替你高興

十二月五日撒灰的日子
原本約好朋友在我家附近一同吃早餐
然後再去殯儀館拿骨灰
最後決定到佐敦地鐵附近
先會另一個朋友
再一同出發到紅磡拿骨灰

到達地鐵站找到了朋友
再看看有甚麼好吃的
因為澳洲牛奶公司太多人
所以決定除便的一間茶餐廳便可
在十字路口看看
就最近的這一間吧

入到這一家
感覺有點奇特
但又說不上甚麼的
看看餐牌
食物又不算稱心
點了食物後大家隨隨便便的談天

談著談著環顧四周
看到對面的一排椅子
很面熟
不知在那兒見過
忽然想起來了

這兒是我第一次跟他來吃東西的地方
當年第一跟他去看電影
佐敦一所老電影院
是張艾嘉的今天不回家
看過後便在這兒坐了一個下午
是帶領還是巧合
事情真的不可解釋

今天從收到朋友送過來旳一首新歌歌詞

這地太熱愛敵對並各自有堡壘
要為勝利拼命去作瞎眼跑腿
今天你已算責任完成贖了上世的罪
賀你全身的退

道別俗世的顧慮再不須掉眼淚
現在踏進遠方的天國裡
要住進新居

於聖地裡誰要上山涉水
從來沒失敗從來沒有不對
只知寬恕沒鬥爭沒有世界之最
沒有速度緩慢裡安睡無痛寄居

縱每晚會因你已別離心絞痛
總為你達到極快樂有甜蜜悸動

上五樓的快活

終於可以整整齊齊的有一個家
那些可埋不理的排序
由得他
那些夾雜在書本中的大量的塵
由得鐘點每星期的慢慢處理吧

記得以前舊居
我每天回到家中都頓感疲累
現在卻完全不同
有精神的聽音樂看書或是看電視
三千金都愛走到我跟前磨磨蹭蹭的
忽然
回家變成了每天最想做的事情

新居在五樓
他說過
我們搬到五樓
陳奕迅都在唱 "上五樓的快活"
我只笑他傻氣
是了.....
這只唱片不可或缺
就是這個家的主題唱片

花了十一年時間
多了經歷多了回憶
然後再回到出發點
重新再次上這五層樓
原來這兒都真的很不錯

作過的夢還倒背如流
只是有了不同的感受
不奢想去外太空
躲在被窩　等賴床的周末

我慶幸我走在一條　不完美的道路
認清我們　多渺小　多麼脆弱
刺眼的青春宣告沉默　換床頭燈一座
卻燙貼了　我蹉跎的　沿路旅程的顛簸

Falling

終於叫搬好屋
花了兩天將所有東西胡亂上架
但還要花更多的時間重新整理
都咪話唔煩

今晚用了一整個晚上
聽了四張唱片的時間
去弄好那個
不足廿呎的 walk-in closet
好整齊好整潔
人都開心好多
在新居聽 Maxi 真係好聽好多...

三個女經過三日的視察
基本上都適應了
不過都還未認得我回家時的腳步聲
可能再要多花一點時間

經過了幾十年整個廳都係物品的生活
現在的房間和廳
都是只有一點點東西
視野和心情都真的很不同
平靜和諧舒適的感覺
都同時得到
現在要想的
是要怎樣 display 我的漫畫...

那夜在舊居掉野

體力勞動搬搬搬
大屋搬細屋真係好辛苦
許多的都要恨心的丟掉
原來甚麼都可以放棄
除了那些
cd 黑膠 dvd 漫畫 vcd 流行書籍

己經搬了約八成
餘下的就希望星期六可以完成
如果夠時間收拾的話
應該可以星期五便先搬去住了
那可以多一點點的時間給貓兒習慣習慣

一路整理他的東西時
明白到真的不用在世留那麼多的足跡
收拾的人真的會將每一東西都仔細看看
不論是想人家知的
還是不願被打開的
都無一幸免

於是
我一邊的收拾
一邊將我自己從前所寫的
每一篇 記事 情感 感覺
全都掉進垃圾筒

Hallo Goodbye

你剩底要做既野真係煩到呢~~~
好彩我係金牛座，忍得到‧
Anyway，我會諗掂佢同攪掂哂既，放心‧
計計吓，原來今日先係 49，
好似過左五百年咁‧
朋友話，我又多左五百年功力，
我就快可以唔洗做妖精，
轉形成功做法海...

been a while since we said hi last time
how's your life and what's your new hairstyle
i've been walking round the world
collecting every key i see
but we're just no longer who we used to be

love is not a rope
it's more than a hope
all the wounds and pain
will go with the rain
when we meet again
only memories will remain

這麼近那麼遠...

tu es où???

路一直都在

全因為 donald 事件
一班朋友再聚起來
相熟的，新識的
都走在一起
使緊密的朋友圈一下子壯大起來

明天，星期五
一行十多人一同往台北跑一圈
是相聚是聯誼是散心
食飲食食飲食飲飲飲...

過後，便要搬屋
新屋新生活亦等我等得久了
新生活不知會是如何
但總是有期待有精彩的

沒有選擇的時候 不能選擇的時候
永遠向前 路一直都在

夢四

四點一
他們在家中
坐在自己的電腦位子前
穿的是平常在家中便服
甲的感覺是，他們己分手
乙回來看自己而已
是要回到自己地方的
甲盤算著，差不多是睡的時候了
就由得乙留多久也好吧
況且，這一直也是乙的家
但，睡前是否要像從前一樣
給乙一個昒呢？
回過頭
乙邊看電腦邊抽煙
甲說，幹嗎在這抽煙
屋內只有廚房可以抽哦，忘了嗎？
乙狼狽的轉過身，用手接過自己的煙灰

四點二
甲關上電腦預備洗澡去
看見滿地剛才掉下的紙屑
蹲下收拾收拾
何解的還有一條布，牢牢的貼在地板上
要用剷子來剷起來
乙坐在面前地上穿鞋子
像是預備離開
問，在幹嗎
甲說要睡前收拾收拾
但心裡盤算著，他要走了
要給他一個睡前的昒嗎？

四點三
甲的習慣
睡前要先去小解
半途中，乙走進洗手間
從後緊緊的抱著甲
說了一句很普通的家常話
甲轉過頭，跟乙深吻
吻後
乙像是要脫衣服去洗澡
忽然
感覺是在夢中，夢醒

時間約是三時四十五份

月亮說

己經一個月了，原來時間可以過得很慢‧
一個月，就像是一年‧
要說的話，不知說了多少遍，
重複重複的，自己都覺累‧
人家說重複幾十遍，麻木了，
感覺便何淡下來‧
原來，不是每件事都可以這樣的‧
看見自己的精神分裂狀態，
連自己都怕‧
精神上的 two faces，見過嗎？

庵內無人，主持未返，
總是會有點亂‧

感謝聽我

今天，新屋的家具都到齊了，
大部份買的都是當日跟他一同選好的‧
雖然全都是新的，
看著看著，還是有點唏噓，
每樣家具雖不是精挑細選，
但總有他們的特別目的‧
特別給他選的小枱子，
以便他可以一面看電視一面寫網誌，
倒頭來又是自己用吧‧

出事以後，現居的收拾行動便停了下來，
如今好應該是重新開始了‧
看見這麼多的東西要搬要處理，
心裡真的有點發毛，沒法子，慢慢來‧

朋友開始都來問我近況如何，
心情好點否？放心，一切仍可好‧
生活基本上都回復了軌道，
一切如常，只是身邊少了一個人吧‧
有時，我會留意家中三千金的動靜，
看看她們會否有些奇怪舉動，
好讓我知他有否回來探探我‧
不過，她們一點古怪都沒有‧
這也好，不再有甚麼留戀，
不論是以甚麼的形態存在，總也要往前走‧

Trois Couleurs: 'Bleu' finale

I just keep watching this for whole night....

夢二夢三

剛剛再看那個在喪禮上播的生平回顧，
終於可以一面看一面微笑‧
笑他的傻氣，笑他的怪相‧
我相信，他也會為我開心，
他也要我學會 let go‧

記得第二次夢見他是十多天前，
我跟一位朋友行街，
到了一坐商場，便說，
許久都沒有行過這個商場了，
要去看丙丁‧
他說，好呀，無問題，
咁我返屋企先囉‧
夢便醒了‧

昨晚第三次夢見他，
環境像是一個記招‧
很多人擁著他的出場，
他出來，先坐在台上的一個位子上，
之後有人再要他轉到旁邊的另一個位‧
他換轉坐，沒有不愉快的表情，
只是微笑，我就在他的身旁‧
可惜的是，他沒有跟我說一句話‧
但也不打緊，見他安然的，
這便很滿足了‧
或許他來跟我 show off，
告知我，在那邊的朋友，也很擁戴他呢‧

忽然之間

昨天是你的肉身在塵世的日子了，一切成灰‧
萬分不捨，但還有甚麼法子？
不知道，我最後送給你的東西收到沒有？
或許這是你最想要的，又或許，
你早己覺得這個東西都己經不重要的了‧
因為你還在世的期間，
我們都己經實實在在的實行‧

那個晚上，很多人都走來會一會你，
很好，因為你都在很多人心中留下一個位置‧
我那晚說，我們從悲傷出發，
但當走出這個門口的時候，大家便要重新振作‧
有時，我都做不到‧
每每想到你許多的小事情，淚便不其然的流‧
給我些小時間吧，會轉好的‧

我告訴過自己，過了火化的日子，
我便不會只是寫著的都是想跟你說的話，
這些話，我會私底下跟你說‧
放心，我們都不會忘記，
思憶只會沉澱，令我們不會易於情緒起伏，
但會發出微笑，因為我們真的曾經遇上，
亦有過一段快樂的日子‧
放心，我會一路小心的，不用掛念‧

頻率

他們說明天晚上是你的回魂日子，晚上的十時多到十二時多‧
我一直都沒有問沒有題，因為我不信個事情‧
我知你信了神，就是我們說的 "埋左堆"‧
我好深信你走了以後，上帝都己把你接走，
或許你現在就很舒適的看想我們在勞勞碌碌‧

知道了時日，我基本上不太開心的，
不知道的話，我還可以如常的生活，
即然知道了，跟本就不可以安心‧
傳統說是由牛頭馬面帶靈魂回來，
看看陽間的最後一面，想起都不覺得和平‧
原本打算跑出去跟朋友喝酒聊天，
但他們說要是真的回來便見不到了‧
我還是那個心態，要是你回來看看貓咪，
都會是和和平平的看看，
或許就連他貓咪們都擦覺不出你頻率，
那會有得限時限刻的呢‧

幾過一輪煩擾之後，兩個好友都說會過來找我，
他們都不信這一套，都說要為你找找你喜愛的音樂‧
這也好，大家有說有笑的，
多點朋友為你做一丁點的事宜，
還可以驅走那些奈何天傷懷日寂寞時‧

好天氣

就這樣的過了一星期，朋友叫我今晚早點睡，
或許會夢見你‧

由於你的事件，整整忙足了一個星期‧
除了上班，辦理有關事務以外，
還須要做好各樣當天的安排‧
幸好各方你的好友，或是我們共同的朋友都合作幫忙，
否則不知如是好‧

那天再買票去看了 "建國大業"，
就像是完成了你最後要跟我做的事‧
後來跟你爸爸談及這電影，
就正如你口中所說的，他真的很有學識‧
難怪你很敬重他‧

他們都怕我會崩潰，每天人人都輪著的陪住我，
或是跟我吃飯‧
心情漸漸的平伏了，要發生的都無可避免‧
我可以做的，就是為自己為朋友為親人為你，
好好的生活，至少都不要他們担心‧
沒有了你，他們都己經不好過，
再要他們担心，便是罪過了‧
這幾天睡很很安穩，也能吃多一點了，
最初數天，看見食物都有倒胃的感覺‧
我還不可病呢，後面要忙著的事多得很‧

富麟設堂時間

Donald 的後事基本上都安排好了...
14 日在紅磡世界殯儀館設靈堂, 沒有任可宗教儀式.
約在 7:45PM 有一個小小的追思會, 如有時間及方便的話, 可以到來見見他.
15 日上午上山火化.
如果大家有代為通知各方朋友, 請告知, 以便不用再重複通知.

按他的心願, 我們會以最簡單儀式進行.
請不要做任何花牌等東西, 相信他也不想我們浪費於不實際的事上.
帛金全數扣除開支後, 我們會全部捐到他有助養兒童的慈善機構.

小飛俠

第二天的晚上，總算還可以睡得一點點‧
在早晨的半夢半醒間，發了一個小夢‧

不知原因的要將三只千金一一的捉進房間，
趕了一只入房，第二只也順利的入房，
好了還有一只‧
在工作間找找，發現為何會還有兩只貓呢？
有一只我還是第一次見‧
再在書桌底下的那個小架子看看，
噢~ 合共有三只新的小貓在家中‧
兩只比較小，第三只灰灰的頭很肥‧
在夢中我走到沙發，你不知在看甚麼東西的‧
我跟你說...
喂喂喂~ 你來看看，有三只貓貓哦‧
你跟我一同走回書桌，伸頭看看‧
你說... 咦~ 是哦~ 不如將牠們一同收養囉‧
我說... 好哦‧
這樣，夢便醒了...

今天早上，金金一反常態的十二時玩她的玩具，
那是我在廚房，聽到她叫了三數聲，
之後便靜下來‧
我後來走到書桌，
見她心愛的玩具正正的放左我的書桌上，
我知道，她很鍚我，
把她心愛的玩具送給我‧

甚麼時候安頓好了，夢中給我說聲吧‧

Love Love Love

你知嗎，我今天收到的信息多得要緊‧
每個人給我的支持，都不只是因為我是他們的朋友，
其中也因為是你‧
在跟很多你的朋友談及你的事的時候，
雖然大家都不能接受，也極為傷感，
但共通點是，只要認識得你多些少的，
都會給你的正能量而感染‧
我記得以前有人給我講過，
每個人來到這世上都有上一些目的，
一些要做的事情，雖然自己也許都不會知道，
或許連自己都不會認同，
但我們每個人所做的，都相互影響著不同的人‧
我相信，你曾經到來，
除了燃亮了我，
也給許多人帶來不同的快樂，希望，正能‧
這你很喜歡的歌，雖然我不曉得歌詞意思，
但我聽著，便覺得你在身邊和唱著‧

下世紀再嬉戲

第一次見到你，是尖沙咀的酒樓‧
第一次跟你有接觸，應該是在 Circus‧
第一次跟你看的電影，是張艾嘉的 "今天不回家"‧
此後，你便住了下來，沒有再離開‧

最後跟你聽的，是安室奈美惠‧
最後跟你看的，是在家看國慶花車遊行‧
最後跟你到的，是我們每星期都去吃早餐的茶餐廳‧
最後跟你說的，是你告訴我買了票‧
此後，你便在我生命中消失‧

轉眼便十三個年前零三個多月‧
我便成了你生命中的最後‧
和你走完你生命的道路‧
我們還有很多東西還沒有完成‧
新居還沒有開始搬過去‧
你說要去巴塞隆納，我說要去巴黎‧
公司讓我去美國，我說等你一起才去‧
那天你還說笑下次要搬去 "天壐"‧
"建國大業" 我們還沒有看呢....

相信你自己也沒想，你這樣便走了‧
回家見到你最後的模樣，很安祥，
就像你平時睡著樣子‧
我為有安慰自己，這是你的福氣‧
除此以外，我還可以說甚麼呢‧
你的肉身離開了，但一定會住進我的心裡‧
直到我也離開的日子‧
不論我將來的日子如何，我都不會忘記‧
我從來都不會說永遠，
但我會永遠懷念你，富麟‧
過一些時日，天堂再會‧

下世紀再嬉戲 - 黃耀明

Don't Give Up

朋友剛問我有沒有 Kate Bush 的歌，他說第一次聽，像來自地獄的天使‧他要的是 Wuthering Heights，但我想起了這一首‧八十年代，令我聽到發呆的一首歌‧找了 video 跟大家分享，一個日蝕的太陽，兩個抱著唱了一首歌，一 take 過‧

在屋頂唱歌

A：間屋整好未呀？
B：差個廁所，下星期交樓喎‧
A：整成點呀？
B：上去睇過，都幾好丫，成間屋白嘥嘥咁囉‧
A：貴唔貴呀？
B：我就覺得貴囉，但啲朋友話好平喎‧不過，琴日都決定左整多樣野，應該係全屋至貴，但係又最無用既一樣野‧
A：咩野呀？咁得意既？
B：整一個門框，多謝 3850‧
A：吓？門框？3850 一個門框？做咩呀...
B：拉好哂電線，線好哂灰，我先諗到，不如拆埋度書房門囉‧
A：洗咩拆呀~ 度門好似都 OK 呀‧
B：諗住拆左會高啲，咁可以 "過得人"，同埋 "過得自己" 丫嘛‧
A：多謝喎~ 好爛呀大佬‧講啦!!!!
B：師父話，因為拉電線經過度門，門框貼牆部份唔好郁啦‧一係只係拆門拆氣窗，留番成個門框，順便油吓油就一毫子都唔收，不過門同氣窗中間有條木條，好肉酸囉‧
A：唔... 你可以坐上去唱歌囉‧
B：係呀~在屋頂唱歌呀，跟住跌撚死左呀.
A：嘻嘻~~~
B：一係呢，連條條木條都切埋，成個門框變左由地下上到天花‧師父幫我修吓，再加番個木框封左原本凹凹凸凸既門框，咁就成個整整齊齊好好睇啦‧不過就要收成三千八‧
A：算啦~ 咪整啦~ 差咁多錢‧
B：我原本都係咁諗，不過琴日上到去，越睇就越唔對路‧諗諗吓，是但啦~ 唔洗都洗左咁多，唔爭在‧佢都唔係料貴，主要都係人工費囉‧
A：真係有錢~~ 第時上去你真係要睇清楚呢個又貴又無用既框至得囉‧

只要信 不要問

A : 鄭四聖誕演唱會喎，會唔會睇呀?
B：諗吓先啦‧因為我諗緊新年去台灣呀‧
A：又去，做咩呀？有性活動你攪咩？
B：係 101 前面倒數囉，好似好開心咁‧你想不想去呀?
A：唔想‧係 101 前面倒數，請問有得幾開心呢？
B：係第二度過新年嘛，有新鮮感呀‧
A：係呀， 自己一丁友係 101 前面倒數呀‧無人無物呀，以為自己好開心呀‧跟住就可以扮寂寞女皇咁呀，係越熱鬧氣氛，才感覺到那份真正既孤獨呀‧跟住喊住咁話比人聽呀，我真係好開心呀‧
B：點止... 仲可以入台藉添呀‧有戶籍, 想住幾耐都得‧
A：住之嘛，唔洗入籍架，黑市都得‧
B：唓....

A：喂，我地星六跳樓嗎?
B：我唔跳樓，我唔想死住，更加唔想同你一齊去死‧你做咩呀？好厭世咩？
A：哎也，打錯字‧我係話跳舞呀‧
B：舞就跳，樓就唔跳‧
A：得啦~ 夠啦~ 我成日打錯字呀，隻手 out of control ‧
B：out of control 既唔只你隻手，仲有你個西，可能你近來難得多左人點擊，恭喜恭喜‧
A：係啦~ 希望越嚟越旺啦~


A：一陣去邊呀？
B：去旺角買書囉‧
A：咩呀~ 你讀書咩？
B：哦~ 買番啲法語習作書做吓囉‧讀左年半乜都唔識咁，同埋又上到中級，真係要開始練熟啲同記吓野囉‧
A：唓~ 你不嬲都係 hea hea 吓架啦，做咩無情情咁好心機要讀好佢呀‧
B：唔得呀，關生家下讀緊初級西班牙語，日日番到去就溫習，得閒就問我呢樣法文點講，嗰樣法文又點講‧我話哂都係讀先過佢，我唔可以比佢既西班牙語好過我既法語架嘛‧
A：點呀~ 你地兩條友呀~ 一個西語一個法語，世界四種最多人講既語言會識哂啦...
B：咁我地無聊丫嘛‧

A：呀師父呀~ 我諗諗吓呢，間書房想拆埋度門佢呀‧
B：哦無問題，咪拆囉‧不過咁，你既電線拉哂架啦喎，有幾絛線都係經呢個房門過既，如果拆埋框既話，可能會影响到條電線喉，咁要再整番佢，又要再封過牆線過灰，要計番錢喎‧
A：又錢呀... 咁...
B：一係咁啦，拆左度門同埋氣窗，留番個框，之後可以做番啲木邊裝飾圍框咁遮住成個門框，咁咪唔洗又重新整過呢忽牆囉，又唔洗好多錢‧
A：咁都好喎‧
B：或者，可以好似啲豪宅咁，做隻雕花拱門囉，咪會好靚囉‧
A：吓... 雕花拱門... 唔洗咁靚囉，咁既舊屋，圍框得啦....

查你的天使

A：哇~ 今日真係 lucky 呀‧
B：咩呀~ 咩呀~
A：我呢，係唱片舖搵到隻戴恩玲呀，好平‧
B：係？邊隻呀？
A：邊隻？唔係得一隻咋咩？
B：兩隻呀‧
A：噢~ 係 "查你的天使" 既 EP 囉‧
B：都好丫，好耐之前見過都要幾十蚊架喎‧
A：係呀，所以咪話我買得平囉‧不過，我搵你既目的，係另一件事‧
B： 咩呢？
A：有野益你呀‧
B：咩咩咩~~~
A：正野~ 沈魚呀！連大本書....
B：得~ 幾多錢？
A：兩蚊‧
B：即買， 唔該‧
A：好~~~

其實

A：你開始裝修未呀？
B：師父拿左野上去，今個星期開始攪囉‧有排玩‧
A：就快有新居啦，開心呀‧
B：哈哈~ 比錢出去仲開心呀‧
A：做人係咁架啦，無樣樣好晒既，得閒有錢換吓啲開心野都係好既‧
B：我就好似完全係 "UP" 套戲既兩公婆咁呀... 以前一直都唔係好儲錢，後嚟的地心肝儲吓啦，但係到左咁上下就一定自自然然有啲野要洗 Q 哂佢架‧以前己經用哂既唔講啦，今次原本見住呢排啲基金上緊，諗住可以上番之前水位啦，點都都係唔等得要拿出嚟用哂佢... 財散人安樂，幾好呀~~
A：其實你家下都唔洗求啲咩啦，有屋有感情，係希望搵多啲錢啦‧
B：係呀，要錢呀‧儲得幾多得幾多啦~ 其實最好可以錢搵錢咁，第時老左都唔洗咁愁‧
A：我以前曾經有一刻係銀行都有好多，不過最後都係無哂，家下由頭嚟過‧人生就係咁啦‧
B：我最多拿過幾十萬係手周街行，不過都唔係我既‧哈....
A：嗰時真係好衰吓架，除左家人之外，講得出既真係乜都無哂‧所以家吓有機會既我都會好好珍惜，工作家吓都 OK 啦，如果有個人一齊就幾完整囉‧
B：所以一直都覺得，發生咩野既都好，都係睇下自己點睇件事，好既咪真係會學識點樣珍惜囉~
A：係架，咩野都係自己既‧
B：我以前都因為好心做壞事，令家人無左一大筆錢，係就係唔開心，反而佢地無怪我‧之後咪知要好好咁對自己家下囉‧
A：我之前都係覺得衰到無人有，以為無希望架啦，不過忍過左嗰段時間就好番啲‧咪話丫，前年舊年你見到我都想死啦，不過而家又好番啲‧今日見到公司既產品都叫賣得吓，我都幾開心呀‧
B：無話好唔好既，都係自己會唔會 LET GO 啫，曉得睇開啲，個人點都會開心啲過日子既‧同埋識得知足咯，咁生活就真係好唔同啦~
A：呢個年紀先會好明白，高低一定有啦，衰時咪忍吓囉，好時又唔好咁癲‧
B：係啦~ 我地呢啲年紀，邊個未衰過丫... 真係未衰過既，比著我自己都驚，容乜易收尾架，咁仲慘‧
A：有啲人後生時真係未衰過架，所以到有大問題出現時唔識調節囉‧
B：係我地嚟睇，呢啲佢地就真係慘囉~ 不過佢自己又唔知點睇~~
A：我啲朋友都有幾個係咁‧
B：唉~ 真係只可以幫到就幫囉....

主人

A：今晚去左邊呀？
B：要帶妙芝睇醫生覆診呀‧
A：吓~ 又睇‧仲未好咩？
B：佢上次耳仔發炎嘛，食左兩個星期藥，今日去覆診囉‧
A：哦~ 咁點呀？
B：好番好多啦，不過都係要食多三個星期藥囉，同埋要洗耳仔‧
A：哇~ 洗耳仔呀，佢比唔比洗呀？
B：唓~ 咪次次都顛左囉，仲試過賴尿添呀‧
A：吓~ 我平時見佢係你家都好惡吓咁架喎，成日片其他兩隻既‧
B：係呀，佢咪係得個樣囉‧
A：咁都係食多三個星期啫‧
B：同埋同佢驗左血身體檢查，都叫做正常‧
A：哇吓~ 貓都有 BODY CHECK，你啲貓真係經貴‧
B：咁佢都九歲啦~ 老貓啦~ 驗吓都好應該既‧
A：你都老啦~ 咁你有無驗呀‧
B：你咪話喎，呢兩日心血來潮，叫人拿左份野睇吓要驗啲咩...
A：咁你要驗咩呀？
B：都係啲 STANDARD 野，再加多個 CANCER 囉‧
A：唔~ 都好既，買個安心‧
B：係呀~ TOUCH WOOD 講句，有啲野早啲知好過遲啲知‧
A：啋啋啋~~~
B：咩啫~ 我呢啲百無禁忌既‧
A：係係係... 咁祝你老如松柏呀吓‧
B：LASING... 身體健康好啦，老如松柏呢啲咁唔吉利利既野，留番比你好‧
A：哇~ 真係多乜謝喎... 哈哈哈...

下次遇到你

A：喂~ 我頭先同個仔講呢，我打算十月尾去吓寶島喎‧
B：係？你又去呀？
A：打算啫‧我有問可唔可以住係佢度呀‧
B：人地點答先‧
A：佢話無問題呀，不過我就話我可以瞓廳囉‧
B：真係慘呀‧明明之前仲係瞓主戈人房架，家下變左做廳長‧可悲呀！
A：無法啦，今時唔同往日囉‧不過住係人地度可以省番啲錢嘛‧
B，咁都係，不過咁，你可以借啲耳話入去用吓電腦呀，拿吓毛巾呀，唔知做啲咩呀‧再唔係咪扮飲醉左，叫唔醒囉，瞓得第一晚呀，唔通第二晚叫你番出去瞓咩‧
A：又係喎，你係有辦法既啫‧
B：啫~ 呢啲好似係個個都識既基本技能喎，好似係你無左之嘛‧
A：哎也，我點識得啫，都無人教過我‧
B：洗教既咩，低能架‧早知你一早係嗰邊做工，怕且咪可以坐正囉‧
A：我都想‧
B：不過佢屋企咁多人出出入入，你可以係廳瞓既時著剩幼帶背心同底褲，或者隨時有人叫你入房呢‧
A：係呀~ 輪住去唔同房好無呀‧
B：你就想啦~~
A：你去唔去啫‧
B：你都死既，你瞓主人房我都話可以做吓廳長，你瞓廳我自己住酒店咩‧
A：咁又係...
B：不過呀某某話想去南部喎，都係大約嗰段時間‧
A：都好喎，你同佢一齊嚟，咁咪可以一齊坐鐵路去南部囉‧
B：咁都得‧
A：我上次同啲朋友去呢，唔知做咩特價咁呀‧
B：吓，咁好~
A：係呀，不過我唔知幾多特價喎‧
B：你都白痴既，你個朋友識路數就話啫，我地自己去呀，咁無情情做咩會有特價呀？
A：係喎‧
B：或者你同個賣票員講，"喎姣娘哦，由味由他揸呀？"
A：係呀係呀... 你都可以話，"喎械 MAN 精哦，卓憾奶架，幾喎他揸啦‧"
B：好喎~ 你過得關，我都一定得...
A：哈哈哈哈....

適量運動與均衡飲食

A：喂~ 星期六有咩做呀？
B：咪又係咁，個個星期都係咁架啦‧
A：行丙丁店呀？叫埋我好喎，好耐無行過‧
B：都得，不過家下會夜左去‧
A：做咩呀？你不嬲都係三四點做完 GYM 就去架啦喎‧
B：係呀，不過呢個月開始多左一個節目，會同幾個朋友去左 GYM 上完堂先‧
A：哇吓~ 跳健身操呀？有無戴粉紅色 HEADBAND 呀？
B：頂~ 你好八十年代呀‧家下係上瑜珈架啦‧
A：係咩？乜你識做瑜珈既咩？
B：咩唔識呀，仲做得唔錯添‧我就快可以做到一字馬呀，擺隻腳係個頭後面呀咁架啦‧
A：簡單啲，係咪即係就快可以摺埋呀？
B：LASING... 係呀‧仲係當眾摺埋添呀‧
A：做咩做瑜珈既？你不嬲都只係舉架之嘛‧
B：我以前有做過成年架‧咁前排有幾個朋友話想一齊跳 STEP，咁我又見家下間 GYM 多左瑜珈堂，咪上埋囉‧橫掂我係 GYM 既上跳舞堂既卷有成八百幾張，我 "每星期，日日跳，可以跳足三年" 呀‧
A：哇~ 咁你家下一個星期上幾多堂呀？
B：星期一夜晚兩堂，星期六就同班朋友上拉筋，同埋跳舞，如果星期日得閒既話，咪上多兩堂 GOYA 2 囉‧
A：YOGA 2？難唔難呀？
B：OK 啦~ 我都叫做做到既，不過做完成身濕哂，同埋第二日成身痛囉‧
A：吓，會痛架...
B：要 HOLD 架嘛，仲幫我修身，同埋 FIRM 番啲 MUSCLE 呀‧
A：哇吓~ 你遲吓咪可以變 SLIM FIT 囉‧
B：咩呀，我不嬲都 SLIM FIT 架啦，我仲重左添‧哈哈哈...
A：咁好... 點呀，講咁耐，星期六幾多點呀？
B：你預六點啦‧
A：OKOK...

錢錢錢錢

A：咦~ 仲以為你放假添‧
B：咁多假咩，去同隻貓睇醫生呀‧
A：又睇？肥 BU 點呀？
B：今次唔係肥 BU 呀，係妙芝‧
A：吓~ 做咩呀~ 又輪到妙芝呀？
B：係呀，前兩日見佢耳仔紅哂，咪 BOOK 時間睇囉，醫生話佢細菌感染，要耳仔同食藥‧妙芝咁野性，煩死‧
A：哎呀~ 你間屋呀，變左風水唔好呀，隻隻貓都有事，快啲搬啦‧
B：唓~ 仲有排呀，我星期日先叫左我朋友嚟幫我睇吓間屋，比吓意見，先再畫圖報價‧
A：哇~ 洗唔洗咁煩呀？你唔係話是但油吓油就算啦咩？
B：諗諗吓，係整就整好啲，個人住得好啲嘛‧
A：咁都係~ 咁咪要洗錢囉‧
B：錢既野，點都要洗架啦~
A：你之前又屋企既事，啲貓又病，家下又整屋，仲好似有按揭喎‧
B：係呀，仲可能要去旅行添‧
A：你仲去旅行？你負擔得起咩？
B：哇吓~ 乜你咁睇我唔起呀~ 雖然係窮，用係適當既地方點都括到啲既‧無既話，你借唔借比我丫‧
A：ERRRRR... 講吓啫... 哈哈~~
B：哈哈咩啫~ 有無呀~ 你咁有錢...
A：我邊有丫... 哈哈~~
B：唓~ 洗乜閂後門丫‧我呢啲，最多咪人窮賣屎忽‧我呢啲金牛座，識得自己計數既‧
A：咁咪得囉~
B：係囉何~~ LUNCH~~ 再講~~

贈興

A：你好呀~
B：咩呀，我挭係好格，洗乜你提我呀，乜你好唔好咩...
A：唓~ 我都一定好格，講野一定係咁講架啦~ 唔通一拿地個電話就叫你仆街咩‧
B：唔好唔記得，仆街係正常稱呼，臭西係專稱呀！
A：係喎~ 點呀，臭西‧
B：唔~ 乖啦~
A：講啦~
B：星期日呀，你呀妹生日呀，正日呀，諗住約埋一齊食飯，你得唔得呀？
A：咦~ 佢星期日正日呀？我都唔知添，我仲約左佢幫我整些少屋既野‧
B：整屋？又整咩呀？
A：我另一邊收番嘛，諗住整好後會搬番去住，咁家下掉好哂啲垃圾囉，咪叫佢上去幫吓眼睇吓有邊啲電線可以唔要，同埋啲窗口入水位可以點整番佢‧
B：垃圾？你話掉哂？
A：係呀，叫人攪左成個上午呀‧
B：邊有掉哂呀，你都仲係度，就唔好話掉哂啦~ 咁大舊都未掉呀，個垃圾佬手尾唔好呀‧
A：唓~ 我叫住佢胡考掉喎呀~ 喎幾錢奶啦~
B：哦~ 比錢個垃圾佬呀...
A：械呀... 咁係呢... 呀妹今次又幾多歲生日呀‧
B：好似三十幾囉‧不過啲人不嬲都話我地無變樣架啦‧
A：你就真係無變啦，我就變靚左好多‧
B：吓~ 死野丫，教識左你比位你入添‧
A：嘻~~~~~~ 咁係邊食呀？
B：你地諗啦~ 我可能要星期日先返嚟，我要上大陸出差呀‧
A：哇吓~ 你家下時時都要上去做北姑喎‧
B：你都死既，我上到去就係陀地啦‧
A：.......
B：我家下諗緊呀，我聽日扮完靚毛幫啲 FANS 簽埋名先丫，定係點好~~
A：頂~ 洗唔洗著水著去會場呀？
B：都可以架‧
A：LASING 丫... 咁即係我預備好哂，到時話你知係邊就 OK 啦‧
B：係呀~ 我搓 MY BREAST 早啲返啦‧
A：你洗乜自己搓丫，上到去做陀地，經濟幾唔好呀，點都有些少人搓吓你個 BREAST 既‧
B：咩有啲呀，我有好多個 BREAST 架，啲人輪住嚟搓呀‧
A：傻啦，比人輪住嚟搓係你後生既時候架咋，咪懷緬過去啦‧你家下，最多咪係 TRY 賣 BREAST ONLY‧
B：咩賣賣聲咁難聽呀，我呢啲係為興趣架~
A：係係係... 你既興趣都真係得呢樣... 哈... 咁星期日食咩呀？
B：你地諗啦，唔好話去啲咩你地講嗰啲高級扒房呀吓~
A：嘻嘻~ 扒皇之王呀??!! 唔會~ 放心... 嘻嘻~~ 最多最 CHEAP 都去食通天啦~ 好無？
B：咁都算啦~ 咁你到時話我知啦‧
A：OK~ 星期日下午比電話你‧

打掃

A：咦~ 聽聞你朋友搬左啦喎~
B：係呀‧仲留左一大堆垃圾比我添‧
A：吓~ 垃圾？唔係交番間吉屋比你既咩？
B：佢話唔要啲傢俬，咁留番係度比我，睇下下手要唔要囉‧
A：哦~ 家具啫，下手唔要先至係垃圾‧
B：但係... 佢係連佢所有唔要既野都無掉過，佢只係帶左佢個人同埋佢要既野走咋，我要咩野都同佢掉哂佢囉‧
A：吓~ 咁都得... 不過都係叫人掉啫‧
B：哈哈~~ 你無見到間屋有幾恐怖咋，我一入到去其中一間房，嚇死人‧好似去左異形個 "鬥口" 咁呀‧
A：即係點呀？
B：非筆墨所能形容呀‧算啦~ 都叫左人掉哂囉，傢俬都掉埋囉‧
A：咦~ 咁唔係留番比下一手租客咩？
B：同屋企人傾好左，唔租出去囉，我會搬番過去住‧
A：乜大好多咩？
B：錯啦~ 大屋搬細屋呀，慘情！
A：咁你啲野點算呀，你咁多垃圾‧
B：未知呀‧到時候掉得咪掉囉‧同埋我都開始全程拆我既 CD 盒，同埋 DVD 盒囉，全線膠盒既變做老翻包裝呀‧
A：CD 喎，你啲命根喎，做哂老翻包裝，你咪唔會點拿嚟聽囉‧
B：無法啦，鬼叫會少左幾百呎咩‧無左半個廳呀‧
A：咁做咩搬過去喎？
B：咁嗰邊企理好多嘛，又唔雜，全部都係業主自住‧
A：咁幾時搬呀？
B：唓~ 無咁快啦~ 我又無錢比人做裝修，到我執得到，變得番間屋，咪話仲得人，只係可以放傢俬既，最快都要個兩月啦‧
A：哇~ 要咁耐？
B：又要清左啲積，又要剷少少牆，又要補吓啲外牆入水位，又要睇吓洗唔洗執吓電線，又要修番啲爆左既橫樑，又要油油，攪好哂仲要攪衞生，唔洗時間咩‧
A：咁多野既，又真係好似好煩喎‧
B：之後又要置番啲合適既家具呀物品呀，又要時間‧我仲要最後係自己慢慢一啲啲搬過去呀‧
A：做咩唔搵搬屋公司呀？
B：我太多野啦~ 一次過搬，會好亂，同埋會放唔到咁多野，所以只係會一啲啲咁搬囉‧
A：好煩架喎‧
B：煩架，不過我又唔急既‧
A：咁你家下住緊呢度呢？
B：睇下點，好價咪賣囉，唔好既咪到時先再算囉‧你要唔要丫，賣比你‧
A：哇~ 你間屋... 嗰楝樓...
B：咩呀，話哂都係有靚仔住過架，好值錢架‧
A：係咩？唔覺喎‧送比我都嫌煩呀，仲要花錢維修呀‧
B：TILL~~ 你係要既話，十三折賣比你‧
A：係呀，多謝喎~~~

一世我也要考試

A：喂~ 考完試未呀？
B：考完啦~ 衰撚哂呀‧
A：吓？咁慘呀~
B：係啦~ 諗住佢會出既題目又無喎，出哂啲動詞變位，我都唔識‧
A：吓~ 呢嚟好似係一開始就要讀架啦喎，咁都唔識‧
B：唔識咪唔識囉，我都無記到，平時都無特別溫‧
A：咁... 呢啲係你問題啫，你自己唔讀，咁無法格‧
B：我知，我都無話老師出得深‧基本上如果我平時有溫吓，同埋記哂啲書有講既最簡單個十幾個動詞，再加埋今次要考既嗰堆生字，咁就一定無問題既，仲會可以好高分添‧家下如果拉車邊可以合格都偷笑囉‧家下寄望寫野嗰三題可以攞多些少分數，咁合格機會都大啲‧
A：你覺得自己寫得好好咩？
B：唔係喎~ 不過應該點都有啲分咁囉，我用哂最簡單既野寫，應該未必會好多大錯‧
A：哦~ 咁祝你好運啦‧
B：我都想... 家下咁樣，我都唔知好唔好報中級課程好囉‧
A：乜你唔係讀哂架啦咩？
B：係呀‧原本係得個初級既，點知上一堂老師話最新開左個中級，只係呢個初級完在後三個星期就開始啦‧
A：如果係既話，咁又要讀幾耐呀？
B：又係三個課程，共年半...
A：嘩~ 又咁耐既...
B：係呀~ 不過唔讀既話，咁以後就未必會再讀囉，唔通又由 101 開始過咩‧
A：但係你又話會唔合格，咁點呀~
B：唓~ 唔合格咪由得佢囉，無 CERT 之嘛，又無話唔比報中級...
A：好心你啦~ 係讀就讀好佢啦，咪再報番考好佢囉，有張証書嘛‧
B：嘩~ 二千幾呀，又再讀過呀~ 好慘架~
A：咁話哂可以擺番張 CERT 嘛...
B：咁我自己溫番書都 OK 啦~
A：errrrr.....
B：睇下合唔合格先再講啦...

Robogeisha

我想問吓...
有無人知...
呢個...
係咪真係一套戲呢...??
好似好好睇哦~~

Mr. Cool

A：喂~ 你係咪想買呀古生隻唱片呀？
B：邊隻先？
A：呢~ Mr. Cool 呀!!!! 我上次話有兩個封面既呢，隻碟成本寫真集咁架‧
B：哇~ 要呀!!! 幾多錢先？
A：18 蚊!!! 全新!!! 仲有兩個封面任君選擇‧
B：哇吓~ 兩款都有呀？邊款好呀‧
A：是但啦~ 我上次問呀老闆，佢話封面唔同之嘛，有咩所謂喎‧
B：咁... 不如買哂兩款啦，上次呀蓮妹話佢以前好迷佢架，有佢做既封面都買齊架，咪送本比佢囉‧
A：都好喎‧咁買架啦喎~~
B：OKOK~~

五分鐘後......
A：哇~ 醜到呢....
B：咩呀咩呀...
A：我頭先呀，買呢兩隻唔同封面既碟呀，比人認得出我啦‧diulasing~~
B：你之前嚟開係熟客咋，人地咁多人出入，點會認得你喎‧
A：我呀，上次買既時候呀，我己經問左老闆呀，有咩唔同呀‧佢話應該係 封面唔同啫，所以咪認得我囉‧今次又買兩隻呀，都唔知下次去到人地會唔會比埋呀 Cool 先生既寫真呀，全套連簽名唱片問我要唔要添呀... 無 啦啦比人以為我係佢既粉絲呀，真係仆街呀‧
B：咩呀，咁你係有儲齊哂人地成套唱片架喎，你仲話另外有人比左佢以前本寫真集你添，你仲唔係 粉絲....
A：屌啦~~~~ 我係主攻爛歌架，佢夠爛呀，所以一定要儲呀‧
B：咁你星期六上跳舞堂帶隻碟比我地啦‧
A：好~~ 合共 36 蚊呀吓~~
B：得啦~

一小時後.....
A：哇~~~~
B：又點呀.....??
A：我只係可以比一只唱片你囉!!!
B：吓... 點解呀？
A：兩隻唔同相架!!!!
B：吓？真係??? 咁都得....
A：係呀!!!! 哈哈哈!!!! 下次你地嚟我家， 一定要睇吓呀，啲相作狀到呢~~~
B：好哦，一定要睇哦!!!
A：仲有呀... 我頭先返到家，我 search 左佢個 blog 睇... 好好睇呀.... 哈哈哈....
B：有幾好睇呀...??
A：佢真係好撚九唔搭八呀....
B：咩呀??
A：個個 entry，狗唔啦屁都放幾張情心照係度呀... 寫 MJ 放幾張佢既相，講七一又都有... 真係唔知做乜撚咁呀...
B：吓??? 咁得意???
A：係呀，仲要佢每日都有 entry 架‧
B：佢寫??? 我思疑佢咪又係叫人地代佢寫‧
A：都係丫~~ 幾有心呀~~
B：哇~~ 原來你真係佢既真心粉絲呀!!!!
A：By the way，佢既 blog 係無唱片 section 架，相信佢係唔想承認佢呢個過去‧
B：哇吓~ 咁真係要快要儲齊佢既唱片喎~ 絕版架啦喎~
A：係呀，你下次上去睇下仲有無另一本封面既，係就買埋佢啦!!!
B：好呀~~~

Hello Again~

A：你做咩封卜架？
B：咁一定有我既原因架啦‧
A：咁即係咩呢？請問‧
B：向外界供報咪係話自己又懶又無咩野寫，又唔想放係度好似孤兒仔咁無人理，又費事比人追交卜，咁咪封左佢囉‧
A：嘩~ 你以為你係邊位呀？比人追交卜，你估你個卜真係好多人睇咩‧
B：哈哈~~ 咁真係比人追交過嘛，雖然只係一兩次，咁點都可以叫做比人追交囉‧
A：OKOK~~ 多謝哂！咁... 其實實情係咩呢？
B：好多時，事實既真相都係好醜惡同埋估唔到既~~
A：咦~ 咁我好想知喎...
B：都話左係醜惡架咯，乜你認為我會話你知咩！
A：唓~ 好架勢咩... 既然咁醜惡呀，咁又做咩開番呢？
B：咁當然仲有其他既 hidden agenda 啦‧
A：吓？又有 hidden agenda？一個卜咋喎，洗唔洗好似咁複雜咁呀？
B：你唔明架啦~ 係成年人既世界，係會有好多其他人諗唔到既野架啦‧
A：咁做咩又 delete 哂以前啲文章呀？
B：唔想比人睇番囉‧
A：乜你覺得你既過去唔比得人睇咩？
B：我想重新開始，重新做人，我唔要回望我既過去，咁得唔得丫？八婆！
A：得得得... 咁你既過去，又將會係一個謎.....
B：IN-TER-EST-ING.........
A：羅蘭首歌，新收到架，有無聽過呀？
B：有呀，不過好似爭咁啲啫......

謎女皇 - 羅蘭

請善待生命

A：我真係唔可以再忍受啦‧
B：咩事呢？
A：我決定要將我隻貓送番 SPCA‧
B：吓！做咩呀？你養左好耐架啦喎‧
A：我日日番到屋企，佢都整跌哂啲野，我每日都要執過哂，但係之後第二日又係咁‧
B：咁貓既個性係咁架啦，有咩出奇喎‧
A：但係養左佢咁多年，一直以嚟，教又教過，鎖佢係籠做懲罰又試過，鬧又試過，打又試過，都係咁‧
B：喂~ 咁佢地係動物呀，如果佢地係明白你講乜呀，佢地就唔會係籠物啦‧
A：咁多年啦，仲改唔到---
B：唔通你想佢一聽到你嘈就識得改咩‧
A：我家下，唔理架啦，見一次打一次‧如果再唔交番比 SPCA，我一定會打死佢‧
B：你有無攪錯呀，佢係一只動物嚟架咋，你決定要收養佢既時候，你就係要為佢既生命作出承擔呀‧唔係打就可以令佢有好轉呀！從來無人可以保証你領養一只貓番去，佢一定係又可愛又聽話架，但係你領養得，你就要接受佢既好同唔好‧唔好既你就要睇下有咩方法可以令佢對你信任，同埋變番乖巧啲，打又點會有可能有用‧
A：但係都己經咁多年啦~ 點都會變，同埋會怕唔再做啦‧
B：呀腥，你明唔明架~ 佢有問題，或者唔信任你，或者對呢個家有咩唔高興，佢就會用行動表達出嚟架啦，例如整跌你野‧你打佢，佢又係唔高興，佢又係會再做番呢個行為，跟本就係一個循環，點會有改善架‧又或者我可以比個 ANIMAL PSYCHIC 你，你可以試下可唔可以同佢溝通到呢‧你養左咁多年貓，你知唔知要點做架？
A：我唔理得咁多，一係送佢走，一係就遲早比我打死‧
B：你都痴撚線既，就算你生個細路出嚟呀，你就担保佢一定係好乖好聽你話啦喎，都會有可能係會反叛啦，你又打死佢啦喎‧
A：唓~ 細路呀，係要唔聽話既，大左都會走啦‧
B：但係唔好唔記得，你隻貓係無得走架‧你跟本就只係要佢地好可愛好聽話‧
A：總之我就見一次打一次‧
B：好！既然你係咁諗既話，咁你就唔該聽日就送佢走‧如果只係得兩條路行既話，我情願你送佢去 SPCA，去到做高齡貓，比人一針拍死佢，好過日日咁比你咁肉體及精神虐待呀‧同埋，唔該你要尊重生命同善待生命呀，佢地生出嚟唔係要比人類虐待架‧你既然唔受得既，咁就一早唔好養啦，我亦都唔希望我既朋友當中係有一個會虐畜架‧同埋，唔該你以後都唔好再去收養，或者係再買呀，佢地唔係玩具呀，唔係話唔好玩就掉左佢架...

我真係越講越嬲，跟本講唔到落去‧幸好之後都找到另一個愛貓既朋友，叫佢再打比 A，有咩行動，一定要通知我地先‧

甲狀貓

近來係講屋企，就係講我隻貓，今次都唔例外‧

肥 bu 大大話話都好似有事幾個月，由農曆年到家下，都有三個月了‧上一次睇醫生，話佢可能皮膚問題，開了三個星期的抗生素，同埋有啲藥查下，希望可以控制病情‧三個星期過左，睇番成果，好似無乜好轉‧甩毛既繼續一忽忽咁，左邊好完到右邊，黑色點點一樣係仲有，一樣係唔跳‧與其等佢自己好，不如轉吓另一個醫生‧預約非牟利獸醫，原本以為以要等一個星期，點知隔一天便可以去看‧

去到，醫生聽過我講哂所有既病情，睇埋佢食過咩藥，再睇埋驗血報告，佢叫我不如再同佢驗吓內分泌啦‧況且我都有同醫生講，我都無隔離家中既其他兩只貓，但係那兩只貓一直都無事，所以我有感覺可能肥 bu 內在有問題‧基本上係驗甲狀腺同埋腎上腺兩種‧

晚黑去接回肥 bu，同埋睇報告‧醫生話只係驗左一種，因為驗完甲狀腺便知可能有問題‧一般是在 1-5 度數的，肥 bu 有 4.6 度，所以是比較高‧醫生話甲狀腺有問題，可以會影响肝腎功能，皮膚都可以出現問題，仲有係可以成日無乜精神咁，同埋會體重下降 (有啲似人既大頸泡，都係甲狀腺問題)‧醫生開了藥，先吃兩星期，且看情況有否好轉，再驗血，才可再對政下藥‧今次食三種藥，包括胃藥，抗生素同甲狀腺藥‧不過都好，今次有新發現，雖然未知呢個係唔係真相，但相信距離真相又邁進一步‧

埋單結算，醫生費連驗血連十四天藥，多謝 315 元‧佢地真係非牟利喎，如果係出面，一定又過千‧

雜碎 - 第一百四十七集

肥貓身體好似開始好轉，開始親近番人，又好似肥番小小‧究竟係咩事呢？仍然係一個迷‧係杜左虫？係食左消炎抗生素？係幫佢涼過幾次身？不過咩野事都好，佢好番啲就啦‧雖然未好得哂，但好左啲就己經好好，有進步嘛‧

呀爸每況越下，好多時都認唔到我囉‧野又唔多講，問廿句先答一句，眼又唔多開‧不過都好，每次都問佢有無咩唔舒服，佢都話無，起碼佢個人迷迷糊糊都唔覺辛苦或病，因而唔會有咩特別唔開心，都算係咁‧

我既生意差呀，點算好‧千祈唔好衰過舊年就好，都咪話唔担心，話哂我公司賣既都唔係必須品‧

今日去左排戲工作坊，大家一面排練，一面即興說故事一面做練習：
- 在一個假設的情況下，說一個你遺憾的故事
- 說一個你會在有年期限定的計劃
- 十樣你最想要做的事
- 係機場中，一些毫無關係的不同人物既對話

終於又要拆唱片膠盒囉‧今次不是將拆盒的唱片入一個個大個的 cd bag，今次是拆盒後，一張張完整的唱片連封面封底都一同入一個透明 polybag，之後再放回唱片架‧咁就可以省下多一些空間去放多一些唱片‧以後找唱片一定不放便的了，但空間有限，沒法子‧

前日發現唔見左隻 Loreena McKennitt 既上一只唱片 An Ancient Muse，頂~~ 點呀？唔知係咪借左比人呢？唉~~

點解曬左幾次太陽燈，都唔係好黑既.... 奇~

無線真係仲有無離譜啲呀，年年都係咁，金像奬既終身成就奬簫芳芳講野都 cut‧痴撚線！

完假

假期好快就結束，每一次長假期，都會諗吓有咩野事情要做妥，但倒頭來每次都係無一件事會完成‧

復活假期，原本打算可以處理一我家中既唱片，因為地方有限而且已經有好多要放係地面，所以打算找出某些已經出過好多唱片既歌手，將佢地既大部份可以拆盒既就拆盒，留番一兩只唔拆作為放置位置既標記‧好可惜，一隻都無做到‧

前後放左咁多日，做過咩呢？睇左電影節，去跟朋友食飯飲酒，做運動，探呀爸‧噢~ 原來只係得呢幾件事做過，人生真係多姿彩‧

前陣子有朋友問我，做乜呢期都唔更新既？係咪因為屋企既事呀？無言以對‧家事都係呀爸同貓咪問題，探呀爸就算日日去都唔要得幾多時間，病貓就只可以日日餵吓食藥同洗吓腳，兩樣都唔用得幾多時間，但就總係無乜心機去寫‧咪話寫，我近來番到家，電腦都唔開唱機唔開電視唔開，唔知做咩咁坐下呆吓又一晚‧

唔係唔開心，唔係無心情，只係乜都唔想做，乜都唔想郁‧唔知呢種算唔算係情緒病呢？不過咁，如果肥貓快快好番，或者病情明朗化，我諗我會好0的‧佢家下已經變番做瘦貓，成個肚腩無左‧慘‧

終極

看了 "東邪西毒" 的終極版‧

好多人都不喜歡他這一齣電影，說不悶不知要說些甚麼，但當年在電影院看過後，就己經很喜歡‧現在色彩艷麗了，故事脈絡清晰了，人物關係時序都明確了，但不知會否得到平反‧

其實故事主要都是一堆得不到所愛的人的大混戰，只要有過些微丁點的經歷，大可以對號入座，找尋合適自己的金句‧到最後都是感覺先行，劇情如何其實都不太重要‧

今日在看片途中，聽到張國榮說："你呢啲後生仔我都見得多，自己識些少功夫出嚟闖蕩江湖，就以為可以天下無敵(大意)...." 我偷偷的笑了出來‧我地睇後生，不論那一方面，都同出一徹‧

賣哂

近年因為有朋友可以比到唱片我，所以連帶我買新唱片既數目都下降左‧
你知啦~ 朋友送既，加係二手店買既，都佔左一大部份，邊得嚟咁多時間去買新既聽呢‧
所以家陣時，隨左真係一嚟心頭好，都唔會急住買全新‧
上一只好似已經係買 "安唐尼與約翰信" 既新唱片，或者係台灣既 "橙草"
同埋，你知啦，家下無論中文或者外語，都可能欠驚無神咁突然再出隻特別版，好嬲架嘛‧
上星期難得有心情，走去信和一心買吓新唱片，諗住買番隻碟聽吓睇下‧

叫做都幾愛既 "安妮蘭諾斯" 出新曲加精選，就算有齊全套佢既唱片都要買‧
唔單只有新曲，主要係佢既 DVD，16 首錄像 / 演唱會演出，唔收藏點得呢‧
去到，賣哂!!!! 頂~ 叫我下星期再嚟買過‧

既然一心要消費振興經濟，比多個機會佢啦‧
"白狄安德舜" 既個人專輯都出左兩只，其實我都無真係聽過，下載都無‧
朋友們都叫我聽番啦，特別係第二只，又慘又死又悲涼，我一定鐘意云云‧
好啦，買嚟試下‧又賣哂‧頂~~~
以前一直都見到佢放係當眼既地方，我話想買就乜都無‧
既然係咁，算~~~ 下次先‧
不過最後我都下載左，果然要買‧

我一直都無特別要買陳依臣既唱片，通常都係等到最後一版，再二手先買‧
上星期係地鐵見到佢既唱片封面，好得喎‧
到前兩日下載試聽左，呢隻應該係佢既唱片中，第一只我會全新買既碟‧
雖然應該都會有第二版，都應該係送 DVD，不過算啦，我都唔睇既‧

琴日同朋友講開，家下好似好多野聽，其實又真係聽少左‧
家下唔知點解，返到屋企連唱機都唔開‧
真係覺得有點兒悲涼‧

追加：剛收到朋友既電郵，只係得張相，真係呢~~~~

旺仔

以前返工無咁早，我朝朝早出門口前，開著電視，最鐘意係睇到旺旺既廣告，睇完真係令人精神抖擻‧家下返工返得早，無得睇，人都真係失落啲‧係你管找到一些我無睇過既廣告，好正!!! 仲可以有連貫性，真叻‧

我要強！


禮讓


受不了啦！


旺旺 Remix (呢個 remix 版，真係好好睇！我覺得首歌應該 plug 囉)


旺旺泡泡果凍 (仲有廣東話版喎)


祝大家長生旺旺!!!

慢慢等

成日望天打掛都唔係辦法，犯太歲在先，預左煩事一堆堆陸續有來，點都係要做好本份為上算‧

肥貓唔郁唔叫成個月仲以為佢厭世，醫生唔睇唔心安，睇左又無個講得出佢實質病情，一個唔好彩仲野埋皮膚病，攪到心力交碎‧自己做人就得過且過，對隻貓一生既承諾就比生命更大‧照顧自己都無咁好心機，日日早半個鐘起身幫佢又洗又揸藥膏，晚晚返到屋企再嚟多鑊，一日兩次‧同場加影人貓 talk，人講兩句貓喵一聲，唔知既以為精神病發，其實傾偈安慰都係希望佢心情轉好，快快重新做貓，上天保佑‧過左個幾星期雖然都仲未得跳嚟跳去，但係行得郁番多左就無乜問題‧開講有話 "love changes everything"，日日早課晚課仲勤力過做占咁洗，無功都有勞，成績總會有些少，病菌見咁好耐力，都比吓面退下火線，終於可以見到有些少毛毛慢慢生‧真係愛戰勝一切，不過漫漫長路仲有排玩‧

老年人就繼續係護老院頤養天年，前陣子得閒就痛吓比你睇，無法可施真係睇見心酸，諗緊幾時要送返醫院行最後一程‧點知覆診檢查先知係器官感染，並唔係家人諗既病情行得咁快‧停食止痛藥，改用消炎藥就好似變番精神爽利，總算謝天謝地‧雖然事實唔可以改變，但唔洗見住佢痛住咁過日子就己經係無上既祝福‧不過胡言亂語九唔搭八就繼續嚟，啼笑皆非最後都係得啖笑，做人都想係咁啫，糊塗過日子總好過太清醒，況且都行都最後關頭，迷迷糊糊咁過埋就最好不過‧返工時間一見阿姐打比我就知忽然又無厘頭問起我，開講都話久病無孝子，只好盡綿力講幾句無關痛癢話，雖然明知佢自己都唔知自己講緊乜，不過做得幾多得幾多‧

都咪話唔奇，入到人地樓下間屋就見住水不停咁滲，係自己間屋厠所用色粉試唔同地方，都確定唔到問題係邊，之後樓下仲話無再漏，開始乾添，一頭霧水都唔知發生乜事‧無漏還無漏，但都推算到問題所在，處理左佢都係好啲‧咪以為唔理唔理就可以無左件事，第時一野大大鑊，顧得個閪顧唔到個髻，喊都無謂‧都係嗰句，整少少，自己安樂人地開心‧

最終所有野都係等，貓等好，老年人就等人探，厠所就等報價等開工，自己就長期等出糧‧

煩事

好似話我今年唔知係犯太歲定係咩野，終之好似無乜幾多好事發生‧不過咁，以前都有睇過流年事話唔好既，攪到自己都唔開開心或者係担心‧但係好又係咁過，唔好又係咁過，所以都係唔好理咁多妙‧笑又係咁過，喊又係咁過，咁一定係笑住過好好多啦‧總之，公司唔炒我，生活還有點兒保障，咁我就謝天謝地囉‧點衰都好，都總會捱得過既‧舊年過左去就唔好講啦，就講番家下又要煩又要等解決既事....

長輩既情況都開始壞，醫生都係咁話... 等囉‧其實家下都己經過左最開頭醫生所講既時間，所以現在每日都係賺番嚟既‧不過，開始痛，有時見到佢痛又無能為力，都幾難受‧

屋宇署又寄左信嚟，話我呢棟大廈既外牆，全部都有石棉瓦簷蓬，要拆‧呢次好彩係成棟大廈都有事，唔洗我自己一個去攪，最起碼都可以叫業主立案法團既主席攪，我都係比錢而已‧但係成棟大廈咁搭棚，唔慌平‧

樓下話我既厠所漏水‧呢次雖然無去年有水入屋咁煩，但都係煩人，因為樓下條呀伯真係好煩人‧我到樓下睇吓，又真係幾嚴重，己經去到有兩行小水流係牆身係咁漏出嚟‧叫左朋友找搵左個相熟既化人睇過，都係話要用粉睇下係邊處出現問題先好整，否則容乜易整左都有唔妥就煩上加煩囉‧希望找到真正既因，同可以簡簡單單咁就可以攪好佢就好啦‧

前兩日忽然發現肥布既腳有一忽甩左毛，光光滑滑咁，又唔似係打架甩左啲毛，一睇就知係皮膚有問題‧心諗，死啦，佢做乜會咁既呢，一樣未完又另一樣，心痛呀‧約左醫生同佢再睇，醫生話應該係癬，但係要種過箘先可以用口服藥，但就要等兩個星期‧無法子，家下只好用住外用藥先，但係貓兒本身就成日舔自己既，查左無幾耐又比佢舔哂‧太空帽又戴唔到，佢次次唔洗一分鐘就可以整甩佢‧不過肥布比我地喝過幾次後就今晚無舔到，希望佢乖乖地就好囉‧星期二會再帶肥布去照 x-ray，雖然佢呢幾日都叫做有進展，但都係要照清楚其實佢既骨係咪無問題，求個安心‧仲有係，係醫生再同佢檢查條骨時，佢問我想唔想同佢做吓針炙，可以放鬆吓佢既肌肉，咁應該會好啲‧答應做，見住肥布比十幾枝針插住，加埋有通電流，佢又唔多郁，又唔痛，好神奇‧不過咁，佢做完針炙，又真係好似再好些少咁‧洗啲錢可以令佢好啲既，都係值得既‧

希望各煩事快快過去‧有朋友叫我去攝吓太歲喎，考慮考慮‧

肥布奇幻檔案

年廿九 - 肥布唔多郁，我上床瞓都唔跳上嚟，我出門口去街都無嚟送門‧關生估，係咪因為佢之前坐得近暖爐，燒左半邊眼眉，所以平衡力出現問題，因而唔開心呢‧無人識得貓語，無人知‧

年三十 - 情況繼續係咁，成日都係自己坐係地毯既角落，唔多郁‧晚黑同朋友食完飯，佢地嚟左坐一 陣，都話佢可能有病‧不過又無明顯既傷，唔知點算好，都係話睇下幾時有獸醫開門，同佢去睇下‧

年初一 - 我開始覺得佢真係有事，因為一味只係瞓係貓床上面，叫又唔多應，出去廚房食野又無嚟神氣咁‧好驚‧

年初二 - 情況繼續，但係見到佢有食有疴有飲水，但就係唔好似以前咁唔活躍‧一早就發短訊比各方好友，是日我家團拜取消，希望唔好太多人嚇到肥布‧並且打電話佢睇開既獸醫，有開‧約好明天去看醫生‧

年初三 - 帶肥布去睇醫生‧醫生檢查一大輪之後，都話唔知佢做咩，但係就內臟似乎無乜特別問題，所以無得好醫‧但係就話佢有牙石，等佢好啲既時候，最好就洗吓牙啦‧夜晚見佢又瞓係佢既床度，摸吓佢，同佢傾下偈啦，發覺摸佢既大脾同尾巴時都會一反常態，鬼叫同埋會咬我‧咬人對於肥布嚟講真係好少發生既事，所以覺得一定有事‧跟住仲發現佢行路時，條尾無力咁跌底哂，有時棟起一陣又會跌番底，仲見到佢好多時都係，一半棟起，後半節九十度咁同地面平衡添‧死火‧

年初四 - 問左朋友佢個貓睇開既醫生，打去約，即時有位就帶左肥布去睇‧檢查一大輪之後，醫生話好可能係 "乜盤乜炎" 咁喎，我都唔記得左個名‧即係係個脊骨內有發炎而引到有物體增生因而刺激到神經線，但呢個病係狗就多，貓就少見但有機會‧我問佢咁係咪都會影响到條尾架，因為佢既尾部咁樣，醫生都話會‧抽血驗左腎臟無問題，開左啲消炎藥比佢食，一日一滴食一個星期，仲要鎖係籠兩個星期，因為怕佢會四圍跳，影響康復‧好慘‧

年初五到年初十 - 食左一個星期藥，一路睇住佢既情況，又唔覺得佢特別好左‧但係就益左佢同埋妙芝金金，因為肥布要食藥，所以三隻野就日日都有罐頭食‧不過好彩肥布就精神左，個樣無咁病，有時都有行吓咁，但係都仲係無咁活躍‧由於真係唔知佢平時有無去飲水，所以夜冕黑就會用針管餵水比佢飲，飲多水好過飲得少，最多都係佢疴多啲尿‧不過一直都無鎖係籠，關生話佢咁乖，都無四圍走， 成日都係瞓，所以就唔好鎖‧因為以佢既身形，籠好細又無得行只係可以轉吓身，好可憐咁‧不過咁，一發現我開好味餅仔呢，佢既行動就同另兩只貓一樣咁快捷，一齊係咁搶住食，佢的而且確好為食‧

年十一到年十五 - 事件仲未完結，肥布都係無以前咁活潑，同埋都今時今日都係無好似以前咁跳上我張床同我瞓，又無跳上書枱瞓係枱面，或者行嚟行去‧呢兩日，我出門口返工時都會送我門，但係唔係好跳到上門口那張櫈上面‧見到佢跳過一次，但係又好似係好隱咁，唔知係滑定係佢既腳仲未係有番彈跳力‧如果過埋呢個星期都係咁，我都係會再同佢去睇多次醫生，要照 X 光都好啦，驗清楚咩野事，好過等佢係度吽‧

究竟肥布因為乜事而咁呢？真係無人知‧又無比人整到，貓兒打架又通常都唔關佢既事‧

係咪比妙芝咬到條尾？

係咪打架打到扭親？

係咪賓妹打掃時整到佢？

係咪自己跳上跳落時扭到隻腳？

定係忽然好似金金以前咁有情緒病？
抑或係忽然自己覺得己經係大貓，唔可以再好似細個咁，要穩重啲？

不過，我都係覺得，佢對腳有事，跳唔起‧

難受

難受，當自己要面對自己的過去的時候，真的很難受‧

話說老爸身體不甚好，思緒開始模糊，哥哥和姊姊決定要回鄉下一趟，收拾一下老爸的東西，和把門鎖好‧

經過了二個小時的收拾，四個人三個行理箱的搬回港‧

安頓好自己以後，打開要放在我家的行理箱看看，全是舊照片‧

看著看著，看見自己的以往，真的是...
.

..

...

....

.....

......
這一個我還可以，十多年前，還有一點點的青春，還算可口‧

.
..
...
....

.....

......
這個樣想點呢？家下我見到呢類朋友，我真係好想星甩佢個頭‧

.

..

...

....

.....

......

.......

........
看官，你有無想死既感覺？

舊歌

前兩天朋友飲酒，我告佑他近來自己拿回舊唱片出來聽，覺得都是舊時的好，和好像現在都再沒有這樣的組合出現了‧
他間我說的是誰，我答只是 4AD 時代的 TMC‧又或是從前的 Sigur Ros‧
朋友說都沒聽過，嚇得我‧
嚇的原因是友人跟我都差不多年代的人，也是聽得多不同類別的，故以為對方一定曉得‧
原來都是一廂情願‧
每個走的音樂路向都不同，一定有分岔‧
音樂道路原來走得很寂寞‧

This Mortal Coil - Song to the Siren


This Mortal Coil - I Come And Stand At Every Door
這不是原裝 MV，別人以日本動畫 "赤腳元" 剪成，但看得心寒‧