似好勁咁既，老師講吓歷史，佢地又識得咁‧
B：咁人地有興趣呀，咁就一定會自己睇吓認識吓架啦‧
A：好驚呀，都唔知點算‧
B：勤力啲囉，唔係點喎‧

一個鐘後...
B：點呀？又...
A：我呢，頭先買左個手寫板呀，好好咁架‧
B：有點好法呢？
A：呢個呢，可以寫個中文字呢，之後佢會出左啲相關既詞語比你楝架‧
B：打倉頡都得啦，你唔識咋嘛‧
A：呢個可以繁簡體轉換架，好好架‧呢個 "蒙括" 手寫板真係好喎‧你都買個啦‧
B： "蒙括"？未聽過‧新牌子呀？
A：吓？"蒙括" 喎！未聽過？好出名架喎‧
B："蒙括"？
A：係呀‧
B：頂你‧"蒙恬" 呀！你識唔識中文架‧"括" 字係剔手邊架，"恬" 字係樹心邊呀‧
A：哦~ 讀 "恬" 呀~~~
B：係呀‧好心你學好吓啲中文啦，以前就 "菲摩摩之音"，家下就 "蒙括"，你點學中醫呀‧
A：er... 我諗都 ok 既‧
B：祝你好運囉‧

Bu 嗡煩班周

有個朋友好迷信，有啲咩野事都會話... 唔講你知住，怕細路仔小氣呀‧但每每到事件通天後，四周朋友們來個夾口供，都會話... 呢條友仔，又叫人唔好講，但係次次都係佢自己一個講哂比咁多人聽既‧

我個人一直都係好口密既，唔會事事都攞出嚟講，但係應講就會講，又唔怕話小氣咁既，況且係好事‧

話說同事們都將五天工作掛係口唇邊，終於有一次比大老細聽到，佢就話我地唔比議見書佢，咁邊有得好講呀，唔通你地班友仔咩都唔洗付出就有五天工作呀‧經過一輪初商以後，終於今日大家開會有一個共識，返 845 放 630‧其實都算係咁架啦，以前只係我地公司制度比較寬鬆啫‧一直以嚟話就話番 9 放 6，但係因為要到 930 先開始罰錢，所以個個都係返大約 930，咁放工時間就順延到 630‧到左將來返五日，咁就變左一到 846 就開始罰錢，但係實質啲咁計法，只係比一般公司返早 15 分鐘，而放工成日都會係有遲無早架啦，所以無所謂‧

我諗我老細唔會咁少氣，講完唔算數既‧不過，點都要到出年一月一日先可以返五日，都只係仲有幾個星期啫‧學似關生咁話：成個香港好可能得返你公司返五日半架咋‧我諗唔係成個香港既，只係我身邊所有既朋友啫‧終於可以見到岸啦，多謝‧

怨念文

由葉先生提議的作文活動，其起源請參閱其私日記‧

*** 楔子 ***
在寫作以先，我想先說明自己對怨念文的感覺，這雖然不一定是真理，但相信仍可作一個小小的註腳‧我所認識的怨念，都是從日本怪異鬼怪漫畫 "孔雀王" 中得來，每當人們有所不能得到或達成之事或想法，其內心的負能量便會一直存於體內或其個人生活的四周環境之中‧到了負能量儲存到某一個質量之時，便會引來存在於人類看不見的空間內的邪靈或惡鬼，這些靈體會依附在這些負能中得以生存及壯大‧到時機成熟之時，靈體便會從附體內爆發出來，並侵蝕主體，令這存有怨念的生物變成妖怪，為禍人間‧

其實怨念，大都是因為人的貪念，或者是放不開‧可是，這些事情，大都是一些無關痛癢的，如思想上可以於得開便一了百了，但人就總是執著，或是口是心非，雖說沒所謂，但往往就是最介意的一環‧事情就好像是，我為何沒有名成利就，為何沒人來愛，自己喜歡的人不愛我，自己為何沒有人家的受歡迎，自己為何沒人家那麼的漂亮等等‧簡單來說，一切都是以自己為中心‧當然，在現今的世界，我們不會認為有人會變成怪物，但若怨念常存，這個人遲早也會變成一般人眼中的怪人‧至於怨念文體 (對不起，我不會說自己的文章為文學，會失禮人家)，其實也是一樣，只是對無關痛癢的事情自怨自艾一番而且 (希望不會得罪人啦)‧

*** 內文 - 一件難忘的事 ***
窗外正下著雨
雨點打著窗
窗內的一個我
正看著雨點
想著舊事

每個人都有一些往事
一件一件的去想
一件一件的回憶
我會問
那才是自己最難忘的呢
沒有
一件也沒有

告訢過自己
過去了便是昨天的事
不論是好的還是不好的
都不要被他們纏繞著
生活過便算了

不要記得如何被撇下
不要記得如何被拒絕
不要記得如何被出賣
不要記得如何被欺騙
不要記得那無底的寞寂
不要記得...

看見剛收拾好的一個家
所有物件都井井有條
一塵不染
雖然沒有人來跟我分享
但我會告訢自己
我不須要別人來分享我的成果
我會愛惜我自己
但雨點聽到
我心底裡的嘆息

*** 後記 ***
由於自己習慣寫一些比較寫實和風趣的文體，對於怨念文的寫作方法比較生梳‧而且題目的設定上，對於一個沒有過去的人來說，真的比較困難，所以便越寫越離題‧但最後都要按著自己之前所設定的怨念文體的大方向，把文章怨念化一點‧為著令大家多明白一點，也許在此多下一點註明‧也就是說，雖沒無有一件難忘的事，但卻是每件都是難忘的，而且其主要難忘的，都只是圍繞著一個主題‧希望大家多給意見，望將來可以把怨念寫好一點‧謝謝‧

*** 相關怨念 ***
志偉私記
f4 : 一件難忘的事
www : 一件難忘的事

傻

傻吓傻吓咁繼續生活
又好似幾好
唔洗諗今日
亦都唔洗諗聽日
無時間無地點無環境無憂慮
最好就係
以前所有唔開心既都唔記得
記得既
都係一啲無關痛癢既小事情
眼前所睇既一切
都同其他人唔同
空地睇成為海境
高樓變左做湖泊
最普通既食物都變左人間美食
日日都心平氣和咁食同瞓
如果我第時都可以係咁
的而且確係一種恩賜

不是痴呆

如發現身邊的人好端端的忽然來了一堆痴呆的徵兆，那便要小心，那不一定是痴呆‧

只是兩三天的時間，來得很急，但一定要立即去急症室，否則怕會來不及‧徵兆或許如下：
- 對很簡單的數字感到混淆，如分不清那一天吃兩次或三次的藥‧
- 對別人問及的問題或要求，反應非常遲緩或是沒反應‧要求多次之後，都像沒有聽到一樣‧
- 有許多的人名，物件名或餸菜名都說不出來‧
- 剛剛發生過的事都不記得，例如吃過下午茶也完會不記得，或是有人來探過自己都記得‧
- 忽然做一些事情，但做到一半便忘了，所有東西全都放在原地‧
- 發呆，忘了時間觀念‧例如不停都呆看電視‧
- 分不清楚日夜‧
- 做一些怪異的行為，但又說不出為何要這樣做‧
- 平時只花十分鐘的事情，卻不知為何要花出一兩句鐘‧
- 一反平時生活習慣，例如平時早瞓變成趕也不去瞓‧
- 最後會胡言亂語，問非所答，不停認錯人‧

這可能會是腦部的微絲血管爆裂，血液滲漏‧家人上星期遇上了這個情況，其實應該要果斷的連夜送去醫院，但那時仍不知有機會是爆血管，可幸是送到醫院的時候仍不算遲，不過如早一點的話，情況應會輕微得多‧經過數天的休養，和藥物的反應下，總叫暫時一切安好‧

請大家小心留意家中的老人家‧

雜碎

Papa
父親星期五打給我，說因為左邊肋骨以下按下有點痛‧大陸的醫院照過後說他的肝臟有一個類似瘤的的東西，良性，要他到醫院治理，可以把它隔離後便不會有甚麼大礙‧我叫他立即回港，再在香港找醫生看看有否問題後再作打算‧經同事介紹後，星期一便去看醫生，幸好的是他行得走得食得瞓得，如不往那地方按，又不會痛，希望一切沒問題‧

血戀
今天收到朋友的電話，聽到他很興奮的聲音說有人幫他找到了經典電影 "血戀" 的 vcd‧不知有多少人知道這套李華月小姐的電影，今次得到的還要是燒錄版，還號稱是 "導演國際版"，店員話連李華月自己都沒有的‧我朋友睇左些少，評語是：直既都睇到變孿，基既都可能會睇到性無能‧話雖如此，我都提議朋友大攪一個欣賞晚會，飲住紅酒睇一定好 happy‧

黑湖妖
曾幾何時見過 "水怪黑湖妖" 這個 dvd，當年沒有買，今日在信和見到日本版，還要十八港幣，即買‧呢個電影內的怪物都算是其中的一個經典，見到個造形都覺得好睇‧電影照片請看 imdb‧

無假放
公司阿姐十二月生仔，老闆下令我同另一個同事阿姐產假期間不可以放假‧收到消息時第一句便向阿姐說，做咩咁睇得起我呀‧不過，跟阿姐相識了廿年，為她頂這兩個多月都沒其麼問題，將來又多一個肥肥白白的嬰孩逗了‧我問阿姐改好名沒有，我的提議是，姓張單字一個郎，挺有趣‧哈哈‧

灰姑娘

灰姑娘出身不俗，也有正當不錯正職，但自身性格頗為勞性，一心都為服務大眾為心中首要樂事，從無怨言‧就如香港老牌影后羅蘭姐所說，人家比面找你工作，自己做到的話又那好推卻呢‧雖然服務大眾要勞心勞力，心靈雖是得到滿足，但內心深處仍是渴望有一天可以找到心中的王子，安穩的生活下去‧皇天不負有心人，灰姑娘終在一次義工服務中跟心目中的王子遇上‧童話故事本應就此完結，他們從此便快快樂樂的生活下去，可是現實豈盡人意‧

在社會打滾，灰姑娘又怎沒見過世面，很多事情上都會有自己的想法，也不會像古代婦女的沒主見‧雖是如此，說到談情說愛，怎都會順著王子的，凡事都盡力量配合‧無他，都只因他是自己心目中的王子‧灰姑娘都相信，所有愛情都總要有一個磨合期，只要過得到這一關，她定必能成為真正的公主‧

交往得一些時日，灰姑娘感受越覺奇怪，也開始懷疑自己所選有否出錯‧王子的外左條件，真的是一個王子，但相處過後，總覺得王子的內裡比她自己更像一個公主‧王子要人家主動，要人家呵護，要人家 tum，也會發少爺仔脾氣，還會像小姐般的無理‧灰姑娘就覺得現實就像她跟一個 princess 在一起，莫非要攪 lesbian 乎？

在一次王子的極度無理取鬧的情況下，灰姑娘決定忍痛離開，因為她相信長此下去亦不是味兒‧試問有那一個童話故事，會有一個像刁蠻公主的王子呢？灰姑娘跑到街上，滿腦子都只是梁小姐的歌：
你得不到一切　
別在某天妄想如過去美麗
我那會是公主　
沒有羽扇但我高貴

卡通的我

上次玩不同年代形象投票，一九五六年的形象最合適我‧不過，合成的樣子又真的夠老‧

今次要玩另一樣，朋友給我一個西，玩砌自己的卡通樣，我做了好幾個都總是覺得有點不相像，朋友做的都不錯‧大家又來投票那個卡通最像我‧
呢個係第一次試版, 肥圓樣...
矇眼健
潦倒豆事眼
青春後生仔
改左條眉, 變左青春旺角飛

遊戲網頁 : FaceYourManga

阿邪

A：嘩吓，又一單開戲事件啦‧
B：又邊個呀？唔係個市好靜既咩？
A：唓，靜嗰個係你之嘛，其他人不知幾旺場呀‧
B：講啦~ 唔該‧
A：你無聽過咩，呀邊個喎‧
B：哦~ 一早知啦‧咁家下部戲傾唔傾得成啫？
A：呀邊個好想拍架，個老細都好想開架，不過就資金出左問題囉‧
B：資金？開戲既野，大有大做細有細拍，無所謂架喎，搵部相機都拍得成啦，做乜會有資金問題呀‧
A：唉~ 呀邊個呢，拍邊種都所謂，至在有戲開，生活唔洗咁無聊‧但係個老細就係要史詩式大製作，係都要佢注資喎‧仲要係叫呀邊個比錢做左前期先，之後等到公司之前既投資回本啦，咁先至出錢喎‧
B：嘩，咁都得‧
A：咪係囉，你都知呀邊個都係打工仔，手停口停架啦‧佢都攞左一啲出嚟架啦，不過點比得咁多丫，話哂都係要大製作‧咁呀邊個咪話算囉，唔拍啦，但老闆又係度嘈住哂，話唔 SUPPORT 佢‧唉~ 攪到呀邊個唔知點好‧
B：乜個戲好好既咩？呀邊個咁死心比錢出來拍呀‧講咩既史詩式大製作呀？
A：呀邊個好鐘意個劇本架‧好似話呀主角有次百無聊頼咁識左個叫阿邪既人，攪左幾次之後咪鐘意左阿邪囉‧咁主角問阿邪做咩要撈偏門呀，原來阿邪既背後都有好辛酸既故事，生意失敗之後，無法子之下就開始左撈偏門啦，幫吓啲有需要既人解決吓啲急需既問題咁囉‧不過咁，阿邪都返夜學，諗住讀埋兩年就從新做人，之後就再唔再撈偏門啦‧
B：屌啦星！乜撚野爛故事呀！你估仲係拍緊啲八十年代尾既 "應召女郎1988" 咩‧
A：呀邊個話喎，個導演諗住拍番種懷舊味道，所以個劇本特意係咁架‧同埋今次既戲係集中係呀邊個，即係主角方面啦，例如話當知道自己鐘左阿邪時，由於佢撈偏門，主角點面對自己，同埋佢既矛盾啦‧同埋呀邊個話個角式好有得發揮架，因為兩個人背境既唔同，又無朋友親人既支持時候，主角既兩難決擇呀，好似都話有好深刻既刻劃喎‧
B：唉~ 真係唔知啦，我地又無睇過劇本，老細又無見過，點知係咪坤鳩佢呀‧
A：真係只有個老細至知囉‧
B：不過咁，拍唔拍都無問題，佢自己既選擇，但係要自己攞錢出來拍喎，比著我點都唔制啦‧
A：我都係咁話，不過佢話都值得喎‧不過佢家下話唔想再比錢落去之後，仲有無得繼續拍就唔知囉‧
B：唉~ 祝佢好運啦‧不過佢心甘情願，拍得開心咪得囉‧

水-死-火

有朋友來問我家為何又滲水，不是己在數個月前就弄好了嗎？這個問題我也答不上來‧

星期五約了朋友吃飯，飯後大家回家繼續坐‧大家在廚房抽煙之時，發覺窗外有水滴，那時還以為是樓上的冷氣機滴水‧之後便發覺我的窗邊有水滲濕了牆，開頭還以為又是師父手工不好，一定要他再來補一下，但隨後便再發覺附近的地方亦有滲漏情況出現‧第二天，醒來發覺地上有水，牆上的水積亦多了，就連天花也滲出水積來，攪甚麼鬼‧

星期六叫了樓上業主來看，也叫了師父來，師父等到下什才到，但又說找不到原因‧但據我們的推論，好應該是在滲水位上的水渠有問題，所以每當樓上去水時便漏水了‧星期五下午窗外滴水停了，但滲水持續‧

星期日滲水像少了，但天花水積痕擴大，打電話給師父卻不接‧

星期一花水積痕擴大持續，但慢下來‧星期一好像沒有擴大，但仍有水氣，令人很懊惱‧我在星期六都跟樓上業主說了，我不找師父了，由他去處理，說到底都是他樓上有問題‧

最後由於這兩天沒有擴大水積，我同意樓上業主到了下星期他們處理，因為套房的客下星期比較方便‧

第二件事就是，星期六那天，接到哥哥電話，說姑媽過身了‧八十歲高齡，她到了美國定居也廿多年了，談不上甚麼感情‧但從前父母告知的事件，都記憶猶新，但一切都過去了‧

在星期六，由於要留在家等師父來看漏水情況，之後我和關生便一直呆在家中看電視‧忽然有人大力拍門，我立即開門看看，那男人說樓上天台著火呀，煙一直在往下來啦，快走‧第一時間著關生捉貓，我去取貓籠‧其實貓兒們也因我們的緊張也大為害怕，三只貓走走避避的，足足花了數分鐘才把她們弄好走出家門‧一開門己全是煙霧，三只貓大重，只好抱著下樓，可憐金仔又被嚇得顛癎病發，到了街上仍在抽搐‧經過了約一小時，消防滅了火可以回家，但樓梯全是水，像大洗樓，又花了一小時去清理‧

我很想知，有無有發展商有興趣收購我家大廈？我第一個贊成‧

懶

幾日假期，有以下經歷：
- 樓上疑似爆渠，我家滲水
- 有親戚過身
- 層大廈水災，好彩是小火
- 睇左成套 "執位夫妻"
- 講開就有啲想學小提琴

原來放左幾日假，乜都無做過‧
多謝‧

開戲

A：喂~ 你有無聽過你個 FRIEND 0的野呀？
B：有呀~ 佢有機會戲開嘛‧
A：好似係囉~ 不過好似又未 FIRM 架喎‧
B：佢就衰多口啦，個人去到呢0的位就好似發左溫咁‧
A：咩呀？咩呀？
B：你知啦~ 導演開戲囉，咁點都要有演員試吓鏡架啦‧佢試左啦，同埋導演都好似幾 OK 佢，試左兩組戲架啦‧睇落都好似好有機會咁‧
A：咁咪好囉，上次佢拍0個套呀，爛尾不特只，仲要導演眼高手低‧明明係超小本經營 C 級片，做乜又要扮一級高格調片種，佢罷拍都係0岩既‧咪講上次啦~ 佢今次又發咩溫呀？試鏡發台溫呀？做做下唔記得左自己個角式係乜呀？定係係台度遊魂呀？
B：人地就話興扮鬼妹仔性格率直0者，佢就問埋哂0的老套問題，你知啦~ 有時好避忌架嘛‧
A：吓? 咩事呀？有幾老套先？試緊鏡問呀導演 "我靚唔靚呀" 咁呀?
B：都知未落實架啦，佢個仆街就去問呀導演話點解要找佢做呢個角式喎‧同埋日日都想捉呀導演同佢傾劇本咁囉‧
A：嘩~ 頂！人地都無話過一定要佢做，都無話鐘意佢做呢個角式，你估一定做主角架，或者要佢做閒角呢‧
B：咪係~ 跟住仲叫話可以試多幾組戲架‧咁喎~ 你話係嚇死人丫， 咁 CHUR 呀，即係趕客0者‧明明想比你做呀，都要重新諗過啦，容乜易叫 FIRM 左佢做，之後一路拍一路發爛，又話角式無發揮，無深度呀，成日都話唔夠戲份呀咁呀‧你知啦，家下0的導演呀，要好有自己風格架嘛，點會比你個仲未知會唔會大紅既演員攪亂檔喎‧
A：唉也~ 家下個市咁靜呀，有得試鏡，仲有對白既都已經好好啦，真係醒醒定定呀佢‧係要睇佢做化係點囉，如果嚇唔走既，咁又再睇好一線既‧
B：咁佢都知衰既，睇吓點啦，我都叫左佢小心0的，如果導演有通告再試鏡就最好啦‧無既話，自己都可以爭取吓既， 但係唔好 CHUR 到咁出面囉‧
A：咁又係，你都話息影左咁多年，有咩未見過丫‧教吓佢都好既‧
B：我都仲有0的人面既，我都有諗過，好唔好幫佢問吓有無機會接得成‧不過諗真都係唔好，千祈唔好比人覺得你煩嘛，咁就好容易比人 OUT 左呀‧況且，比人知你咁想接呢個戲呀，壓硬價啦，到時候收到既少少，做既又多多呀‧
A：唉~ 點都好丫，都有得試鏡，我呢邊呀，水靜河飛呀‧
B：咩呀，你都放好多消息出去架啦喎，同埋都有好多人同你搭路架啦喎，都無通告接呀？
A：有我就唔洗係度唉聲嘆氣啦‧我家下乜通告都接架啦，唔楝架啦‧妹仔都做住先呀‧
B：咁都好既，最重要係做番起個人先呀，0的人見得你多，咁就會認得啦，到時機會都多0的呀‧
A：望就咁望啦，再係咁呀，我都唔知捱得幾耐呀‧
B：我見你個樣都知啦，無工開呢，個樣都無乜光彩同埋好 DRY 咁架‧得閒幫你再放下聲氣啦‧
A：好~ 多謝多謝‧

舊樣

昨天朋友比我一個網頁，可以把自己的樣放左不同年代至潮的造形中‧自己抽空做了數款，同讓大家品評一下‧

1954 - 似唔似靳玉樓呀?

1956 - 我個樣真係好有古典美

1968 - 張活游翻生呀

1976 - 一直都好想有一把柔順既長髮呀

1982 - Boney-M 時代

1984 - 呢期興既同女裝無乜分別

1988 - Ghost 呀...

1996 - 吹波頭.....

2000 - 黎明呀....

相關網頁 :year book yourself

顧問

不知是否我一把年紀，有許些朋友都會找我來問意見‧今天便做了兩個顧問的案子，但都是感情顧問‧

一個是終於有機會跟傾慕己久的人擦出瞬間火花，過後整個人便迷迷糊糊的，到第二天仍舊胡思亂想‧這也難怪，當有一個自覺比自己好很多倍的人跑來親近，思緒可以定下來才怪‧

另一個是舊菜再度再面前借故親近‧朋友本跟舊菜分開，不是沒有回轉的田地，要的也只是一個明明白白的關係，只要對方攪好現有的古怪攤子，好好的發展不是沒可能‧可恨是對方吊兒郎當的，花了好些時日都弄不出一個頭緒來‧攤子仍在，舊菜意圖亦很明白，要與不要都只在朋友的一句話‧有時真的很難取捨‧

我不博學，見識也不多，經驗亦不豐富，許多時都只是跟朋友按表像來討論，且看能否從中找到對方在打甚麼牌將‧因友人們許多時在那時候都是瞎了眼，只是甚麼都看不真，我都只是開通開通‧

無論如何，祝大家生活開心快活‧

冰迷

睇完奧運
身邊好多朋友都變左做冰迷
話冰冰好得意
好可愛咁喎
啲人話一睇到佢吊高嚟
咁成個人就 HIGH 哂冰冰聲啦喎
都唔知係睇仔定係睇人家演出
既然咁多人鐘意
又剛巧有朋友給我冰圖
便放上來給大眾解暑
佢都係適宜少穿一點
出左運動場
佢既 CHARM 真係大減
不同款式的 雜果冰
特別介紹穿西服的 seven 冰

花迷

大部份朋友都知我喜歡聽音樂，還以為我番鬼性格，只好泊來貨‧認識我的人便知，除了某些特定的曲式以外，我甚麼都聽得一大餐‧

昨天跑到二手店，原本只是想看看有否又便宜又合聽的，可惜甚麼都找不著，在離的那一剎那，給我看見這個唱片.... 帝女花‧這個當然不是原裝任白版本 (那個一早已經擁有了)，是去年雛鳯舞台版本‧仙鳯鳴收山以前我都沒機會看他們演出，前年底雛鳯為慈善出山，千辛萬苦叫托朋友弄來了兩只票，看後覺得數百元的票真的超值‧一等再等，唱片和 dvd 終於面世，可是 dvd 要千元以上，太貴了‧而唱片卻只是二百多元，暫時先聽吧，如將來找到便宜的再買‧ 不要以為我又只是買來儲，我真的曉唱和有些段落會背的‧
新版本 (長條書是舞台演出場刊呀)
原裝版 (任白版本呀)

友誼的光彩

奧運完結，原本今天應有失落效應，但收到一個 MTV 後，成個人開心哂‧記得佢嘛？


在奧運期間，他有新歌哦‧為了奧運，他花了三四年苦心創作新曲，為奧運加油，為香港打氣‧他仍是那個當年 "熱愛生命、熱愛音樂、熱愛香港" 的如城哦‧其實 "如城音樂" 就如 "得城女傭" 一樣，真係好入屋架‧我地先來欣賞他的新歌‧歌曲目的要是 "歡迎奧運，支持奧運，同埋唱出所有人既友誼"，名字是... 友誼的光彩‧Together, together, together... 一齊睇囉‧睇完一定令你有 Forever Memories‧可惜的是，現場他只唱了半首，希望他快快有 MTV 啦‧


友誼的光彩
Together ! Together ! To........gether !

我們約定了你 愛愛到北京
北京奧運聖火 燦爛 艷陽
* 友誼的光彩 已經感動我的心
我快樂高歌 唱出我心中喜悅
唱出東方之珠策馬奔騰
更美麗 更美麗
唱出全國澎拜歡欣 *

唱出人民熱潮湧 你對我 我對你 高歌
中國人 中國心 you are my pride
you are my pride you are my pride

五千年的成長 五千年的光彩
五星紅旗迎風飛揚
神州大地盡舜堯
振奮五湖四海 顯歡欣
Together ! Together ! Together !
全世界的朋友齊來高興
同一個夢想 同一個笑容
Forever memories ! Forever memories ! Olympic ! Olympic !

# 熱烈地唱 你怎何失去了良機
快來呼喚 友誼萬歲 熱烈地叫
不論你來自何方 不論你來自何方
北京奧運聖火 火舞艷陽 令我令你著迷
今天不回家 今天不回來 我愛你一齊來
我的祖國 永遠 永遠 散發 美麗 光芒 #

repeat *

唱出人民在微笑 在高歌叫
China China you are my pride
you are my pride you are my pride
Together ! Together ! Together !
全世界的朋友齊來高興 齊來呼應
同一個夢想 同一個快樂
Forever memories ! Forever memories !

奧運完結

一直好怕中國攪奧運會有甚麼特別事故出現，幸好完滿結束，還順利和讚嘆‧

過了兩個星期，每天開著電視都只是看比賽，其他的節目都一概不看‧

完結了，生活回復正常，有點失落‧又沒有好節目看了，或許是時候開始聽聽那些到手的唱片，又或是買了一直沒有看的漫畫‧

朋友們說我近來少更新了部落格‧沒甚麼，生活正常得可以，沒有甚麼特別的事要寫‧說明白點，我個人悶同懶囉‧

蟬聯嬋

新一屆海報皇后於奧運其間誕生‧由得到上屆網上投票冠軍的嬋嬋蟬聯冠軍‧

上屆嬋嬋的 "只喜歡一個含"，於網上投票中，打敗了現場投票冠軍的姚婆婆的 "浪漫鬼故事"‧但由於本屆姚婆婆因私事未能參與其中，令嬋嬋勝數大增‧

比賽未開始時，嬋嬋未知自己有份參與，一心等著睇好戲‧直到比賽開始，才知自己已被內定參與‧最後憑著實力，終於打敗十一名對手，蟬聯冠軍‧嬋嬋勝出後，身穿 Easy Mi-Yucky 的皇者披風，手拿骷髏權杖，頭載 "周大根" 皇者之冠受大眾祝福，並與友人合照‧

Model BuBu

前子參架了一個月曆公司的遊戲，把家中貓相電郵給他們，且看家中老貓們能否有幸入圍‧今天查看他們網頁，有了結果，三只貓中只有一只可以亮相，而且是出乎意料之外的竟是 BuBu‧影相比較上鏡的妙芝出局，樣子比較靚女的金金又出局，常常笨頭笨腦的 BuBu 卻當選‧這也好，可以給她一個平反，她也是可愛貓咪‧

你們能否找到那只是我家的 BuBu？
http://www.paper4fun.com/php/news/news.php

怪談

A：農曆七月呀，你都咪話唔信邪呀‧
B：你遇到有怪事咩？
A：咁又無，不過公司成日都唔見野，忽然又係啲唔可能既地方出現啫‧
B：唓~ 咁又有乜咁奇丫，我公司成日都係咁架啦‧
A：係咁話啫，都係唔好開咁夜 OT 呀‧
B：講開公司呀，我公司近來都有怪事發生呀‧
A：係？乜事呀？
B：我公司個同事呀，有一日無啦啦做做吓野成身唔郁得呀，但係又講到野，但係好似比鬼壓咁，個人清醒但係唔郁得，幾得人驚呀‧
A：吓？日光日白都比鬼壓呀？唔係嘛，你公司咁猛既‧
B：我唔知呀‧我歌日都唔係公司，同事後來話番比我知既‧我老細都話叫白車架，你知啦呢啲事可大可少架嘛，佢又話唔洗，不過好彩後來慢慢都郁得番無事‧
A：哦~ 咁都好啲‧有乜事就煩囉‧
B：今日仲驚呀‧
A：吓，仲有下文架？
B：係呀，不過唔知關唔關事‧今早呢，呀頭收到同事既電話，佢話琴日中暑，好彩及時入左醫院睇左無乜事，今日要休息多一日喎‧
A：嘩~ 咁大鑊？中暑喎‧佢真係禍不單行呀‧不過又唔係係公司，關乜事喎‧
B：咁又唔係咁講啦，你諗清楚吓‧
A：唔... 咦~~ 琴日~~ 放假喎...
B：係呀...
A：打左成日八號風球喎...
B：係呀...
A：橫風橫雨喎...
B：係呀...
A：應該留係屋企架喎...
B：係呀...
A：咁都會中暑呀...
B：係呀...
A：嘩... 好得人驚喎... 咁邪既... 係咪你公司真係有料到呀，跟住佢呀？
B：咁呢個就真係唔知呀，希望佢無乜事，大步檻過啦‧
A：望就咁望啦，呢啲野唔好講咁多囉‧不過你公司真係好得人怕‧

Being Boring

從來無預計到會打風打得成，無故的多了一日假期，但的而且確認真係無聊‧

一早醒來便知八號風球，開心了一會兒，想著可以多睡一會‧但是，上星期剛掉了用了多年的窗簾，換上了比較透光的紗布簾，日光透進來，卻老是睡不回去‧十二時起來，人總是迷迷糊糊的‧

一整個下午，無無聊聊的，看電視又沒啥好看，看書又看一入腦，健身房又沒有開，再睡又睡不著，真的不知如何是好‧最後，只是發呆的看著新聞台渡過了整個下午‧

相信最開心的還是貓咪們，一整天都有人陪著她們發呆‧

好大條坑

經過多日的地盤生活，所有維修都終於完成‧現在家中的從廳到廚房中間變了一道走廊，非常的傷腦筋，又要找空位放那三大部東西，雪櫃洗衣機和鞋櫃‧最後給他們找到落腳點，而且還掉了沒有供奉己久的神樓才有足夠空位，但我卻要多一點時間去習慣‧

由去年夏天，放假無所事事之下，便完成了家屋維修工程第一期的修補好發霉霉爛爛的牆 (第一期完工)‧上個月的黑雨，塞了雨水渠而導至我室內不停的入水‧終於找到了師父要把僭建拆除，原定七個工作天，最後都要十天才起貨‧因為便宜，所以不祈望會有好好的手工，只望以後再有黑雨都不入水便好了‧今天連棚架都拆了，跟著要做的，便是要向有關部門投訴樓下的僭建屋簷和對面大廈的僭建了‧現在維修後新居如下‧

拆我個僭建

今天一早便開始拆僭建，現在變了爛屋一間，希望可以三天可以弄好，最重要是天公做美‧可憐‧

蒟蒻

公司同事每月生日例會，大家圍在一起嘻嘻哈哈的切蛋糕，發生如下對話‧

A：哇吓~ 今次點解會買蒟蒻食既‧
B：係喎，咁貴都買‧
A：都好丫，好食呀‧
B：可能佢地近來見你既髮型，所以咪買啲嚟比你食囉‧
A：又關我個髮型事？我個新髮型不知幾好呀‧
B：近來個個都見到你個頭 DUP 哂，無哂蕉氣咁‧
A：咩呀~ 家下出街唔洗嘥時間整起個頭佢呀‧
B：咪係囉，見你個頭就知你近來 "舉弱" 啦，所以咪買啲 "舉藥" 番嚟比你補吓囉‧
A：咩蒟蒻蒟蒻咁呀...
B：咪理啦，總之就食多啲啦，補身呀‧
A：哈哈哈~~ 好呀好呀~~

待修

經過個多月的漏水，終於落實做維修了‧

一開始的時候，問了數家維修公司，數目也都約為三萬元以下‧跟原本心想的數目也相差不遠，一心等待他們的報價單，但一直都沒有收到‧最後樓上的業主再找到一家報價，價格卻少了一大節，只是二萬元不夠便可，而且報價單隔日便收到‧於是星期五早上再度約師父上門，詳細談談所要做的事項，工程便拍板落實了‧我問師父收錢的方法如何，他竟然說沒所謂，到做到我的部份時給些少訂金，完工後全數支付便可‧現今做工程的，少收一點先再工也不成，我聽他這樣說我自己也呆了一呆，但對我沒有任何損失之下，何樂而不為‧

由於天氣不穩定，其實我都不知是會那時才開工的，因為師父說搭建棚架也要等天氣好才可以做‧原本打算是星期六天氣會好一點，早上才會搭棚，誰不知星期五晚回家，原來己經搭好棚，嚇得我‧雖然現在己經搭好棚架，但我家的工程還沒有開始，因為我跟樓上的僭建一同做的，所以入須是由上而下的拆下來‧按他們說，為了令我省點請假時間，如天氣好的話，相信可於星期四五便可在我家開工‧如天氣沒大問題，相信大約七個工作日便可以完工‧其實自己也想可以早一點，起碼不用再對著那道哭牆而發愁‧

今天出街吃午餐時，特意跑上樓上看看他們做得如何‧那時大約一時半，都只是得一個工人在開工，而老細亦隨後而到，那我便明白何以收得平，很大可能是大部份的工作都是老細自己做，所以便可以省下工人們數百元一天工資的錢了，但工程的進度便要拖慢了‧無所謂，與其都做了哭牆個多月了，也不差在那數天，可以省下一萬元，挺好哦‧

但我最擔心的，還是如何安置妙芝一家‧在工程開始，又未起好新牆之前，怕且都要把她們關在房間內了‧我的睡房，將會是她們的套房了‧

不是天使(十四)

賣肉求生

看見小奧在上篇的題外話說，近日我朋友間都在部落格內曬胸賣肉，有感而發想起自己的過往來‧雖然現今自己的身形以四十一的高齡都總算可好，但都不是一朝一夕的事‧

年青的時候，高度算不錯，家人說我的體格是雙骨，即是骨頭大‧可是我並沒有長肉，骨頭大有個屁用，人卻瘦瘦的肩寛腰幼坐圍大，好一個胡籚身形，只欠一對乳房便可以易服穿貼身女裝上街去‧買衣服更令自己更加懊惱，買褲腰圍合身坐圍便拉不到拉練，或許是坐圍穿得上腰部卻多出三四吋來‧不要忘記以前流行是有點窄身牛仔褲的，T-SHIRT 都要放進牛仔褲內的才是好看，試想想腰部的裝水位令人多難堪‧買上衣更要命，寛肩的確是可以把衣服承托得好看點，但到了腰部便像只有一只柴枝的支撐著上下身兩部份，風吹過真的看到好一個倒三角，但卻是倒三角鐵架，還試過有人問我為甚麼穿 T-SHIRT 也要墊膊，尷尬得要命‧

胡籚身形還算了吧，更可怕的是身體橫切面人薄如紙，還要上身得到一對窩胸‧甚麼是窩胸？胸肌是兩團肌肉放上身，窩胸是胸口中間像一個盆地的陷下去，中間見骨‧嚇人不嚇人？自己的樣子都叫作好端端的有點看頭，自己都不明白何以父母弄出我這樣的一個身形‧那時的我，對自己真的一點信心都沒有，記得某段時間一年四季都是長袖衣服，更不要叫我去游泳了，去也只會穿一般的短褲示人吧‧

十多年前跟人家跑去健身房做運動，帶氧的極度沒興趣，全都只是做重量‧日子有功，開始有些成績，有點手有點胸，便急不及待的穿背心示人，想起來都覺得有點羞‧以前只著重做胸做手，到後來覺得背和肩都仍是沒有點肉，數年前才告急的多做一點，希望不只是未見人胸先到‧

那麼辛苦的為甚麼？倒頭來也只是為了人家的注目‧外形樣貌就是給別人的第一個印象，好一點總好過爛一點‧新朋友新客戶新同事，見你曉得保養好自己的身體，不讓它衰退下去，不多不少的都會為自己加一點分數‧工作上雖然真的要努力才是最上算，雖不至於要靠身體扶搖直上，但人家見你外表儀容都令人舒服，方便總可以撈到一點的‧

大家都明白，現今的世代，sex sells 是的而且確的一件事‧在自己還可以出賣色相的時候，露一點也不為過吧‧練得那麼辛苦才得來的肉身，有機會不秀一秀才是罪過‧雖然說男人賣的是實力，但有色相也是相當的重要，起碼會令人留意到自己，多看兩眼記得自己‧不是說身材就是一切，但其實是一環一環的扣下去，身材好一點，便會買些好一點的衣服裝扮一下自己‧裝扮花了點心機，總不能叫自己的儀容拖垮了自己辛苦得來的成果，結果還是要繼續的護理下去，就似是一生的事業，沒完沒了‧醜不是罪，但不好好的打理自己的身體，又要每天令看到自己的人受罪才是萬惡‧

賣肉，不一定是衣服以下的肉身，其實賣的是整個人的包裝定位‧包裝好定位準，不大賣也必有小賺，怎樣計算都算是一種生存之道‧

唔好講我啦~

A：我聽聞呢，你又有新題材喎‧
B：咩呀~ 有咩新題材呀？嗰
A：朋友丙話你會講我嘛‧
B：吓？我啲對話通常都係 ABC 咋喎，無話講邊個架喎，人地問都唔會答架喎‧只係有啲人成日係度自己不停咁對號入座，死都話係講佢之嘛‧
A：個個都以為係話我啦‧
B：錯啦喎，係有啲人死唔執輸咁係度隱喻明示咁話係佢自己咋喎‧
A：我講唔講呀，啲人都係話係我架‧
B：唓~ 咁有啲人都會口口聲聲就話自己好低調，其實內心就係最想多人識最多人講架啦‧
A：邊係呢，我就真係唔想咁紅呀‧
B：紅？你個面成個馬騮屎忽咁咪夠紅囉‧如果以我個 BLOG 做統計，每日都係得百幾個人入來，減埋啲一日入幾次既，都係得番幾十個‧咁，你覺得，就算比我講，呢個人有得幾紅呢？
A：咁仲唔夠呀？最好無人識得我添呀‧
B：你想無人識既話，咁你咪唔好寫 BLOG 囉，唔好識新朋友囉，唔好有咁多 best friends 囉‧不過去到飲酒場，都只係得你一個可以識哂成個場既人呀‧
A：唓~ 識開架嘛，你估我想識咁多人架咩‧
B：哦~ 既然你都唔想咁多人識得你，咁我以後有咩新朋友都唔介紹比你囉‧
A：咁又唔好，我都想睇下有無啲新朋友可以發展吓架嘛‧
B：啍，咪又係口是心非‧
A：咁~ 你係咪會寫我啫？
B：寫你？我幾時話過會寫你呢~ 講左咁耐都係你自己話我要寫你咋喎，你又想搶 spotlight 呀‧

注：以上並非單一次的對話，是經歷多番談話以後總結輯錄而成的‧

還是要直幕

無聊之下，玩改編歌詞‧第一首獻上的，是改自陳綺貞的 "還是會寂寞"‧

作曲：陳綺貞

早已忘了承認的滋味是什麼
因為每分每秒被害怕佔據在心中
我的一舉一動牽扯到我生活的群眾
誰能告訴我跑出去的我會有多自由

也曾想過躲進異人溫暖的懷中
可是這麼一來就一點意義也沒有
我的驚恐擔心一直不斷提醒著我
沒有幕的我最怕人亂看
還是要直幕

我定要小心翼翼　不讓人看透我
帶著它勇敢的走下去　別勸我回心轉意
我不要人家看穿我　看著我隔著幕
真直哦

文雀

A：你地睇左文雀未呀？
B：睇左啦‧
A：好唔好睇呀？
B：麻麻啦，不過好似拼拼湊湊而成咁囉‧
A：係咩，我覺得個女主角好似好型咁呀，所以都幾想睇架‧
B：不過都唔啱你睇架，都唔係愛情片‧
A：我都會睇非愛情片架‧
B：不過無要緊，你咪即場幫隔離個男人 "聞雀" 囉，咁戲外咪係套愛情片囉‧
A：點呀~ 呢套唔係愛情片啦，係咸片呀‧

七一遊行

沒有口號，沒有反對之聲，這只是遊船河之行‧

財哥生晨，火爐姥姥知他喜歡出海喜歡駛船，為他攪了這次出海‧租了一只小小但美麗的遊艇，九男女的出海去‧

原本都擔心天氣的問題，這去數星期都只見家中的爛牆，不見陽光，但幸好今天出海陽光充沛‧今天把皮膚曬得亮麗，整個下午的喝酒和爛笑話，吃得很飽和水泡得好玩‧

如想看相片，自行四處找找看囉...

退休

最近跟不同的朋友飯餐
都不其然說起退休的話題
有朋友說大約多做五年工作
便夠錢可以退下火線
過自己的生活

另一場合
亦有朋友說
自已己經退休了許多年囉
現在只是其他人攪生意
自己夾一份
其實吹水多於動手工作
我覺得好像不太安全
但生活得好便行了

也有朋友說
一生人都只是做過一份正職
其他時間到現在
都只是做自由業
好像很快活
但兩餐不繼時
不知如何是好

見到現在住的屋
好想將來可以買兩三間房屋
可以收租過活
老了也不怕沒收入
還是要多儲點錢...

檸皮

A：玩骰鐘囉~
B：好呀，輸左要飲半杯架
A：唓~ 唔公平喎，你飲檸樂‧
B：咩呀，我都未飲完，一定我輸既咩‧
A：好，我就睇下你點衰法‧
.........
A：睇吓，咪又係你輸哂‧你呀，開始要食檸檬呀，要連皮食呀‧
B：吓~~ 連皮食？
A：咩呀，鬼叫你輸呀，又唔叫野飲‧
B：哇~ 唔得架喎，啲皮咁污糟‧
A：點呀~ 你成杯檸樂都飲哂啦，咁都唔怕污糟，反而話驚啲皮污糟‧
B：咁... 呀...

雜碎

哭牆
雨下了數個期，連我的家也糟映‧到現在，水仍是有入屋，但已經由缺堤變成了小小的滲漏，牆身長期見到數條淚痕‧到現在都還沒有甚麼辦法，等立案法團看看是否大廈維修，那便可以省點搭棚費用‧如果當年老爸不加建，真的又可以省下一筆，錢不是最重要，我最怕的是煩‧想到將來動工時的滿屋滿目瘡痍，頭痛‧

難得好天氣
數天以來，天氣好得出奇，雖然有點過熱，但都總是藍天無雲‧星期天總算去了海灘，為了不會燒焦，所以朋友們便約了九時便到了銅鑼灣吃早餐，再到南灣‧十時許到達，已經很熱很猛陽火‧我們是是逗留到十二時半左右，但都已經燶了‧晚上做完了所有的護理，也有用濕毛巾放在肩上幫助散熱，但到今早仍然是有燙傷的感覺‧相信，脫皮一定的了，希望是薄薄的一層，不要像難看便成了‧

露
A：by the way，你真係好鬼 fit o者‧
B：你又知？
A：你放咁很大張相係卜到，係人都見到啦‧
B：但係無乜腹肌囉‧
A：你擺到明演野啦‧
B：我呢o的擺明係言若有憾心實喜之呀‧張相係朋友偷影架，佢影時我都唔知，有幾張架，全部都幾好睇~ 哈哈‧
A：囂啦你~ 等我都要勤力o的先‧
B：咩o者，仲可以見得吓人既時候，咪益吓街坊囉‧放得出嚟呀張相呀，咪就係要比人睇囉~
A：屌啦星‧

赤柱
嘩！原來我許多年都沒有去過赤柱了‧
酒吧食街 - 唔知
海旁徑 - 又唔知
美利樓 - 都唔知 (原址都唔知，搬了過來更加不知)
圖書館 - 都係唔知
有空是否要多出外一點？

爐邊夜話
火爐姥姥說我們對朋友挺涼薄，經常都聽到我們毫不客氣的責駡人家，現在是甚麼年代，每個人都應有自己的一套生活標準，幹嗎總是要人家跟我們的步履去做人云云‧她也說得對，但席間人們都喊怨的說有苦自己知‧

當然，這種大道理大家都明白，而我又是最奉行各人行自己的路的這套準則‧但看見許多故事聽見許多的說話，都會不其然的令人火起三丈‧無關痛癢的，給錢也不願多提半句，但既為朋友又是姊妹淘，便覺得總有點責任去提點‧自己說的話不一定是真理，但相信總有點參考價值‧也就是說，我的方法意見不一定行得通，但朋友現行的想法做法也不見得好到那裡去‧眼見如斯這般走下去，倒頭來還是沒甚麼好處，改改也許可能殺出一條血路‧

火爐姥姥當然不是省油燈的，半點鐘的時間，便叫智者找到根源所在‧原來人家不是要力竭聲嘶的痛心嫉首，一食桌的心靈雞湯可能才是良方‧有人辭官歸故里，有人漏夜趕科場，就看各人的做化囉‧
(唔明呀？唔緊要囉！)

粉絲襲地盆

嘩~~~
不得了~~~
我個地盆比人襲擊呀!!!
肥四既粉絲攻入我個卜呀!!!

今早係留言區
發現有人留言
呀 ANN 寫道 : I LOVE U F4
我諗呀 ANN 唔會去錯地方既
我個卜明明係四十一健
點會睇錯係 F4

點先~ 呀 F4
家下係咪擺明踩場先
睇清楚地方先好喎~
唔好係度宣洩主權喎

呀 F4
係咪你派人來攪事先
我同你無乜過節
又無係卜度講你
洗唔洗咁玩野先

不過都好
咁 F4 點都有多一個結婚既機會
做朋友既都會為佢高興
又好似黃生咁話
我們亦都為那一位對方的勇於
而鼓掌而動容

上帝保佑
阿門

注：今次係怪友列傳開始以來第一次開名‧原因係我有 F4 呢個其中一個怪友，因為引來狂蜂浪蝶作在此作愛的宣言‧所以不能不開名‧

懶忽

A：哇~ 仲未出門口呀，你一陣咪遲到呀吓‧
B：唔想郁嘛‧
A：妖~ LAZY BUTT‧
B：係呀，我係 LAZY BUTT，WANT TO FUCK，GO TO PUB，LET ME SUCK‧
A：點呀，爛唔爛啲呀？
B：咩呀，詩嚟架，我作架‧
A：咁~ 等我比個中文版你啦‧
B：吓，有咩？係邊呀？快0的比我睇吓‧
A：懶屎忽，好插得，去酒窟，比我吸‧
B：哇吓~ 好得喎~
A：咪同你既原裝咁一樣爛得交關‧不過都算做譯得幾好啦何‧哈哈‧

骯髒在那裡?

肥四剛寫了新網誌 "再看性與城"，在打回覆時，由於越寫越長篇，送禮倒不如自奉‧

他提到...
"朋友看完後都會問：換了是你，你會原諒 STEVE 嗎？很多朋友說都會原諒，只有我說不‧
我說：當大家再親熱的時候，就想起對方攪過其他人的身體，只覺難受及骯髒了‧NO NO NO！"

當然，各人都有自己的一套想法，也沒有甚麼批判成份，其實只是有些問題卻來了：
- 攪過其他人的身體，這便是骯髒？
- 只有自己的身體不骯髒？
- 其他人的身體都是骯髒？
- 大家一開始都沒有嫌對方攪過甚麼人，為甚麼一次胡攪便變成骯髒？
- 以前未一起前攪過其他人，這又是不是骯髒？
- 那對方跟你在一起，就變成潔淨？
- 對方跟你攪完便變潔淨，你有洗潔 "精"?
- 如果不再親熱，那便可以願諒嗎？
- 還是，實情是，去攪的為何是對方不是自己？

老實話，願諒是要用心去做既，加上自己有多愛對方‧英文是 for-give，是需要付出的，不是只看自己的感受的‧在適當的情況下學會原諒，把許多事情都放開一點，生活都會過得容易一點‧

請留言

A：你呀，叻就叻啦，但總係有啲野唔 MAKE SENSE 既‧
B：點呀？又想點呀‧
A：你呀，個電話都唔知開嚟做乜架，成日都唔聽架‧頭先打比你幾次都淨係係咁响呀‧
B：你打過比我咩？咦... 係喎‧
A：唔聽你就咪用電話啦‧
B：點知佢响啫，袋左係褲袋，聽唔到嘛‧
A：咁你就開大聲啲啦‧
B：我開埋個震盪器添架啦‧
A：吓，震都感覺唔到呀？
B：我條褲鬆嘛‧
A：咪話你下面鬆就真啦，你唔好袋係褲袋呀，因住成個褲袋攝左入去呀‧
B：鬆你老味呀‧
A：唔係既話，咁唔知係咪你脾罅啲神經線死哂囉，無哂感覺架啦‧係既話呢，唔該你用番電話繩掛係條項度啦‧唔好成日都唔知有電話嚟呀‧
B：咩喎~ 唔知有電話嚟又唔得‧
A：仲有呀，唔該你改左個留言信箱佢啦‧
B：又點呀‧左住你咩？
A：我一聽到就火都嚟埋啦‧又話自己唔會聽留言，跟住又自己個錄音又叫人 "請留言"，屌啦星丫‧
B：係咩？哈哈哈，我唔記得啦喎，唔洗咁勞氣喎‧哈哈...

太公報

原來早在去年己經有出版合訂本
我完全不知道
如有任何人仕見到
請速速話我知
我要儲番本
話比大家知
"肥婆四" 就係由這而來

黑五累

原本以為黑色星期五可以好好的過，因為天氣也算可以，起碼在辦公室沒有看到黑黑的天和大大的雨‧而且還有我近年心頭好台灣樂隊蘇打綠演唱會，一切應該不會太差‧

八時半開始，一唱便停不了下來，沒有說甚麼費話，不停的唱‧朋友們都說青峰真的是一個歌女，唱腔隱定交足功課，最長的說話時間應該是他鳴謝的一段，但不能不配服，攪氣氛也有一手‧雖然所有的說話相信都是編好了，但引得全場都有反應其實的確是難事‧全場都差不多站著三分二的時間，一起跳一起唱，香港沒多少個可以做得到‧站著跳著三句鐘，感覺有點累，但好戲在後頭‧

完場都差不多十二時，接到電話說紅雨，心一沉，知下一句不會是好事‧對！家中又變澤國‧想趕回家也不行，九展是個鬼地方，交通不便地鐵遠少的士行人路超窄，還沒有排得到上接駁巴士但身己全濕‧到了地鐵也過了尾班車，等的士又數量極少，終於要跑到某芋下村後才可以找到吉車‧鬼地方‧

澤國己在我回到家前清理好，原來洪峰高峰時，浸了三分一個門口位，幸好沒有浸到地毯‧但回到家時，水仍是不停的流流流，時快時慢，時而乾旱時而流水淙淙，挺有節奏‧看著牆，即時令人想起肥四的偶像 Leaking Cheng 的首本名曲 "三秒後便由旱土，改變做瀑布"‧但相信是過了子時，黑色星期五都已經過去，上天便放過我們這些蟻民一趟‧但我們不是神仙，不知如何是好，總不能一整晚面壁而睡‧最後，想出了一個方法，用透明封箱膠紙把白色膠枱布貼在雪白的牆上，再把白枱布小心收弄好一個漏斗形，再放進垃圾膠筒‧這樣，從牆身流出來水便會經過作為搭橋的透明封箱膠紙，流到膠枱布，再流入垃圾膠筒‧

看著自己的作品成功引流，安心下來，離遠一看，好一件裝置藝術‧雪白牆壁背上的水泡，像純潔外表內的敗絮‧流水的牆壁，給人聯想到在安隱中的不隱定，災難往往會在你不為意之時飄然而至，提醒我們要警醒，居安思危‧整潔的四周，卻夾雜著一個完全不合襯的無印垃圾筒，啟發我們思考的重要性，只要動腦筋，總會有方法的‧多謝~~

最後，黑色星期的完結以前，看到放在枱面的一叠信，其中一封是...... 屋宇署告知這層樓的業主，你的大廈已經被查，請你拆掉室內的非法建築‧DIULASING‧

p.s.：幸好，在這個黑色星期五，接了一張算作比較好的訂單‧數算一下，工作上總算還有一丁點兒的交代‧

不要離我太遠

A：唉~ 我有心事呀...
B：點呀，又有仔溝呀?
A：係俾仔溝呀... 佬嚟架喇... 但係一如以往，雖然年紀上係細過我幾個月，但係個樣就老過我...
B：得啦~ 你保養得好啦‧
A：呢個人呢，乎合左我幾樣要求，但係有啲要求就達唔到喇...
B：咩呢~ 毑形過你呀?
A：咁又唔係‧不過話時話，家下啲仔喎，個個都有少少架啦‧佢呀，有學歷喇，又唔係啲嘛毑煩既人啦，中文名又幾好聽咁‧
B：咁咪好囉‧
A：但係住得遠嗰下死呢‧唉，都唔知好唔好要囉....
B：做乜唔好要呀？你係諗住拍拖定係玩下先？
A：我諗佢係想拍拖卦‧我都唔知點呀，而家係個 critical moment，要俾signal 人喇‧
B：咁你想拍既原因係乜？同埋唔拍既原因又係乜先？
A：拍既原因係呢個人都唔錯既，拍得過‧唔拍既原因係... 唔~~ 諗緊~~ 人馬座應該同佢無乜緣份架喎...
B：吓~ 你信星座呀？眼見好多大纜都扯唔埋既，咪又行得幾好‧係事在人為既啫~
A：唔知係唔係信呀~ 或者係啦，我以前既有獅子雙子天秤白羊金牛，咁我諗我會係鐘意呢啲會多啲喎...
B：哦~ 咁所以咪全部都衰哂囉‧你係鐘意對方個人，定係佢既星座呀~
A：我知，但係佢住葵涌咁遠喎....
B：葵涌咁又點呢~ 你去佢度住呀？定係一定要去送外賣呀‧定係佢既生活只係係荃灣同葵涌呀？
A：佢公司係 quarry bay，不過遲吓會搬去沙田喎，咁要見我咪要過海囉‧
B：如係要見呀，你可以過下去，佢又可以去吓你度啦~ 你係鐘意個地方，定係個人架‧你用咁多外圍既野去衡量呢個人係咪可以拍既... 都好奇喎
A：外圍野都有佢既因素架嘛...
B：其實係睇你有幾鐘意既啫，到左唔鐘意呀，住係你隔離都都唔見啦~ 你睇下呀乜乜咪係個好例子囉‧
A：咁~ 好唔好上吓床再睇下點先呢何？
B：好‧
A：但係會唔會上過床之後... 發覺唔夾但係佢又會痴身架？
B：你呀，記唔記得你老本行做乜架‧係床度唔鐘意呀，咪扮吓啲四仔咁，等佢姦屍囉，咁叫人想唔即走都幾難呀‧
A：係啦... 你話做雞幾難呢何...
B：終於記得啦，仲以為你咁忘本添‧咁即係想點呢你~~
A：出多兩二三次街... 睇下有無機會上床啦....
B：係啦~

妙芝基金

在上一篇水災一文出街後，便收到一些朋友的問候，真的感受到人間有情‧其中在最後所提及的有關 "妙芝家園重建基金"，亦都立即收到有人問題可以怎麼捐款‧

在發佈文章的當晚，我便收到一封電郵，問及我那銀行戶口是否真的，如果是的話，他打算存入一點捐款，作為基金之用‧亦有朋友在 MSN 說要捐款，但又不想存入戶口，問我可以如何是好‧在此向各位善眾謝過‧至於這個基本的起原，在此作一個小小的解釋‧

話說多年以來，由於住唐樓，所以很多時都會開放給朋友們聚會的地方‧妙芝 (其實她是我家的一只小貓) 來了我家亦都己有七年了，性格活潑開朗，又不怕陌生，所以有朋友到來，她都會給大家作娛賓‧朋友們逗她，她會跟朋友們玩，就算十個八個人在談心，她也會在人群中轉，或坐在一旁聽我們談話‧最得人心的，就是她會不定時選擇不同的朋友坐在他們的大腿上休息休息‧

某一年的新年，又是一群人來到家中，玩著魚蝦蟹遊戲，嬴的朋友說抽水給我，我都推說不用‧剛巧那年我在年肖市場買了一個豬仔錢箱放在家中，所以便立即成立了 "妙芝疾病預防基金"，朋友們想捐助的，都可以放善款到錢箱內‧到了去年耶誕家攪派對，因全場都是自己的親密好友，所以只是要他們隨便放一些到基金內便可以了‧所以到現在，我都不知基金內有多少金額‧未到妙芝或是家中其他貓咪成員要看醫生，也不會動用基金的分毫‧

至於 "妙芝家園重建基金"，其實都只是自己口痕說說而已，並沒有想過真的會有朋友問及捐款事宜‧戶口的確是真的，但另外一些友人叫我不好公開，以免不知會否給不法之徒利用，所以最後都隱去了一個數字‧但始終都多謝大家對妙芝的關懷‧謝謝‧

P.S. : 如有其他朋友未知妙芝是何模樣，可以查看以下的標籤，應該有好些妙芝的相或錄像，及其前半生傳記的‧

找點

A：哇~ 我今日去睇醫生呢~ 撞番以前幫我睇嗰個靚仔醫生呀~
B：又邊個呀？你有邊個話唔靚架‧
A：你咪唔靚囉‧
B：哇吓~ 真係謝天謝地，見過哂你話靚嗰啲呀，真係無個得架‧係呢~ 咁點呢？
A：無呀~ 我咪問佢有無去去開嗰間 cafe 飲 coffee 囉，我話我搭左天地線架啦，佢去到就唔會收佢錢，會以我既名義請佢飲咖啡啦‧
B：咁佢點講呀？
A：佢咪話有呀，無收佢錢呀，多謝呀，咁囉~
B：哦~ 咁~ 你講呢件事既主旨係乜呢？
A：未講完呀，之後呢，我咪好開心咁 send 番個 SMS 比我個係嗰間 cafe 做既囡囡囉，話多謝佢囉，同埋見番呢個醫生好開心囉‧
B：都好，你仲識得咩野叫做基本既禮貌‧
A：仆你個街啦，我不知幾有教養呀‧咪嘈住啦~ 講埋先‧咁呢個囡囡 send 番個 SMS 比我呀，佢話呀 "PLEASE INVITE HIM TO HELP YOU TO FIND YOUR G-SPOT LA"‧
B：哈哈哈.... 你啲咩野囡囡呀，開口埋口就叫你搵 G 點既‧
A：點撚知喎~ 上次只係同佢講過一次話唔知有 G 點咋，咁就比佢講左一世啦‧
B：吓... 你唔知有 G 點... 唔係嘛... 你個人點呀...

Emotion

A：吓~ 唔知你睇完 "性與城"，有無啲咩野啟示呀？
B：你問有關於咩野啟示先？
A：咪好似呀某某咁話，啲 FUNCTION of lover 咁呢啲囉‧
B：咁就唔知喎，我唔係講 FUNCTION 架喎‧
A：哇吓~ 咁你講乜呢又？
B：我講 EMOTION 架‧
A：EMOTION？你啲 EMOTION 咁飄忽，你再係咁既 EMOTION 呀，你就真係好易變 "易 MO 唇" 呀‧
B：咩呀~ 咪 EMOTION 囉~
A：係 "容易發 MO 既陰唇" 呀‧
B：屌你啦~ 我有用 "哥士的" 洗架‧

水災

星期六的黑雨，給我多了一天的假期‧好就是好，但是麻煩事就在這天發生‧

星期六的早上，給關生拍醒說黑雨不用上班，但是家中卻漏水‧起來看看，去年中在室內加了防漏膜及重新掃漆的牆卻起了一個個的水泡，有其中一兩個更有水從小孔中發射出來，形成了三數條小噴泉‧小貓們見著，不是是興奮還是不安，在四周跳跳叫叫‧因為水不停的射出，地上己儲了一定份量的水‧沒辦法，只好立即的拿出用具剷水去，但心在擔心，水如此這般的漏水，要到何時才會停下來‧後來我們用剪刀把那些射水的水泡剪開，原是打算水會沿牆流下來，那便可以想另一些辦法將水接著，這便不用無了期的剷水了‧可是，世事往往不如人意，其中一個水泡內的裂縫，卻像一個小洞口‧水從缺口中射出來，就像尿尿一樣，牆壁射尿，真是奇觀‧

終於，雨慢了一來，我們總算鬆一口氣，之後便是研究為甚麼會是這樣‧相信謎底是，這一道牆連接著的加建的部份，加建部份上面便成了一個平台‧由於年代久遠，牆身便有了一些裂縫，但又由於我們的上層也有加建，上下層間便只是一道約一尺多點點的空隙，所以一般來說下雨都不會有太多水入到空隙內，如水沒到一定的位置也不會從裂縫中漏下來‧這一場大雨，卻差點便令我家變成澤國‧ 幸好，總算來得及做救援工作‧

雨天完了，卻發現上層還是有水在窗外不停的漏下來，給業主通電後，他說會找師父看看‧我順帶的跟他說，叫師父看看的家那加建部份可以做防漏工程，可行的話便一起做吧‧

水災後重建家園，刻不容緩，請捐助妙芝家園重建基金，多少無拘‧善款可以直交到林宅，或存到恒生戶口 232-X-003271‧妙芝在此多謝各位善眾，謝謝‧

好想要

晚上跟朋友去到二手店，原本有一只想買的，到最後都是放下來‧友人說既然沒有東西可買，倒不如去吃飯吧‧那我們便往門口方向走去‧那時，收錢的店員見我走近，便向我的招招手，我心想難到她以為我偷了剛在拿在手中的那只唱片，所以想看看我的袋子乎？

她：先生呀，先生‧
我：係~~
她：你呢，係咪上次那個想買只唱片，但係我地無標價，所以無得買那個呀？
我：吓？你話邊只呀？
她：那只陸家俊呀‧
我：Er... 係~~ 呀~~
她：我地標番個價啦，你仲要唔要呀？
我：Er... 九蚊咪買囉‧
她：哦~ 唔洗，五蚊啫‧
我：哦~ 咁一定買啦‧你又會記得係我既‧
她：我特登留番比你架，那以我見你好想買咁‧
我：Er... 係~~ 呀~~ 都想架‧
她：多謝五蚊啦‧
我：哦... 唔該哂你呀‧

出到門口，朋友笑了許久，說我己經給人家認得出來‧
專門買西碟的那一個‧
而且還要是 "好想買" 的那一個‧
真係醜到呢...

使用手冊

A：今次你又講邊個呀？
B：你咪理啦，多事‧
A：好彩唔係我啫，幾怕我會上榜呀‧
B：你想上榜之嘛，都不知幾易呀，我除時都可以有野講到你啦‧
A：咪攪我，我都不知幾想做個正常人呀‧不過咁，就算有呀，啲人點諗我都好，我都無所謂既‧
B：你呢啲呢... 就係口講話唔想紅... 但係又想紅嗰啲呀.... 哈哈‧
A：咩喎~ 我都無口不對心~ 我最口不對心既只係想要男人，但係扮唔要之嘛‧哈哈‧
B：嗱嗱嗱，認啦你‧
A：有時啦，我個人悶悶地，覺得有啲孤獨既時候都想有個男人陪吓既，但唔係成日想囉‧
B：哇~ 你當人係乜呀，悶悶地孤獨既時候先想要，要人做慰安呀...
A：哈‧我真係唔知愛人既 function 係乜呀‧
B：FUNCTION???
A：係呀，function of lover，你可以用來做新 blog 既題目呀‧哈哈‧
B：話明係愛人呀，愛呀！係要愛架，要付出架，咁先可以滿足到自己心靈上既空缺同不足呀... 愛人唔係只係要嚟使用呀...
A：嘩！咁發人心醒既‧用來愛？我未曾係呢方面滿足過，所以我真係幻想唔到係點既‧
B：所以你咪只係諗 lover 有乜 FUNCTION 囉~ 遲吓你可能有埋 "使用手冊" 添呀‧只係講 FUNCTION 既話，咪可能係陪行街睇戲食飯囉，有時仲可以滿足下性需要，一齊瞓就唔好 啦， 怕且你都會怕出汗呀‧但係 FUNCTION 無愛架喎...
A：哈哈‧正仆街！算啦，我諗我係有獨身恩賜架‧
B：獨身恩賜？！點呀，又係度扮唔要男人‧
A：陪行街睇戲食飯... 朋友都可以既，仲開心啲啦‧滿足下性需要... 唔... 啱呀，所以我覺得 lover既 function 咪只有呢啲囉‧
B : 真係唔怪之得你會用 FUNCTION 呢個字眼... 唉~
A : 我都想要男人既，但係無丫嘛‧所以咪要講有獨身既恩賜囉‧幾呀 Q 精神呀‧但有時我都會諗呀，冇得拍拖可不可以賴個天呀？係都幾好丫，哈哈，完全唔洗付責任
B : 你咪學多啲呀肥四咁囉，睇多啲 MV，反思吓囉‧DAY DAY 睇 DAY DAY 反思呀，包你有進步.

邪術門卷

A：喂，你係咪有朋友訂到奧運騎術比賽既門卷呀？可唔可以幫我訂呀？
B：預訂完左啦喎‧
A：無機會啦？
B：無啦，等開售啦‧
A：你知唔知幾時呀？可唔可以幫我買三張呀？
B：都未開始賣~ 我都唔知幾時有得買‧
A：即係都未知邊日有得賣？
B：唔知‧
A：又會咁既‧如果你知既話，可唔可以幫我買呢？
B：我真係唔知幾時呀，到時記得先得架~ 一係你留意吓網上既資料，有得買就話我知啦‧
A：可唔可以係網上買架？
B：我點知呀！
A：我諗都係要自己查吓，我自己買囉~ 仲諗住你地那邊比我係呢邊知得多0的添‧
B：點呀~ 又無廣告話幾時有得買，我又唔鐘意睇，亦都無打算睇，咁我點會知呀‧等如我問你呀娜姐幾時係加州開 SHOW，幾多錢係邊賣，你都未必會知啦~A：我知架，我呢邊好多細路呀，我跟到個 TREND 架‧一上網就知啦‧
B：頂~ 都話未知呀！無資料呀！無人知呀！

曲線與低收

跟智者談天，他又教曉了我兩個詞語，我問他為何用這些字，他只說 " 到 point 嘛，一睇就明"‧

曲綫宣傳 - 以反面說話自我賣廣告：
即是原本某產品的作用是甲，但卻用乙的反面方法去宣傳，因而得到巨大的回響‧又例如，某某人的基本性格人所共知是很被動的，卻自說成很主動或是扮得很主動，意圖以這反面舉動來自我宣傳，意圖而起好多 noise‧

低收演繹 - 越話越唔得的，其實就越想做：
如引用在人身上的話，可以說某些人有很高的道德水準，這樣不可做那樣不可做，這樣污那樣穢‧但好可能口越是不的，心就越恨要越想要‧

智者對於這些行徑，一律都被列為... "全都是山精樹妖的把戲"‧

我就試圖去想，我身邊有沒有這樣的朋友‧智者又有何所指？是不是內藏玄機？

返歸

A：嘩，乜你地舊時咁架？成日帶人返屋企架‧
B：出得來蒲呀，好多個都心靈空虛架啦，有邊個唔想夾番個番去過晚夜，況且又係自己住呀‧或者仲有機會睇吓有無得發展呢‧
A：嘩，咁點得架，隨便帶人返屋企，咁危險‧
B：吓？有乜咁危險呀，好多時都係咁架啦‧你驚人地劫財姦殺你咩‧
A：姦殺就應該唔會既，至怕係佢容乜易佢唔走架‧
B：點呀，係啦喎，人地唔返工唔洗見朋友唔洗食啦喎，一見到你就咁鐘意，頼死係你屋企乜都唔理只係見住你啦喎‧我地識咁多人呀，咁多年嚟呀，都只係得一個個案，第一晚帶左個人返屋企，之後就無再返過屋企瞓，十幾年都住埋一齊咋‧比你呀，恨都恨唔切啦‧
A：點知會唔會架‧就算係呀，咁人地咪知道我住係邊囉，容乜易呢個人第二時會無啦啦走上來我家襟我門鐘架‧
B：痴毑線~ 係既話呀，你就求之不得啦，至怕見光死，返到屋企開著燈，人地即刻走咋‧你咁驚呀，都唔知你點識人‧
A：咁識到人，都唔洗一定要同佢上床架，可以去吓街呀睇吓戲咁架嘛，唔係既咩？
B：係家下呢個世代，床上既溝通係成個 "識人" 既 "PACKAGE" 嚟架‧攪完一大輪去街睇戲談心，攪到好愛呀，到最後上到床先知完全唔夾既，咁咪仲死‧都真係唔知要定唔要好呀‧
A：係咩？我點知喎‧
B：又唔知..... 你仲有乜野係唔知架，一次過講哂佢....

留言

A：你咪再夜啲先覆我~ 我今日下午找你架‧
B：吓？你找過我咩？我唔知呀，找我做咩事呀？
A：家下無野啦‧
B：唓~ 但係你都知我家下都唔聽留言架啦‧
A：係啦喎，我咁得閒留意你有咩會做，有咩唔會做啦喎‧
B：我好似有話過唔聽留言架喎，因為我唔想聽咁多囉‧
A：點呀你，你最多咪聽到係個遺言信箱，你有咩損失丫‧
B：我耳仔唔係咁好呀，我咪唔想聽咁多野囉，所以咪唔聽囉‧
A： 你個人呀，睇演唱會又唔怕，聽唱片又唔怕，同人講八婆電話耐一耐都唔怕，但係又怕聽留言‧咁怕你不如唔好返工開會，唔好同朋友見面啦，全部都係要開口講野同聽人講野‧真係奇呀你‧
B：其實個電話台既留言功能好白痴，其他台一聽係無用既就可以刪除啦嘛，我嗰個就要聽完成個留言先可以刪除呀，煩到死‧我又怕啲人既留言長喎，同埋唔想用咁多耳仔，所以咪唔聽囉‧
A：咁呀，不如你取消左個信箱啦，仲叫人留言做乜喎，浪費對方既時間呀‧有急事搵你就死得人多啦‧
B：唓~ 係有緊要事呀，啲人都會再打比我啦，洗乜聽喎‧
A：頂~~ Diulasing...

小氣

A：最衰都係你啲朋友呀‧
B：做咩事咁嬲呀‧
A：佢地多口囉，揚哂出嚟話我比人話好屌，攪到我家下無得屌啦‧
B：吓？咁你啲長期屌友呢？
A：無啦，家下叫都無人嚟，不知幾慘呀‧都叫左唔好咁揚架啦‧
B：哎呀，咁我叫佢地以後都唔好再講囉，點知會攪到你咁‧
A：咪係~ 我又唔係叫佢地幫我宣傳，同埋又唔係想引佢地屌‧
B：咁咪好似啲生 BB 既女人咁，唔好同人講，怕驚個 BB 小氣呀‧哈哈‧
A：咩呀！咁你即係話我個閪小氣啦喎，頂你‧
B：我無講呀，你自己話架咋‧

丟調

人真變了‧從來都是有入無出的，到了這一陣子真的要丟了，真的沒地方可以放‧有朋友跟我說過，到一天我會丟掉唱片的話，我便真的變了‧

一直以來都是以儲唱片為樂，儲了當然會聽，但跟本無可能可以有時間去聽得完‧以為沒有下載，通常都是要自己掏腰包買下來，錄到盒帶中反覆的聽，所以到了現在許多八九十年代的歌曲都會熟識‧到了現在，除了可以下載，更可以叫朋友 msn 給我先聽為快，一切都變得不那麼珍而重之‧再加上，一知是否人老記憶力衰退，大部份的歌曲，無論放在電話記憶咭中聽多少次，都總好像不太入腦，記不起來‧

一個唱片袋，折了膠盒後可以放得下 280 只唱片，我家中己經有 11 個唱片袋，但都總了裝不完那可以買過沒完沒了的唱片‧但當然，我還沒有去計算那些 dvd ，書本或是黑膠‧身外物，總是那麼的多‧去年試過重新把書架唱片架移位，那時已放棄了十二個垃圾袋那麼多的書本‧前陣子，也找了一堆不會再放進唱盤的唱片出來送增朋友；今天再下一城，又再在唱片架中找出了數十只出來‧最後有一部份有人要了，剩下的等我哥哥來接收去‧

聽了這廿多年音樂，原來都最後剩下來的，都有一部份是從小聽到大的那些歌手樂隊，但新一批可以留下的真是為數也不算多‧被抽出來的，大部份我都可以說得出是否好聽，大約是甚麼類形，但撫心自問，這些都是不會再有機會放進唱盤的一群‧既然他們的歷史任務已經完結，也好應該傳給另一些人，希望他們可以有機會找到一個好歸宿，有緣遇上知音人‧

在中文區，除了那些我喜歡的唱片，最多的類別，便要數算那堆西歌唱片了‧老實說，西歌類別我真的不常聽，他們最主要的任務是有人客的時係用來娛賓‧還有的是，當有朋友問及或是想找某某西歌時，可以答我有‧

註：丟調，音為 "丟掉"，意為 "丟棄，音調"‧

梗哂頸

A：前兩日覆診呢，我同醫生講呢，話我條頸好梗，又瞓得唔好，唔知做乜事‧
B：咁佢話你乜呀‧
A：佢話我緊張囉，所以啲肌肉收緊，所以咪會令條頸好梗囉‧
B：咁佢有乜建議呀？
A：佢話開啲鎮靜劑比我食下喎，等我既肌肉可以放鬆吓，咁就可以好啲喎‧
B：哦~
A：不過我話，我唔會食鎮靜劑架，容乜易我會變左依賴藥物架，我唔要架‧
B：吓?!
A：咁個醫生話比另一種我食喎，唔同藥但係相同效用喎‧食左呢兩晚又真係好好瞓喎‧
B：另一種呀，咪又係嗰啲類似既野，唔通佢開中藥比你食咩，白痴~ 比些少藥你食呀，無啦啦你就會變左係依賴藥物呀，咁全人類都係依賴藥物，佢慌佢比一年藥你食咩?! 咁驚呀，你以後有咳咪飲咳藥水添呀，小心好似以前啲飛仔咁呀，上左癮不停咁飲呀，跟住係條街度失控呀，你估你家下食白粉咩‧
A：我點識喎~~
B：點呀~ 呢啲洗唔洗識呀，你諗下之後點樣令你自己放鬆好過啦‧

雀班

A：唉，我好唔開心呀‧
B：又點呢？
A：我今朝早去完曬太陽，只係曬左一陣咋，返到嚟就發現出左雀班呀‧
B：出雀班好多人都會有架啦，洗乜唔開心呀‧
A：梗係唔係啦，有雀班個人就唔靚啦‧
B：呀生，你個人呀，白到好似隻鬼咁呀，曬番黑啲咪好啲囉‧
A：但係有雀班囉，點算好喎‧
B：咁你咪唔好曬囉，做藝妓咁囉‧男人嚟架，白到咁呀，點見人呀‧黑啲咪 MAN 啲囉‧
A：唉，咁我以後都係唔去曬太陽啦，你地第時唔好再叫我去曬啦‧
B：你啲人真係麻毑煩呀，一係你就用 self tan 啦，不過小心大熱天時一路行街一路甩色呀‧
A：你啲咁既死人 MAN 精呀，淨係識得以為短髮黑咪蚊，咁先叫做 MAN 呀‧
B：咁等我睇下你留長髮白雪雪，成個藝妓咁又點樣扮 MAN 先呀吓‧

腳步浮浮

A：我諗我今日都唔知可唔可以出得嚟食飯啦‧
B：做咩呀？
A：我啱啱瞓醒晏覺，覺得好似腳步浮浮咁呀‧
B：吓，你又唔舒服呀？
A：係啦，唉~ 唔知做乜呢？
B：咁你睇下點啦，再唔係既咪去睇下醫生囉‧
A：呀，唔知係咪我未食野呢？我今日成日都未食過野呀‧
B：屌~ 梗係啦，你再唔食呀，唔只浮浮吓呀，死撚埋添呀‧
A：吓~ 係咩？我點知喎‧
B：唔知，試吓你咪知囉‧呢啲係常識呀，唔洗讀架，頂你‧
A：咁呀~ 我唔講住啦，我去食野先‧拜拜‧

福澤綿綿

多謝各方支持，褔仔丙丁己經一早派發完了‧

有一些是到了今天才寄出的，相信這一兩天都會收到‧

基本上有地址的我都有寄出，除非是電郵來得太遲‧

其中一個比較不好運的，要算是寫錯地址那一位，通知得太遲，想再寄給她也沒有了‧

很多人都問及如何給回郵費，會都只是數元而已，都沒打算收回‧如經過籌款箱，可以放下一些當作郵費也不錯‧

有人家問幹嗎要自己出錢作無聊事‧

其實，自己有能力去成就別人的快樂，也是一種幸福‧

祝大家聽過福曲，福澤綿綿，生活愉快‧

終極版

多年以來，許多人都說不喜歡 "東邪西毒"，說它不知所謂云云‧但我由一開始便很喜歡，將會有的終極版，就算無人去看，我都會入電影院看‧只是張小姐的一段戲，已經令我看了許多次‧


張：覺唔覺得佢好怪呀？都唔啋人既，成日粒聲都唔出，笑又唔笑吓‧明明個心想要，把口又唔肯講，係要你遞到埋去先肯愛‧初頭諗住由得佢，整整下費事就佢‧
梁：(獨白) 雖然我好鐘意佢，但係我一直都無比佢知，因為我知得唔到既永遠係最好既... 我好想知道比人鐘意既感覺係點樣既，結果我傷害左好多人‧
梁：我一直都以為你地會係埋一齊‧
張：佢都無話過鐘意我‧
梁：有啲野唔係一定要講出口既‧
張：我只係需要佢講一句說話之嘛，但係佢點都唔講，佢太肯定啦‧佢以為我一定會嫁比佢，點知我嫁左比佢呀哥‧係我地結婚嗰一晚，佢叫我跟佢走，但係我無做到‧點解要到得唔到既時候先至爭取，既然係咁，我唔會比佢得到‧
梁：(獨白) 如果感情係可以分勝負既，我唔知佢係咪贏，但係我好清楚，由一開始，我就知自己係輸既一個‧ .........
張：你知唔知，依家對我嚟講，乜野係最重要？
梁：如果我無估錯，應該係你個仔‧
張：.... 宜家我覺得乜野都無所謂‧以前我覺得嗰句說話好重要，依家我覺得有啲野講左出來就一生一世‧但依家諗諗下，講同唔講都無乜分別，因為有啲野係會變既... 我一路都以為自己係贏嗰個，直到有一日望住塊鏡，先知道我自己輸左‧係我最好既時候，最鐘意既人都唔係我身邊... 你話時間識得番轉頭你話幾好呢‧

我伴我閒談

一直都迷上漫畫，近幾天看完了阿拔的兩本漫畫書 "餐餐有餸加" 和 "我伴我閒談"，兩本都是說他自己還小的時候的家庭事‧一邊看一邊會想起，自己也曾經歷了許多和他差不多的事情‧在 "我伴我閒談" 的結尾，在經歷了很多事情以後，他對自己提問了一些問題，這些問題也是值得我們去反省和思考的‧










漫畫：我伴我閒談 - 阿拔 (三聯 2008) 作者連結

四叠開一

今年的生日，原本都是低調處理，但到後來都弄出數天的節目來‧

正日：
- 跟關生去看了一個電影
- 朋友甲約到尖咀吃日本菜
- 還認識了聞名己久的 "娃科類動物"
- 大家笑不停口的談了兩句鐘

翌日：
- 訂了兩圍枱等大家來祝壽
- 去年有神秘嘉賓，今年就有事先張揚的丙丁做回禮
- 開了五枝紅酒一枝白酒和數枝啤酒
- 食完十多人回我家繼續飲
- 再開了兩枝紅酒和一枝香檳
- 記得一項重要話題是，鬥氣寃家是否會最終在一起呢
- 有些人說我不停的講英語，但我記得好像無，我知大家在局我喝碎
- 收到好幾只丙丁做禮物，謝過大家
- 終於飲到三點幾，要扣喉才可以上床
- 出席朋友如下

同月同日又差啲同年生既滴拉 + 上海而回既神級劉姑 + 近來做左潛水村姑既妙藐媚


唔知係勵文定禮民既麗雯 + 變左做同學既肥吉 + 好襯色既黃先生


有留鬚既好少女 + 壯年版吳尊既戴先生 + 唔知佢邊忽臭既小臭


張相好淫但係好乖既基斯 + 真人靚過上鏡好多既偉文 + 有對級手波既斯人


少啲缺憾美就好完美既費利斯 + 攪手關生 + 肥妹變索女真人版既芙蓮


連埋我四個都係好靚好有智慧又好人品又識大體既梁勤 + 茉莉 + 歌妮


話自己係玉男既白人 + 手上有好多男人名單既偉媽 + 朋友甲聲稱佢係娃科類既威利


斯文溫柔細心既艾拔 + 轉行拍疑似相片既朋友甲

第三日：
- 公關女聯同朋友甲，太利利和黑白配替我補祝慶生
- 在大坑街邊食泰國菜，超正
- 食完節目就是到附近的龍鳳吧繼續的喝酒做其吧女生涯
- 原本只是六七人的，後來變了十多人，飲到四點才離開
- 可惜我沒有拍照
- 席間朋友甲跟藍朋友的閪歌 super jam 確實精彩
- 特別鳴謝藍朋友，雖然只識得我們其中數人，也跟我們開開心心飲一晚

第四日 / 第五日：
- 法國的安嘉倫同德國的麥斯克勤都來為我慶生高歌兩晚

繼續有來：
- 由於大坑萬子良不在港，己約星期六再飲
- 真的好忙，哈哈！