回去嗎?

舊老闆找我單獨晚飯，坐下不夠半個鐘便入正題問我會不會回去幫他。最後我也很明確的告訴他，在新公司似乎一切都來得比想像中的慢，但前路也似會對自己有更大的好處，所以我也不會想著回到舊巢去。還有的是，做人也是要有道義的，在我答應接受新的工作時，也已知將會是單打獨鬥很長的時間，但既已是承諾了，也應好好的給自己一個機會好好的繼續下去，好讓人看得起。雖然也知回巢人工可能也會再暴漲 30%，但情願賺少一點嬴得口碑，也不要做一個見利忘義的人。

舊公司沒有甚麼可以留戀，但開心的是老闆仍然看重我，認為自己是值得的還是最重要。雖然這也許是自己的一廂情願的想法，但至少過了這些時日，還是沒有一個比得上自己的人可以為他解決難關。拒絕別人的確是有一種難以言喻的快感，更何況面對著一堆鈔票。當然，明知接受後的代價更大，也可能最後也會被覺得不外如是，被老闆覺得錯要了回來。為了留下一個好印象，不論如何都是要回絕。始終，一般人的想法都會是得不到或失去的都會覺得是最好的。

來到這個年紀，似乎每一步都在絕了自己的後路，故此只可以一直向前。其實都只是，沒有啥甚麼可以輸，從哪個方向走都是一樣的吧了。

施主過主吧啦 (下)

K : 點呢... 個下集大結局
A : 始終... 我冇開口講，亦冇問
K : 咁跟住呢?
A : 見到面佢勁鍚我... 但我冇 kiss back ... 當我以為我對佢冇感覺既時候... 我又見到佢偷偷睇電話... 個一刻我又好難過。到底係咩感覺都己經唔太清楚... 哈!!! 但從第一日佢選擇放棄我，就應該要離開。不挽留!!! 況且佢叫我出黎都唔講… 咁算啦
K : 其實，你只須問一句咋喎... 你同你女朋友家下點呀? 幾好吖嘛?? 
A : 我過唔到... 又點會想知。我今日熄左電話... 打算放工先開返
K : 呢幾句其實只係自己話比自己知，佢已經唔係你架囉~ 同埋，佢一答話咁咁咁，咪即係有... 如無，佢就會反駁啦~
A : 唔想知... 心入面總覺得，佢己經出賣左我
K : 哦~~ 咁你自己決定放棄, 咁就得啦
A : 我覺得，如果佢係想返我身邊... 佢會見面第一句就講我知啦。咩叫 happy to see me 啫，it's a crap
K : 記得自己為何放棄，將來睇番，無論是如何結果，都是自己的決定... 最重要係，對得住自己
A : 冇錯，最重要係對得住自己
K : 成日都要講番轉頭，大家都要學既，就係唔好再帶任何不甘心，任何恨。記得所有都已過去，無左就係無左... 唯一可以做既，衷心祝人地幸福開心囉~
A : No。我冇咁大方得體... 我只希望消失，不再有任何聯繫。關心他人等於苦了自己
K : 恨也要動用真感情。不過都好左啦，之前仲話緊想繼續關心佢
A : 冇恨。一直都話我冇恨。我意思... 自己放下恨囉。
K : 我係話... 希望人地開心啫，你無必要再同佢有任何關連既... 亦都唔須要再有。既然一齊過愛過，你比唔到人地既，都想人地找到快樂既生活囉。我意思係，無必要甚麼 “你沒有好結果” 囉
A : 咁呢啲我都會，我都唔想佢衰，只係佢有沒有好結果我都無乜須要知囉。況且，好唔好都已經只係佢自己既選擇，跟我無關係
K : 叻!!!
A : 我尋日留意到一件事… 佢一直帶住既腳帶係佢同佢條女一齊買既，同我一齊既時候, 好刻意 keep clean
K : 咁又點呢…
A : 係佢  fb 都睇到佢應該帶左兩三年
K : 有關係嗎?
A : 尋日發現冇左囉，講完~
K : 咁即係點呢? 你好開心?
A : 都係個句... 佢同緊個個一齊, 可以同第二個 (即係我) 咁攬攬鍚鍚，其實呢啲男人都唔駛恨啦。我就算做正室亦唔難保佢係出面同第三個咁樣啦，所以... 都冇咩重要了~
K : 咁佢既腳帶無左, 又關咩事呢?
A : 哎, 咁我觀察入微, 係見到麻... 咪講下囉~ 同埋，朝仲有少少唔開心既
K : 實會既...
A : 一心諗住今朝早餐要食兩個腿蛋包加熱朱古力，結果美心冇得賣，只係買左三文治，都飽到上心口 K : 無人會即時無野既...
A : 飲左熱朱古力~~~~~~~~ 冇事了。哈。不過，係驚收到佢 msg, 所以不如熄電話，可以冷靜下~
K : BLOCK 一陣先囉~~ NO HARM
A : 我一直 keep 住同佢 msg 啲 histor。有人話要 delete 啦..我未做到
K : 我覺得, KEEP 唔 KEEP 都無咩所謂既。你可以 EMAIL 左去自己 MAILBOX，跟住咪 DELETE囉，咁叫做有個底.。過些時日，你想睇番，咁就會有不同既感覺... 可能話自己超 ON9 添... 又或者，跟本完全無心想睇添。每個人係不同既時候，都一定做好多 ON9 野架啦~
A : 哈 on9 的事極之多啦。不過，我冇後悔去愛，如果一段感情從來唔投入...咁就真係白過~
K : 唔投入既，只係叫做搵人陪啫，即係拍下散拖，或者係 fuck buddy... 不用提啦~
A : 嗯~
K : 放開，係一個好辛苦的一個學習過程...
A : 嗯，咁我都知。我更發現，千祈唔好急住搵一個去代替一個
K : 係架... 只會重覆地去犯相同既錯誤... 始終都要有啲時間比自己，諗下自己想要咩人咩關係咩既生活方式。之後再識到，咪慢慢睇清楚啱唔啱囉，啱先再諗啦。雖然無話百分百中奬，但起碼唔好行咁多寃枉路先吖
A : 係!!!
K : 家下雖然無左感情支柱，但多左自由先吖。有時諗下，雖然有失，但同時又有得既，相對格。有時都覺得梳乾架，見啱既玩又得 flirt 又得又唔洗負責任，最重要既係，唔會有傷心先啦
A : 唉，你地啲基佬就話易啫，我呢條路就行得有點攰，攰撚過上喜瑪拉雅山。哈… 
K : 你上過咩... ?
A : 搞撚錯呀... 你唔係唔知下麻…
K : 哦~ 果個4000 米就
A : 係 5416米呀，頂你

施主過主吧啦 (上)

A : 巴打我頼野，乜今日係中國情人節咩? 死啦，我約左佢，我唔想藕斷絲連。

K : 好似係元宵喎。無所謂啦，自己個心無野咪得囉。

A : 無野就呃你啦。死啦, 我唔想沉輪麻。都唔知佢想點。

K : 你唔係放低左啦咩? 人地有女啦，仲諗? 無女就話諗吓啫。

A : 唔知呀... 佢日日報告我知佢去邊做緊咩，成日都係話 alone，話自己一個人。我最近幾晚陪佢傾天光咁制，我唔知亦唔想去問佢條女啲野囉。

K : 你咪同佢講... 你講咁多野比我知做咩呢? 我地分左手架啦... 點解你唔同你條女講?... 又或者，無論你家下咩情況都好, 我都唔想知, 你比條生路我行啦~

A : 其實我地見左好多次, 我次次扮cool, 有次只係見左幾分鐘。仲有次佢無啦啦話幫我整電腦，一次陪佢去堔水土步買野

K : 算啦~ 或者佢想同時間兩個都可以擁有啫...

A : 咁衰..............? 今晚就知, 因為我會問清楚佢。大不了一拍兩散，send 比佢條女睇，我總是覺得條女為左爭而爭。

K : 其實, 都過左去啦，係唔係都不再重要。

A : 咁又係....

K : 人地都己經楝左... 你仲要問人地做咩唔楝你... 留番啲自尊比自己囉~~ 要做既野都做哂，咁就算架啦~

A : 唔係，我一定唔會問呢啲，我只係想知點解佢揀個條女，但又唔搵佢，又要嚟搵我。好明顯，佢地真係冇見過... 痴拿線。

K : 你話佢地一齊番，但無見過?

A : 一齊返係個晚佢生日，佢地一班朋友一齊慶祝，我估係醉左情況下影相囉。我都唔拿想知 !!!!!!!!!!!!!

K : 我係話，佢果日係咪同條舊女攪番，就以為可以一齊番囉~

A : No，係個八婆係佢 fb 貼相寫 happy birthday my love !! 我好嬲囉。

K : 吓??!! 咁都要嬲?? 講啫... 你要嬲既, 係咪要嬲條仔呢? 佢咁易就比人撩走左... 咁下次都可以架咋喎~

A : 我咪就係嬲佢咁拖泥帶水囉，所以我放棄佢囉。

K : 咁係你放棄架嘛, 係咪呢?

A : 我驚我心軟麻。

K : 但你之前講到，係佢同條女係番埋一齊...

A : 係呀 !! 睇相係麻 ~~

K : 即係無証實過...

A : 咁我點知佢地咁多野，我唔會問囉

K : 只係人地貼相，你就覺得係? 詳情即係點架… ? 佢地做過啲乜?

A : 睇見眼火爆。一班人出去飲野囉。我當時係大陸呀，咁佢咪問我幾時返，我話 2/14。咁我就話我係 fb 見到 you got your biggest bday gift this year la !!

K : 咁跟住呢?

A : 唔知呀.... 佢話我知佢新年個個星期冇食過晏… 我先上去比部電腦佢整同買野比佢食。新年前我係見過佢一次，見左幾分鐘我就好型咁 bye bye，走左囉。仲有次係佢屋企，佢無啦啦攬埋黎話 so happy to see you，跟住想鍚。我好大聲 NO 囉。佢幾次攬同鍚我都唔比，佢仲問點解。

K : 咁即係，佢都一直唔知你唔鐘意佢同條女影張相...

A : 唔知架。

K : 咁…

A : 但佢miss 我，我好表明 話 you chose her not me so i hv to move it on la

K : 嘿… 成套戲好似你自導自演，仲要得自己一個觀眾

A : 吓......? 我淨係知，佢呢幾晚都唔瞓纏鬼住我... 我一向都瞓得唔好，呢幾晚我同佢 whatsapp 係十二點 / 三點 / 四點 / 五點… 就嚟癲。所以今日出去見佢，佢講左好多次，我唔肯出。佢最衰就係, 以前拍拖唔會時時刻刻話我知佢去邊做緊咩... 次次我唔睬佢，佢就會24小時不停播放。

K : 呀小姐.... 佢放唔底個 ex 係一件事... 後嚟佢同個 ex 生日影張相因而你要同佢分手又係另一件事... 你係頂唔順佢同條女影相，但又唔講明原因，無人知你相點架喎... 咁同啲港女有咩分別? 識左就唔可以見其他女仔朋友, 更莫話舊情人.... 咁人地或者只係大團唱 k 呢?? 咁你自己一個玩哂啦喎。

A : NO... fb 都寫 in relationship with that bitch la !!  我都唔知佢地有冇係返埋一齊................. 佢都冇否認

K : 如果你係有咁多恨既，你咪唔好理佢囉~ 為乜要恨呢? 如果你有真心鐘意過佢既，你都希望佢好好地啦~

A : 冇恨吖，我連問既勇氣都冇... 你明唔明....

K : 如果你已經放棄左佢咯，無必要帶住咁多以往憤怒同不甘過生活呢?

A : 咁係激氣吖麻，男人老狗拖泥帶水。係就係，唔係就唔係... 同人一齊就唔好再搵我。right? so simple, why make that complicate...

K : 無恨? 你自己問自己啦，我係你文字中只看到怨恨，同埋不停問點解囉...

A : 點解要話我知佢日日一個人喎，咪去搵佢條女囉，點解要搵我出街喎。

K : 如果你過唔到，你可以 block 佢囉，你可以唔理佢囉，你可以有好多方法去做囉~

A : 咁佢有責任架，問題唔係我度麻。

K : 你想知，但又唔自己求個明白。況且，過哂去架啦，不用問點解

A : 而家呀，佢日日報告行蹤我知呀

K : 你唔想見咪唔須要見囉，只apps 佢話，唔會見佢架啦~ then finished, that's it. WHY BOTHER?

A : 就係仲有一點情囉.... that's why bother lor. if feel nothing ..not even need to bring this conversation to you la

K : 有一點情又點呢? 事實係佢就係唔同你一齊啦，完左啦，無左架啦... WHY BOTHER?

A : 明~

K : 無就無架啦, 諗都無架啦~ 過左去架啦~ 為何仲要以以前既野去bother 自己呢?

A : 其實我本來冇架... 佢咁樣搵我先 bother

K : 家下佢同邊一個齊, 點解一齊, 點樣開始, 都已唔重要, 因為果個唔係你呀~

A : 今晚... 最後一次啦… 我會同佢講~ 就算佢想同返我一齊，我應該都接受唔到了... 我應該只係習慣對佢好啫... 過到既....

K : 如果你過唔到既，咪唔好理佢，block 佢 whatsapp 囉~

A : 但我唔block 佢囉 ...

K : 你都有信仰，上帝都會叫你原諒別人，就算條女係搶番去既，咁條仔比人搶得走既，即係唔係你架啦。唔係你既，明白放下咪算囉，你地點都係認識過， 都對對方好過，咁你咪送你既祝福比人地囉... 你的離開而令別人得到幸福，這即是一種福份，做緊好事呀~ 咁你明未呢?

A : 明呀~ 我都係希望可以同佢做返朋友... 話哂識左咁耐

K : 個個都係咁諗，但係越嚟越明白，朋友既野，唔係你話想做就做到既。緣盡既話，你點迫都做唔到架啦~ 放手啦~ 施主~ 放人一條生路，放自己一條生路啦~ 況且，你之前都有同我講架，散左啦，仲做咩朋友啫...

A : 我放架啦… 但係因為佢成日都好似好可憐，我唔忍心唔理佢

K : 好可憐... 好多人都好可憐既... 但人地無叫你要可憐佢呀!!!!!! 亦舒有講架 “愛一個人，老覺得他笨，非得處處照顧他不可”。每個人自己所要走既路都唔同, 你無得可憐佢架... 唯一可以做既，就係係佢須要幫助既時候先理佢囉，我唔係話物質，只係比番啲自信對方，其實已 OK... 記住，每個人既路都係自己行既路，無論你係佢邊個，你都唔可以幫得哂對方，如果對方心靈心理各方面都唔進步，你有再大既憐憫之心，都係無用囉

A : 所以我諗住今晚係出去同佢傾計，一直都想講呢個話題... 不過冇機會

K : Well... 總之，不要帶著恨，要有平常心同感謝，因為你地都曾幾何時，都一同行過一段路，都開心過，有人同你係某個時間比過快樂你，夠架啦... 每個人的出現，或事的發生，都總有原因既... 睇吓有咩啟示囉~

A : 本來好地地，忽然知今日係中國情人節就癲左。冷靜啲先得~~

K : 節日都只是日子，沒甚麼的，其實每一天都無有分別，無必要將一個前人訂下來的節日作為一個甚麼大不了的日子吧...

A : 嗯 :)

靈幻故事一則

福強以為積得福多就會有好報，真係又天真又儍。嫩口乳豬卷送到上門，唔食真係會受天譴，點知食完仲話成間客棧送埋比你，日日叫催你去交收，咁大隻甲乸隨街跳，呢個時候先識驚。人雖貪心，但點都要入深山品吓神靈睇吓係咪旺成咁。

神靈影都未見，但就撞正樹妖擺檔酬路費，話哂幾千年修行都唔係省油的燈，靈簽唔洗求隨口講兩句就已經話犯哂太歲，成張乳豬卷由設計到送出各戶各家的前世今生鉅細無遺一一娓娓道來。一邊聽一邊笑到唔停得口之餘仲要一額汗。窮家女扮上等人望有日可以嫁個有錢人故事聽得多，街邊廚餘為求上位望做酒席主菜就第一次見。魍魎小鬼又點鬥得過樹妖修為，咒語未念都已經打回原形，廚餘加人做色素擺得靚靚地就呃得吓普羅大眾。樹妖打算替天行道積點道行，反而福強就佛性忽起願將客棧合同退回了事，話哂都比番條路小鬼行都係福德，都望好彩佢地會改過成仙。

結局係福強諗番轉頭，其實都無咩所謂，有得食又夠包肚就當賺咗。

完。

後記 : 成個故事係九唔搭八，即興演出。

學習

下午回家便收到信，好像早了一點，打開信說是那個 Fitness Instructor 課程取錄了我。個個都說一定收的，但收信確認後，心裡又確實一點。申請的原因並不是為了要做 PT，既然有興趣自己做好些，如果要付款給那些 PT 幫自己，那又為何不將整套知識和技巧學會了。學會了都總會一生有用，又或是從來都不會知道，這個課程在將來又會帶給我甚麼的可能性。想得太多了，這只是給自己的另一個考驗和多學一點東西，又或是一個進步的機會。

因為收到了信，所以晚上便再為自己拍了一些照片。上次說要給自己有子彈肌鯊魚線，基本上都叫作做到了。子彈都叫作比較明顯，鯊魚線就還是差了一點點。看人家的相片看得多，羡慕也多，但從來都沒有想像過自己會練得到。雖然很多人都說比較瘦，又或者這並不是自己真正想要的，但都總算叫作做到了。既已是過了自己一關，也算作給自己有了一個交待，下一步便要試試能否再變一變形。其實自己最想的，是在這個基礎下加多 10-15 磅，全身厚厚肉肉的。但相信這個會是比瘦身塑形更加難。因為一個不少心，便會變成肥仔，所有線條盡失之餘還會加上肚腩。雖然自己都挺喜歡人家那些均勻有點圓潤的身驅，但偏好歸偏好，自己就不想自己是這個樣式了。

這些日子以來，嘗試以不同的方式去擺脫自己老氣的一面。轉身形換衣著為求可以令人感覺煥然一新，評語有好有壞，但都總算有試過。其實換了以後又會是另一個定形，要天天新款跟本是不可行，有時會想自己想要一個怎樣的自己? 老去是擋不了的事實，暮氣沉沉只會更壞，或許要記住一定要 young at heart，敢做敢言敢嘗再用心做好自己想做的事才是實際。現在數個不同層面的計劃己經開動，一定要每個好好的做完。

You will be good!!!

A : 你好呀，咁遲既。
B : 差不多啦，瞓醒先嚟得架。
A : 呀 C 係上面喎，佢都係嚟左無幾耐，我仲同佢傾左一陣，佢先上去。
B : 係呀??!! 佢點呀? 無咩野呀? 佢失戀完未呀?
A : 點會咁快呀!!! 佢都係月頭既事啫，不過佢都好似唔多大問題咁。
B : 哦~ 咁都好啲。咁你點呀? 佢有同我提過吓你啲事。
A : 我都 OK 啦，經過那次治療的告白，都已經無咩野囉。實情係咁既...
B : 哦~ 咁之後呢?
A : 唔知呀... 無 follow up 呀，可能以為我飲醉又亂講野又發顛掛，或者覺得我好煩掛。
B : 唔會既~ 我聽你講，我覺得你都係差呢一步啫。
A : 希望啦。原本都唔係咁計劃既，但係就人算不如天算囉~ 啲野忽然係咁湧嚟。
B : 話時話，你攪左幾耐呀?
A : More than half year.
B : Huh? Why it took so long?
A : I don't know，好多野我控制唔到既。
B : 我就同自己講過，我唔會比自己咁樣囉。
A : 咁你之前都係有過問題啦~ 過左啫...
B : 算啦~ OK 就得啦~~
A : 係啦!!! 你上去做啦!!! Lazy butt, you are getting fat!!!
B : I know!!! I know!!! I am fat!!!
A : I call you dinner later this week.
B : Alright!!!

後來，收到這個...
https://www.youtube.com/watch?v=bbMbdVVJytA
Take it easy and you will be good.

Walk On By

昨晚繼續有年初二的周年舊曲派對，時間雖是一瞬而過，但心力交瘁，回到家躺在床上時都已經差不多晨早五時了。應該很多以為我又飲醉酒，但其實一點都沒有。

雖然五時才睡，但仍然是九時多便醒來，既然像平時一樣不能繼續睡，那便立即起床去。可能是之前看了 "Wild" 的原故，忽然很想去行山。在吃早餐的時候上網找找有那些簡單又容易的路線，最後便決定由中環行上山頂。

記得很多很多年前跟兩位朋友行過一次，但那次他們都是亂行一些小路，所以我都不太清楚那次的路線。既是自己一個，那便按著網上所指示的路線行吧。一開始時便已覺得太多樓梯有點辛苦，但既已來到便一定堅持下去。關掉了音樂，也不一邊行一邊查看訊息，靜靜的看著路邊風景和跟自己自言自語，用心的聽聽自己說的話。又或是平靜下來，聽聽大自然要跟我說些甚麼。想到甚麼又或是收到甚麼心裡的聲音，便立即記下來，最後寫下的竟有兩頁紙。不知是否只是自說自話，但在大自然中步行真的是可以令人心靈平靜的。

到了山頂，原先是想再行去博扶林水塘的，誰知行錯了路，卻在山頂的步行徑上花了一個小時走了一圈後又回到起點，跟著便笑說自己走了那麼多的怨枉路卻沒有去到目的地。安定下來再細心看看地圖，原來入口卻是在山的另一邊。沿路上一直行，心情就更想繼續走下去。到了水塘的終點站，感覺還未夠，所以便一直走下去。最後，我由中環出發，上了山頂，再在山頂走了一圈步行徑，再由山頂走去博扶林水塘，跟著由水塘一直走到去香港仔魚市場。心只是想著一直走，I did not feel tired, I did not feel hungry, I talked to myself all the way but without thinking anything, I just let myself speak. I spoke to myself about the things I want, the feeling, the fear, the happiness... I walked and walked and just kept walking. After almost six hours of walking, I thought I should stop. 我在香港仔的海濱公園坐下，那才感覺到右腳腳面應該是在下山時拉傷了少許，但沒所謂，不嚴重。

在這個對我來說是一個奇怪的旅程當中，發現原來我住在這個城市幾十年了，但我從來都沒有認識過這個地方，更別說留意過任何當中景物。沒有拍任何照片，路中風景雖然擦身而過，但走過還是會記得的，如想再看還可以知它在那個地點。或許，下次再經過時也許完全不一樣的景況，但還是這個地方還是這個位置。

晚上一位朋友來了喝酒，一談又四小時。又是那些路邊風景的故事方式，過了便是了，就只是差一點點時間去明白原來風景已過，要看下一站的景況了。路邊風景能否變成一幅畫，要看修練，畫能否掛起來還是只是收藏，要看做化。昨天的那張畫，最後那一筆著筆還是肉緊了一點。不過都算是一個完結，可以收藏起來，補不補筆令它完美一點，且看天時地利人和。

係咪有病啫?

前兩天同幾個朋友去飲酒，席間有人忽然跟我說，叫我不好再減了，已經減到好乾好瘦。以前減了些少都還叫好看，現在的地步已經覺得我開始憔悴和覺得好老。還問我想去到甚麼目標，又或是自己想要的仔是否想要你這樣的身材? 問我究竟是心理問題還是生理問題? 雖然我知以她的角度她為我好，但她的說法我又不是太受落的。

基本上我是無言以對，自己又不是要想怎樣，但一直修身以來，總想將自己可以保持在某一狀態。已經努力在吃，但既是不長肉我都沒有法子。如果要怪我的話，那只好怪我的身體為何會是這樣。她叫我不可以再日日都去做了，一星期三天或四天，這樣下去是不行的。我的確不知自己想去到怎樣的地步，但每天做完都會覺得愉快一些。就算這只是一種執著，又或是心理病上的一種沉溺，人家怎看都沒所謂，況且又不用要跟別人交代，自己覺得愉快便可。況且有無人覺得好看與否，其實我覺得不太重要的。

昨晚跟另一朋友說這件事，他反而問我是否有抑鬱症而不自知，我說不是吧。我問他抑鬱症有甚麼徵狀? 他說 "不想見人囉，食唔到野囉，瞓唔到囉，同埋忽然情緒起伏囉，嚴重既咪出唔到街囉。"我跟他說那我又不是這樣，我最多都係不太喜觀見很多人，食得少同瞓得不多吧了。最後當然是沒有答案的，後來我跟朋友說，我如果真係有問題的話，最後便可以扮鄭四那樣，畫畫寫東西，過幾年就可以變成個顛顛喪喪的人囉。他說，係呀，仲可以用個頭撞牆呀。

****************************************************

正式踏入羊年，有點兒心急想知有些怎樣變化等著我而來，不過還是有一日過一日，365 日完了才會正式知道有沒有大事的發生。就正如剛才去看了晨早場的叮噹所說，今天所做的一件事或決定，便改變了一生的歷史軌跡。且看。

本命人圖

間中會去看看有那些文章近來會給人再抽出來看過的，順便會再去看看自己曾經寫過些甚麼。其實很想知道，在甚麼因由下外來的朋友會再抽看到那些文章? 如果要 Google search 文中提及的人名，也可能要到第 2357412 條先輪到我吧。迷離得很。不過，令自己有機會隨機的重看自己寫過的東西，也挺有趣。

今天重看了最近有人看過的兩篇 "給孤獨園" 和 "悲劇加上時間"。其實自己完全忘了當時為何會寫出這些東西? 是當年自己的感情出現問題? 還是要寫給別人看? 我真的沒印象。唯一可以知的是，這些想法我到現在仍堅信的，真理就是真理。但是知易行難，發生在自己身上時就步步為艱，句子可以說得漂亮，但沉重的失落感就經常令人透不過氣來。

看著看著，倒為自己嘆氣，自己的文字力量真的大不如前。今天的我，絕對組織不到這一句像 "既然所有的自苦自憐都只不過是一個不須要觀眾的私人時段演出的一齣苦情獨腳戲，倒不如令自己快活一點的過日子" 的句子。

其實重點不在之前寫過甚麼，今天在公司百無聊頼，於是便在面書和自己的部落格看看自己過往的步履，且看這十年人生經過了那些事情。看了數年，發覺自己在某段時間開始便沉默起來，部落格沒有寫，面書也沒有了像往年的那些活潑和跳躍，遠看就像是一個老人只是靜靜的坐著等待完結。跟著便問自己，為何會這樣呢? 是否因為生活過於安隱便失去了幹勁? 還是因為過於懶惰而令自身對甚麼都提不起興趣? 又或是覺得自己年紀開始老了，便應要好好的收好自己的所有感覺，刻意的令別人覺得自己成熟穩重? 反覆思量，應是集各方便的大全吧。

記得有一次去看一位神婆，她說我因為住在祖業下，而祖先又沒有得到好好的安置，所以他們的能量便一直的跟隨著我。後來我再細想，又真的是自從我從三樓搬了回來這 "祖,屋" 以後，這五年間我真的越來越老態，別說家居中的甩甩漏漏都懶得修補，有時就連去買吃都懶得下樓。信不信都好，她為我做完一些法事以後，人便開始動活躍起來。雖說那時心靈受創，為自己做一點小改變是一定會有的，但到了今天的我也仍繼續為自己找一點小事來做，有時候也為自己驚奇。一次短線旅行多的錢花掉了是小事，過後換來的身心舒暢和改變才是重要。是鬼神之說又好，或是當作心理醫生的輔導也好，總之生活沒有再像以前的迷迷糊糊中渡過已是萬幸。

在慢慢的重整人生地圖時，那些細碎的感覺又再回來。從前都喜歡作畫，也想過想學一點點的，一次機緣巧合便令自己拿起筆來試試。上一次上課的日子已是六年多前學法語了，本以為餘生都不會再上學去，但個多月前又報了一個課程 (不是法語囉)，雖然還未收到消息一定會取錄，但眾朋友都說應該問題不大 (但願如此)。當年只是不停的買漫畫，現在卻對其他不同類別的文字書都有點興趣。將經常相見的朋友放了在一旁，卻換來親人和舊同學的友情更加穩固。間中也認識一些新朋友，也希望這些人將來有機會成為另一圈的好朋友 (今日，有一個師兄在傾談中忽然向我交代他的家庭事的前世今生。聽完過後，記得某某的經典句語 "好想給你一個擁抱"...)。還有繼續修身，還有那個 "子事"... 忽然好像突然有很多事情想做，又像是時間太少，自己又太貪心，又恐怕最後還是沒有一件做得完。但不論如何，我起碼在這記錄下來。

其實，為著打發時間也好，真心想做也好，現在常告誡自己，最重要的還是動起來。明知這一切一切都不會令我成為別人眼中 "有成就的人"，雖明知自己不是一個有上進心的人，但如每天都為自己做一丁點兒自己認為是寫意的事，儲備下來至少都會令自己覺得人生充實。那怕是一時衝動，但至少都做過一點點。到了下一個週期，又或許會是另外的一些三分鐘衝動。

p.s. :我真係好想寫得番以前果啲作狀閪既句子呀!!!!

團年

原本都一直想著自己是否要去朋友間每年一度的團年聚會，不是不能面對，主要是因為不想在大眾面前表現出一見到面還會有一點點尷尬的。不過，後來因為關小姐說會跟男友一同來，所以便立即決定一定要出現。就是因為從關小姐的口中說得恩愛，如果即場加演求婚，那我便完全錯過了。其實那也好，自己的外在都己叫作是一生人中最好的狀態，選在人多聚會上出現比較搶鎂光燈。

一如所料，合共可能聽了一百句 "你好瘦!!!" / "食多啲野啦!!" / "點減架?" / "好 fit 呀!!"，真係多謝大家。其實修身修了數個月，已到自己的樽頸位，多吃又怕會肥，少吃又增不到肌，心理是在一個不平衡的狀態之下。已經要自己每天多吃一點，但習慣了吃得少，跟本一點點就已經夠了，吃的慾望一丁點兒都沒有。況且經常都只是一個人吃，隨隨便便的跟本不會太過著意要怎樣吃，其實又不是病，瘦一點都沒所謂吧。至少，現在的我是穿衣清瘦，脫衣有肉，都不過不失。

當然，對於自己，見面是另一事項要處理的事。又不是第一次做這些事情，一切從簡的一個招呼一個擁抱便化解了。人太多的關係，席間都沒有太多交談，不過也沒所謂。像這樣的大型聚會，跟每個人私下談五句都已經一晚了。回看這麼多年來都只是得幾個這樣的過客，事過後每個都還說一定可以做朋友的，但最後因為種種不同的原因，大家都在對方的生命軌跡上消失。有的是理念人生觀不再相同，話不投機半句多；有的是後來性格大變，變得再也認不出來；有的說了改天再約，但那個改天卻成了永遠的代名詞。有時回想起來都會有點唏噓，從陌生人到最親密的一個再成為陌路，也即是大家的緣份和債通通都完結了，只留下一堆經歷。這次又會是何種結局? 天曉得。總希望會有點不同的。

經過了多事的一年，來到另一個本命年，預計上應是會多變的。回看過往的本命年，24 和 36 在人生上產生了極大和重要的轉變，可幸大致上都是好的變，唯願這一次也不例外。但無論好壞，也要平常心面對便好。

忽然記得那套 "豕與自以為是的豬" 系列，也是時候拿來重溫一下了。

合歡山

因為小妹即興念頭，終於都跟她跑了一轉台灣。主要的節目是看星 (真的很作狀) 和行山，我是沒有帶著甚麼祈望去的，因為人算不如天算，又誰又能預告不測的風雲呢? 路上風景邊走邊看，有緣看到就當是上天的恩賜。

去到台中的合歡山中部，一千七百多米高，沒有甚麼問題，放心了不少。但旅館的風景好到不得了，正正的望著群山，每一刻都有不同的景色，真的可以一下子坐它一兩個小時。天黑了後霧氣籠罩了整個山頭，兩人心情大幅下降，但仍是有決心半夜再試試看。調了半夜三時半起來，小妹說三點半叫作是最暗黑的時間，邪魔妖怪都是最活躍，所以這個時候如可以看到的話，那應是最亮最好看的了。

三點半，推開房門走出露台，面向我的是一鈎彎月掛在半空，下面兩顆很亮的星星。我們
興奮得差點大叫，再走到露天的地往上看，黑黑的天就似穿了一個個小洞似的，全是星宿。我拿著電話的 APPS，續一的看看星座的位置。最後連電話也放下，就躺在長椅子上看個夠。越看便越多，可惜肉眼不能曝光，否則我們應可以看到一條銀河。基本上每一顆星星都是一顆太陽，那還有不知多少的不發光體的小星球在圍繞著星星而行，那有多少個外星生物也在同時間看著我們這個星球? 但在我們所看到的，有部份都已是不知多少年前的景像，看似很實在，但實質卻只是一堆虛幻的影像，我們中間不知相隔了多少光年。

看的時候，記得多年前曾經有人說過，將來有一天，我們一同去看世界。那時候欠債累累，真的沒想過可以往外跑，誰預計得到機會還沒有來到，人已不在。往後的日子，跟別的人多出外走走，雖然不是看甚麼風景，但都總想有一些相同的步伐，記下一點相處的時光。

第二天上合歡山，給小妹弄得心裡一直都很緊張，因為怕自己應付不來，可幸沒有出亂子。到山頂的路，平常的只要大約四十分鐘便可，但卻用了差不多兩小時。氧氣不夠，只可以行得極慢，步伐快一點便氣喘得要命。邊上山邊讚嘆大自然的美麗，怎可以會有這些如畫的景色，真的不枉來行了這一趟。

在合歡山的兩天，小妹忽然心血來潮，播了好幾次紅豆... 我知她的故事，明白她的心情...

有時候　有時候
我會相信一切有盡頭
相聚離開　都有時候
沒有甚麼會永垂不朽
可是我　有時候
寧願選擇留戀不放手
等到風景都看透
也許你會陪我　看細水長流

鯊魚線與子彈肌

昨天在面書跟自己立約，要用個半月的時間操練出鯊魚線與子彈肌，之後自覺有點太衝動，好應練好後才嚇嚇人。不做都做了，硬著頭皮頂硬上。

胸腹都差不多定了形，但都要保持著，所以一去到便做些少確保不變形。在推下胸時一雙飄亮的的眼睛跟我打招呼，原來是多日不見的師兄。我跟他說我的約，他卻說連他自已都不知可以如何操練這排肌肉。他看看我的身，說我基本上己經叫作有些少的了，跟本不用再特別操練，我說不夠明顯嘛，所以才有這打算。他說這部位跟本連英文是甚麼都不曉得，我找給他看後，他說回家找找資料，下次告訴我。

及後在他還在考慮今天要做甚麼時，我再問他如何快速做厚些背肌，因而決定了今天一同操背，還說跟著這過程度做，包保我一個月後可加重一倍和快速出肉，因為他也是這樣練出一身肉來。

每種器械先衝量可承受的最重重量後，第一組所做的便是減三十至四十磅，先拉二十下。第二組加五至十磅，拉十五下。再第三組又加五至十磅，再拉十二至十五下。最後一組做自已可以做得到最重的重量，拉十下，最後五下還要每一下都要維持五秒。每組中間只作十五秒休息，真是只可以換一換重量便又要再做。真的從未試過只做完第一種器械便已一頭汗，但完全感覺到那組肌肉脹脹的感覺，超爽。做完五款器械都已經死去活來。

他離開前拋下一句，"你一定要食多些，才有肉長出來呀。" 還是要吃。既是如此，好!!! 去吃瘦叉飯一碟。不過，今天這樣的操練，真的餓得快，未夠四個鐘便覺餓。

回看 2014

跟朋友喝酒時的後一句，他說謝謝我的本年回顧，跟著才想起，這真是應要做一做這年的回顧。

工作 :
終於離開了做了十一年的公司。離開前正是我自己在公司的位置如日方中，老闆也要看我的面色數分。無他，全公司最有份量的客戶都在自己的手上。可是，真的悶了，又看不出前景，公司又似是財政不穩健，做得不開心又為何繼續留下。幸好舊客戶介紹了我現時的老闆給我，談了半年最後都請了我。作為一個開荒牛，甚麼都要重頭做起。由空無一物的一間寫字樓，到現在可以叫作正常的運作，倒也叫作有點安慰。老闆請我最最希望是能開拓出更大的市場，不幸是跟本客源有限，九個月來都無所成績。還好老闆覺得不是問題，還覺源頭在於他自己，叫我不用担心，且可放心一陣子。三五七年倒是沒問題，但之後還要是看老闆真的想如何處理香港的公司。

感情 :
一直都不在這兒談感情的我，也許都要在今年說一說。還以為十拿九穩的感情，一下子消失得沒影蹤，怪的就只可以說是自己的遲鈍。滿以為安定的生活，在無預兆之下忽然的被對方切斷，才知人家受夠了。挽留無效也只好放手，既已不可以再愛，也不可重新再來，最後也就只可以放生對方。每個人都有找尋快樂的權利，既然自己在感情上再也不能給對方任何快樂或寄託，唯一可以做的，就只是希望對方快樂吧。花了數個月來自我治療，將時間寄託在運動和文字上，還好都總數過得去。有朋友說，忘記一段感情的最好方法，就是投入另一段感情中。自問年事已高，也沒有任何人來扣門，一切都沒有特別留心。回看廿多年來的感情生活，每次認認真真的就總有不測跟著而來。如果還有下一步，最好還是不要放得太重，又或是慎重考慮。無他，只希望不要再害人害己吧了。

哥哥 :
當大哥和大嫂得知我散了，便開始多了找我。得閒無事的都出來跟我晚飯，或是去他們家喝酒。不是要聽我吐苦水，也沒有問任何因由。哥哥只說了一句，人家要走也留不住，一切隨緣便好了。由我當年向他出櫃，到今時今日，自己一直感謝他的支持。他沒做甚麼也沒說甚麼，就只將我的身邊人當作朋友或家庭的一份子，每次飯局都叫我約對方一同來。下半年見得多了，說話也多了，最後都跟我說他當年答應過父親的事，那時我感動的答不上話來。有一次大嫂喝得半醉時也說，"我跟女兒說過，如果你父母有朝一日過身，健叔叔老了你一定要好好照顧他。" 當然我自己都不想太過長命要別人看顧，做成他人的負担，但心存感激。

朋友 :
某人的一句話，便令我割斷了大部份的聚會，只留下了小形的兩三個人的聚會。無他，都是自尊心作祟。那也好，嘗試一下去令自己認識其他的朋友，雖然到現在仍未有太大的成果，但總算是有開始。再沒有柴娃娃無聊喝酒的日子，但也不是寂寞。回想當年，自覺是朋友圈的中心，也是時候要改變一下。其實，世界沒有誰都沒有分別，每個人都總找到自己的出路。

身體 :
因為被甩，又正值出差回來，睡不到吃不下心情差，就只可以喪做運動打發時間。人家說，跑步可以分泌安多分，令人比情好一點。試過，或許叫作有成效，過了一個月左右，便急減了十多磅。那時心想，既已減了，何不再雕塑一下自己的身型。來到今天，體重沒有回升，腹肌有了，胸也方了，繼續修練其他部位。有人說我過於執著，自己卻覺得執著於自己的身體，總好過沉迷於其他事項上吧。聖誕以自己肉身照給朋友們作賀咭，這數天便接到兩通電話問我如何修身減肥等等。繼而令我聯想到，應否認真的讀一個課程回來呢?

文字 :
有朋友在讀佛學，可能就是我怕我一直放不下，所以不時的都給我一些有關佛學的文字給我看。同時也有朋友聚會間談及一些哲學的理論，不知何解的便覺得很有趣，有一次便買了一些回來看。可惜時間不夠用，大部份都還未有看完，可幸只是不夠時間，並不是興趣不再。慶幸的是，我真的完成了連繼寫了一百篇無聊的生活記事。在一個沒有太大耐性的我而言，其實已是一個創舉。現在最希望的，是半年內可以完成 "子事"，又是另一個漫長的鬥爭。

音樂 :
戒買了不打緊的 CD，多買了重要的黑膠唱片。現在入到二手店，不到十五分鐘便回頭走，好像已不太重要。重要的也不介意用原價去買，但沒有了那些 "是旦買嚟試吓儲吓" 的念頭。現在都是隨緣，聽到便聽，一個月沒去找下載也沒所謂。

2015 才是自己的本命年，理應很多變他的。記得 24 和 36 時的一些變化，好像都算是好的變。但在本命年以先的 2014，下半年的人生生活心態都已作出了翻天覆地的變，我沒有祈望有甚麼特別好的東西會降臨，只要不變得更壞便好了。

Touch Mi

年頭之時已有人問我訂票與否，原本都有打算看的，但後來春為新工忙碌，所以一直都忘了。況且想看的朋友們又遲遲沒有認購數目，最後都沒有訂。後來另一朋友有內部認購，說可以預了我兩張，一口應承。

沒有甚麼寄望之下，反而覺得精彩，亦可能坐得很近，一切覩看得比較清楚。雖已預計會是另一個瘋人院演唱會，但一路看見所有制作都非常之好，燈光舞台都不停給我嘩一聲的感覺。不明所以的是，明明是基督教徒，為愈福音那段的舞蹈演員穿的卻是像 14K 的服飾。中間過場半祼男舞者跳舞時，我跟朋友說，我最終目的，希望是他們的身材。真是有點不可能。

最近兩次看她，一早預了票，最後都是因感情錯失而要臨時請朋友一同去看。上次死人，今次被甩。我跟朋友說，下次如她再開，而還有這運氣身邊有人，都真的認真考慮要不要再看。朋友說，一是避了她，以後都不去看她的演唱會好了。其實又未必，繼續一人便不用迴避。

今年聖誕

今年的聖誕，應該是特別的一年。 十多年都是有人在身邊，或是半情願的攪一個派對。終於，今年甚麼都沒有，很多人都沒見，也只是見自己的哥哥，也算開心。也不算甚麼改變，都是如常過日子。1224 和 1225 的車卡，也不是太冷。嘗試在不同的地方找溫暖。

來年是本命年，可能是很太的變化，希望是好的變，因為 24 和 36 的變都還算是好的。友人說，年紀不輕，15 年要好好留心一下，既有機會大變，可能會是大運轉。我說，有人來跟我說再談吧，免得浪費時間煲水。不過，肉身取暖就一律不介意。

1224 和 1225後，也要 keep warm...

聚

今日 Skype 的對話...

A : 聖誕有冇 party 呀?
B : 無呀, 無攪啦。都無咩所謂啦~ 自閉都幾 OK 啦。
A : 咁平時上你屋企飲酒果班呢?
B : 我無再比佢地上嚟啦。
A : 吓? 鬧番左? 
B : 上次咪話，我之前退左 whatsapp 大圍果個 group 既，咪有人同我講，你洗乜退吖，我過兩個星期, 心情好啲咪入番去囉，大把人等住找我飲酒... 咪因為呢句話, 我就無再比佢地上嚟囉~
A : 吓? 你唔洗咁呀??!!
B : 無既，做人既野，我情願乜都無哂，都費事比人睇死自己啦。
A : 不過 whatsapp 有個缺點，文字一寫下來，便比人無限既演繹。如果可以面對面講，你睇到佢既表情，語氣，成句話又吾同睇法。
B : 算啦, 既定既事實, 無謂多理...
A : 咁都係，最緊要你自己覺得開心....
B : 我有朋友知呢件事, 都話我太過執著...
A : 我廿幾年前岩岩自己攪生意，不知幾enjoy自由自在既生活，好享受自處既時間。不過20年后既今日，有得揀既話，我會用多啲時間起朋友身上。我都系執著既人，我都好明你。不過我執著過，會發現真空左20幾年既朋友生活，系搵吾返。你呀，嬲完咪算囉。
B : 唔知呢，或者我唔再介意啲人再出唔出現掛。
A : 你無左班 friend 后先會知。而家剛開始，會覺得 lonely 既 christmas 幾 ok， 幾型。
B : Well... 關乎自尊既野，我就真係放唔低囉。BTW，係 alone，唔一定係 lonely。
A : 大家都金牛座，點會唔明。我當年中 F6 / F7 果兩年，都好多你咁既感受。唔駛迫自己，不過又唔好單方面斷定他人既說話。
B : 無啦，咁我家下咪用行動話比自己知，人地可以睇錯了我，但我唔一定係你所看到的那一個我囉。但當你發現另一個我既時候，可惜已經遲了。
A : 唔明? 睇錯了你乜野?
B : 即係咁，我睇到既潛台詞係… 你呢啲大把人陪既，洗乜係度扮野又退 group 又唔搵人吖。你家下都只係心情唔好啫，遲吓你咪又係番返哂嚟。一班班人等住你啦，咪又係以前咁既生活... 其實，我覺得，到最後咪係果句咪係… 你扮乜撚野野吖， 品性難移呀...
A : 哦~ 咁咪又係你既包袱囉，真系要睇你自己幾時放低啦。或者對方既潛台詞並唔係你所諗既呢。所以，沒有語氣同表情既文字，好難估其意。
B : 算吧啦，意思係點都無所謂啦。我再見唔見人攪唔攪 party 係我既事，最後大部份既人會否成為陌路，係我自己要承受既果，與其他人無關。同埋對方點諗, 亦都與我無關係啦，大部份既人我都唔會再搵架啦。啲文字係咪咁既意思，都己沒關係了。

一百日後

無聊 project 完了之後，當然會休息一陣子，相信可以多抽時間出來做一點其他的事。可是，仍是那個樣子。

當做運動變成一種執著的時候，真的是多多時間都不夠用，由以往懶散的做一小時，到今天竟然在那裡留了三小時，離開時還覺得不夠，心裡帶一點歉意，好像有點對不起自己似的。我有自問是否真的太過份了，但現在自覺得就只是還差那一小段路，一定要花多點時間的。不過，那一小段路，就只是胸口那個彎位不夠方，下方那條線不夠明顯，這一塊肌肉相比像浮了一點，背仍不夠厚... 這些一點點的不满意，便可以攪我兩三小時。盡人事吧，一把年紀，可以幾耐得幾耐。終於今天發覺右手真的有問題了，之前還以為是累了吧，但今天則發覺有點不能發力，不休息不行，但仍可做其他部位。

回家看到那一堆的書，原本想著不用寫後便可以多一點時間，但倒頭來都是進展不大好，看書真的慢得得人怕。還有哥哥送的畫架，也應好好的找個機會開光。已知第一幅會做些甚麼，但由於是混合材料，預備功夫也多得很。其實有點後悔當年扮洒脫的 (扮洒脫真的是由細到大的個人特性) 將原稿掉了 (是的，是想將之後前的好好重新做一次，那幅應是 1992 年的作品???)，不則將來便可以拿來作一個對比。

終於行動去看了 Ridley Scott 的 Exodus，失望的。還以為導演加上 Christian Bale 應沒出錯的吧，怎知就像是看大陸拍的那些大製作般。故事跳到不知去了那裡，人物又無性格無 backup。摩西變了一個凡人，跟本沒能力又沒得作主。殺長子以為會有些睇頭，點知黑影一過便算。過紅海變成大退潮都還算了，最後還要沒頭沒尾的加上小小的刻十誡，真的把鬼。一邊看一邊覺得母后好熟面口，等出字幕確認一下，果然是 Sigourney Weaver。跟住頂一聲，洗唔洗，好好的浪費了一個演員。

今早吃早餐時，坐了一個很久都沒有坐過的位置。忽然想起，我已在這吃了十多年的早餐，每個星期六日都會在。當時因為這件事，又心生一主意，做得成又有排攪，不過能開得到頭，都不是壞事。且看。

H100 - Day 100

其實真的有點估不到，真的會一直的堅持到一百天。回看這數個月，自己想要堅持的事，越來越頑固。另一個估不到的，第一百天的完結會是今天，我都是上星期計算一下日子才得知。上天真會開玩笑，但不好笑。公平點，如不是那樣，又不會有這一百天，也不會完成這無聊的舉動。

今天生活如常，只是沒有占，卻跟一個多個月沒有見面的朋友晚飯。席間談了許多將來希望會是如何，大家最希望的是可以應死就早死，不要等到七老八十甚麼能力都沒有時還要獻世。但我們不是太負面，但像我們兩個的人，雖不至一窮二白，但基本上沒甚麼好牽掛的，最怕自己看著自己衰老。朋友嘛，悲哀那一兩個月，轉個頭便忘了，有空記起都已經大幸了。回程時大家都說，不幸死不了，最好晚年離開城市，情願日日看著動物大遷徙，都好過在這裡。

呀!!! 今天還有鳩嗚，昨天上午買了一個皮包子，下午又代朋友買了一個。今天到公司樓下拿東西時，那女士見我便立即拉著我，說那個款的包包今天來了個棗紅色，說我一定喜歡。我一看，對鏡拼拼，又付錢。兩天，同一個款買了三個顏色，感覺有點像濶太。有朋友說，錢不花就只是數字，花了才是自己的。

回看這一百天的記錄，其實沒有甚麼大不了，況且也不可以說是開心事，自欺欺人，都是要找一個出口去寫點東西吧了。但當然，那也不一定是真我。仔細看，差不多大部份的都是來自吃喝與揮霍。或許，人生就是由這一點點的淡淡然而儲蓄下來。有著平淡的日子，總好過千軍萬馬波濤洶湧的感受。幸好自己有記下這三個多月的無聊事，將來還可以讓自己有機會回顧一下在某一特定日子的自己是如何的。最後發覺原來自己的生活都是如斯的簡單。有時，也會問自己的生活為何來來去去都是如此這般，但要我想一個理想的生活，满足於簡約的生活就是自己想要的? 我又說不出來。或許，簡單是重要，但也要簡單的不沉悶。

完了這個目標，我自己都不知會否繼續寫下去，好像說得太多自己的私生活了。或是到後期，自己也覺得說得太多個人感受，這些不是要留給說給真人聽的嗎? 我只知道，過了一個階段，我或許要做另一些東西，且看如何。將來，寫與不寫都不是壓力的時候，或許會比較像我多年以前的東西，還會比較深入。

*****

以上的幾顆星星之間，我呆了許久。途中想起零極限的四句經文，好想送給自己。或許自己以前行錯了很多步伐，給自己帶來了許多傷害。但原諒自己，再愛惜自己才是最重要。經過 MLA 的闡述，便變得更具體。送給自己...
對不對 我傷害了你
請原諒我對你做成的傷害
謝謝你之前所做的一切
我愛你 一直都愛著你

下午抽煙時，想到第一張相是這個景，所以再拍下。在車的玻璃看到自己的反影，忽然明白...

見山是山，是山不是山，見山還是山。

要好好的記住。

H100 - Day 99

如果 somewhere out there 有人在看到這一篇，我好想問，看到了這 99 天重複又重複的生活，請問有些甚麼感覺呢？Happy 100 是否覺得真的快樂了？是否真的可以讓生活每天都找到一點小高興? 還是，只是以小高興做藉口，將情緒的起伏活埋?

老實說，這沒有讓我變得很快樂，不過也沒有令我有甚麼不快。感覺就好像每天在自凟，將東西記下，有沒有觀眾不要緊，每天都可以按計劃去完成才是高潮所在。來到這一天，路行得不容易，但始終為自己做了一點小東西，就像曾承諾過的，為自己做到了。明天可能是回顧，今天....

And now here is my secret, a very simple secret : one sees clearly only with the heart. Anything essential is invisible to the eyes.

你全信我所寫的所有內容嗎？

H100 - Day 98

係占有朋支一齊做真係好唔同。原本諗住只係做一個鐘，一上到去就見到剛識得的那個朋友的朋友，又係同我一樣，無人無物就日日喪做，最後我又差不多兩個鐘。以前唔識佢就只係覺得佢圓圓潤潤幾得意，識左就覺得佢好好笑，不停誣衊我話我間接話佢肥。我叫佢教我做啲背，可以做番厚啲，佢就教左一啲好奇怪既動作，好似玩雜耍咁。後來佢話，呢啲係佢以前打拳時學的。之後佢話原來係半個韓國人，跟住就一堆我聽唔明既 "請請寢寢"。我答佢，唔怪得總係覺得你個樣好奇怪。

話說星期一係占遇到另一個朋友，佢一見我同條半韓仔傾偈，之後就立即話佢都幾得意。當晚半韓仔又無啦啦 whatsapp 我講話我同我朋友都老得嚟幾 cute，保養得幾好。今日半韓仔都有問我朋友做咩唔嚟。心血來潮希望無估錯，所以今日都同佢話，遲啲搵日約埋我個朋友一齊出嚟飲野。且看我的感應有無錯。

之後我再 whatsapp 介紹半韓仔我識既朋友，話遲吓去飲酒。佢仲以為我想溝半韓仔。我話，雖然佢都好得意，不過未有心神去攪感情，唔好害人害己，最後得到一個 "讚"。當然，我朋友那邊的故事不提，以免出亂子。

今日既主題係，識吓多啲其他人，或者有助原本的朋友的。且看。

其實今日係無相既，隨手係枱面見到的封面，又幾好，所以影左佢當相。